ފިޗުން ރާއްޖޭގެ ކްރެޑިޓް ރޭޓިންގް މަތިކޮށްފި
ރާއްޖޭގެ ރޭޓިންގް މަތިކުރުމަށް ފިޗްއިން ނިންމީ، 2026 ވަނަ އަހަރު ދައްކަންޖެހޭ ސުކޫކުގެ ފައިސާ އަނބުރާ ދެއްކުމުގައި ހުރި ނުރައްކާތައް ކުޑަވެ، ދައުލަތުގެ އާމްދަނީ އިތުރުކުރުމަށް އަޅަމުންދާ ފިޔަވަޅުތަކަށް ބެލުމަށްފަހުގައި. މީގެ އިތުރުން ބޭރު ފައިސާއާ ބެހޭ އާ ގަވާއިދާއި ބައިނަލްއަގުވާމީ މާލީ އެހީތެރިކަމާއެކު ރިޒާވް ވަރުގަދަވާނެ ކަމަށް ލަފާކުރެވުނު ނަމަވެސް، ދަރަނީގެ ނުރައްކާ އަދިވެސް އޮތްކަން އެ އިދާރާއިން ފާހަގަކުރޭ.
ޔުނައިޓެޑް ކިންގްޑަމްގެ ލަންޑަންގައި ހުންނަ ކެނަރީ ވޯފް ފައިނޭންޝަލް ޑިސްޓްރިކްޓްގައި ގާއިމުކޮށްފައިވާ ފިޗް ރޭޓިންގްސްގެ އޮފީސް. | ގެޓީ އިމޭޖަސް
ފިޗް ރޭޓިންގްސްއިން ދިވެހިރާއްޖޭގެ ލޯންގް-ޓާމް ފޮރިން-ކަރަންސީ އިޝުއަރ ޑިފޯލްޓް ރޭޓިންގް (އައި.ޑީ.އާރް) 'ސީ.ސީ' އިން 'ސީ.ސީ.ސީ މައިނަސް' އަށް މަތިކޮށްފިއެވެ. އާންމު އުސޫލުން 'ސީ.ސީ.ސީ ޕްލަސް' ނުވަތަ އެއަށްވުރެ ދަށް ރޭޓިންގްއެއް ދެވިފައިވާ ގައުމުތަކުގެ އިގްތިސާދީ ކުރިމަގު (އައުޓްލުކް) ފިޗްއިން ކަނޑައެއް ނާޅައެވެ.
ރާއްޖޭގެ ރޭޓިންގް މަތިކުރުމަށް ފިޗްއިން ނިންމީ، 2026 ވަނަ އަހަރުގެ އޭޕްރީލް މަހު ދައްކަންޖެހޭ ސުކޫކުގެ ފައިސާ އަނބުރާ ދެއްކުމުގައި ހުރި ނުރައްކާތައް ކުޑަވެފައިވާކަމަށް އެ އިދާރާއަށް ގަބޫލުކުރެވޭތީއެވެ. މީގެ އިތުރުން، ދައުލަތަށް ލިބޭ އާމްދަނީ އިތުރުކުރުމަށް ގެންނަ އިސްލާހުތަކާއި، އަލަށް އަމަލުކުރަން ފެށި ބޭރު ފައިސާއާ ބެހޭ ގަވާއިދުގެ ސަބަބުން، ދައުލަތަށް ބޭރު ފައިސާ ލިބޭ މިންވަރު އިތުރުވެ، ސަރުކާރުގެ މާލީ ގާބިލުކަން ވަރުގަދަވާނެ ކަމަށް އެ އިދާރާއިން ލަފާކުރެއެވެ.
ބޭރުގެ ދަރަނި އަދާކުރުމަށް ކުރަންޖެހޭ ހޭދަ ކުޑަވުމާއި، ބައިނަލްއަގުވާމީ މާލީ އިދާރާތަކާއި އެކުވެރި ގައުމުތަކުގެ އެހީތެރިކަން މެދުނުކެނޑި ލިބެމުންދިއުމަކީ، ކުރިއަށް އޮތް ކުރު މުއްދަތުގައި ރާއްޖެއަށް ކުރިމަތިވެފައިވާ މާލީ ދަތިތަކަށް ލުޔެއް ލިބިގެންދާނެ ކަމެއް ކަމުގައި ފިޗުން ބުނެފައިވެއެވެ. އަދި މީގެ ސަބަބުން ދުރު މުއްދަތެއްގައި ރާއްޖޭގެ ބޭރު ފައިސާގެ ރިޒާވް އަލުން ބިނާކުރުމަށް މަގުފަހިވެގެންދާނެއެވެ. ނަމަވެސް، ރާއްޖޭގެ ރޭޓިންގް 'ސީ.ސީ.ސީ މައިނަސް' ގައި ބޭއްވުމަށް ނިންމީ، ބޭރުގެ ދަރަންޏާއި ދައުލަތުގެ މާލީ ހާލަތުގައި ހުރި ނުރައްކާތައް އަދިވެސް މަތީ މިންވަރެއްގައި ހުރުމުންނެވެ.
