ބީއެމްއެލް އިން ފުރަތަމަ ފަހަރަށް އިންޓަރނޭޝަނަލް މަރކެޓަށް ޑޮލަރު ސުކޫކެއް ވިއްކަނީ
7 މެއި 2026 | ބުރާސްފަތި 10:47ބައިނަލްއަޤްވާމީ މާލީ ބާޒާރަށް ބީއެމްއެލް އިން ފުރަތަމަ ފަހަރަށް ވަނުމަށް ތައްޔާރުވަމުންދާއިރު، އޭޝިއާ އާއި ވިލާތުގެ އިންވެސްޓަރުންނާއެކު މިހާރު ދަނީ މަޝްވަރާ ބައްދަލުވުންތައް ބާއްވަމުންނެވެ. މި ފިޔަވަޅުގެ މައިގަނޑު މަޤްޞަދަކީ ދުނިޔޭގެ މަސްރަޙަށް އަންނަ ބަދަލުތަކާ ގުޅިގެން ރާއްޖޭގެ ވިޔަފާރިތަކަށް ބޭނުންވާ ޑޮލަރު ފޯރުކޮށްދީ، އިޤްތިޞާދީ ހަމަޖެހުން ޤާއިމުކުރުމެވެ. އެހެންކަމުން، މިއީ ރާއްޖޭގެ ބޭންކިންގ ނިޒާމުގެ ބޮޑު ބައެއް ހިއްސާކުރާ ބޭންކުން މާލީ ދަތިތަކަމަށް ޙައްލު ހޯދުމަށް އަޅާ ހަރުދަނާ ފިޔަވަޅެކެވެ.
ބޭންކް އޮފް މޯލްޑިވްސްގެ އަހަރީ އާންމު ޖަލްސާގައި އެ ބޭންކުގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް . | ބެންކް އޮފް މޯލްޑިވްސް
ރާއްޖޭގެ އެންމެ ބޮޑު ބޭންކު، ބޭންކް އޮފް މޯލްޑިވްސް (ބީއެމްއެލް) އިން ރާއްޖޭގެ ވިޔަފާރިތަކަށް ބޭނުންވާ ޑޮލަރުގެ ދަތިކަން ޙައްލުކޮށް، ލިކުއިޑިޓީ ރަނގަޅުކުރުމަށްޓަކައި ފުރަތަމަ ފަހަރަށް އެމެރިކާ ޑޮލަރުގެ ސުކޫކެއް (އިސްލާމިކް ބޮންޑެއް) އިޝޫކުރުމަށް ތައްޔާރުވެއްޖެއެވެ.
ބްލޫމްބަރގް އިން ރިޕޯޓުކޮށްފައިވާ ގޮތުގައި، ބީއެމްއެލް އިން މި ފިޔަވަޅު އަޅަން ނިންމާފައިވަނީ މެދުއިރުމަތީގައި ހިނގަމުންދާ ހަނގުރާމަތަކާއި ހަމަނުޖެހުންތަކުގެ ސަބަބުން ސަރަޙައްދީ ވިޔަފާރިތަކަށް ކުރަމުންދާ ނޭދެވޭ އަސަރުތަކުން ރާއްޖޭގެ އިޤްތިޞާދު ސަލާމަތްކުރުމަށް އެހީތެރިވުމުގެ ގޮތުންނެވެ.
މިއީ ބައިނަލްއަޤްވާމީ ކެޕިޓަލް މާކެޓަށް ބީއެމްއެލް އިން ވަންނަ ފުރަތަމަ ފަހަރެވެ. މި ސުކޫކަށް އިންވެސްޓަރުންގެ ޝައުޤުވެރިކަން ހުރި މިންވަރު ބެލުމަށްޓަކައި، އޭޝިއާ އާއި، މެދުއިރުމަތި އަދި ވިލާތުގެ ޤައުމުތަކުގެ އިންވެސްޓަރުންނާއެކު ބީއެމްއެލް އިން މިހާރު ދަނީ ބައްދަލުވުންތައް ބާއްވަމުންނެވެ.
ރާއްޖޭގެ ބޭންކިންގ ނިޒާމުގައި ހުރި އެސެޓްސް އާއި ޑިޕޮސިޓްތަކުގެ ގާތްގަނޑަކަށް 50 އިންސައްތަ ހިއްސާކުރަނީ ބީއެމްއެލް އިންނެވެ. އެހެންކަމުން މިއީ ރާއްޖޭގެ އިޤްތިޞާދަށް ނުހަނު މުހިންމު ދައުރެއް އަދާކުރާ ބޭންކެކެވެ. ބައިނަލްއަޤްވާމީ ބާޒާރުން ޑޮލަރު ހޯދުމުގެ މައިގަނޑު މަޤްޞަދަކީ، ރާއްޖޭގެ ވިޔަފާރިވެރިން މުދާގަތުމަށް އެލްސީ ހުޅުވުމަށް މި ދަނޑިވަޅުގައި އިންތިހާއަށް ބޭނުންވެފައިވާ ބޭރު ފައިސާ (ޑޮލަރު) ފޯރުކޮށްދީ ވިޔަފާރިތައް ހުއްޓުމަކަށް އަޔަނުދިނުމެވެ.
ދުނިޔޭގެ މަސްރަޙުގައި ހިނގަމުންދާ ސިޔާސީ އަދި ހަތިޔާރުއެޅި ހަމަނުޖެހުންތަކުގެ ސަބަބުން ރާއްޖެއަށް އަންނަ ފަތުރުވެރިންގެ އަދަދަށާއި، ބޭރު ފައިސާ ވަންނަ މިންވަރަށް އަސަރުކުރުމުގެ ބިރު އޮތް މި ދަނޑިވަޅުގައި، ބީއެމްއެލްގެ މި ނިންމުމަކީ މާލީ ހަމަޖެހުން ޤާއިމުކުރުމަށް އެޅޭ ވަރަށް މުހިންމު އަދި ހަރުދަނާ ފިޔަވަޅެއްކަމަށް މާލީ މާހިރުން ދެކެއެވެ.
