ޙަރަމްފުޅުގައި ބޮމެއް ގޮއްވާލަން އުޅުނު ކަމަށް ބުނާ ވާހަކަތައް ސައުދީ އަރަބިއްޔާއިން ދޮގުކޮށްފި
2 އޮކްޓޯބަރު 2026 | ހުކުރު 04:29މަސްޖިދް އަލް-ޙަރަމްގައި ބޮމެއް ގޮއްވާލަން އުޅުނު ކަމަށް ބުނެ ފަތުރަމުންދާ ޚަބަރުތައް ސައުދީ ސަރުކާރުން ދޮގުކޮށްފި. ސަލާމަތީ ބާރުތަކުން ބުނީ ހައްޔަރުކޮށްފައި ވަނީ މަގުމަތިން ދިޔަ މީހުންނަށް އުނދަގޫކޮށް ބިރުވެރިކަން އުފެއްދި މީހެއް ކަމަށް. ނަމަވެސް، އެ މީހާގެ އަތުން ގޮވާތަކެތި ފެނިފައިވާ ކަން ނުވަތަ ނޫން ކަން ސާފުކޮށްދީފައެއް ނުވޭ
ހައްޖުގެ އަޅުކަމަށް ތައްޔާރުވުމުގެ ގޮތުން، ދުނިޔޭގެ އެކި ގައުމުތަކުން މައްކާ އަށް ޖަމާވި މުސްލިމުން 2026 މޭ 20 ވީ ބުދަ ދުވަހު މަސްޖިދުލް ހަރާމްގައި ތަވާފުކުރަނީ. | ގެޓީ އިމޭޖަސް
މުސްލިމުންގެ އެންމެ މުޤައްދަސް ބިނާ، މައްކާގެ މަސްޖިދް އަލް-ޙަރަމްގައި އަމިއްލައަށް މަރުވެގެން ބޮމެއް ގޮއްވާލަން އުޅުނު ކަމަށް ބުނެ ފަތުރަމުންދާ ރިޕޯޓުތައް ސައުދީ އަރަބިއްޔާގެ ކަމާބެހޭ އިދާރާތަކުން ހުކުރު ދުވަހު ދޮގުކޮށްފި އެވެ. ސައުދީ އަރަބިއްޔާގެ އިދާރާތަކުން ބުނީ، ޙަރަމްފުޅު ކައިރީގައި މަގުމަތީގައި ހިނގާފައި ދިޔަ ބަޔަކަށް އުނދަގޫކޮށް، ފުރައްސާރަކޮަށް، ބިރުވެރިކަން އުފައްދަން އުޅުނު މީހަކު ހައްޔަރުކޮށްފައިވާ ކަމަށެވެ.
އެކްސްގައި ނެރުނު ބަޔާނެއްގައި ސައުދީ އަރަބިއްޔާގެ އިދާރާތަކުން ބުނީ، "މުޤައްދަސް ވެރިރަށުގެ ސަލާމަތީ ބާރުތަކުން ވަނީ، މަގުމަތިން ހިނގާފައިދިޔަ މީހުންނަށް އުނދަގޫކޮށް އެ މީހުންގެ މެދުގައި ބިރުވެރިކަމާއި ސިހުން އުފެއްދި މީހަކު ހައްޔަރުކޮށް، އޭނާއާ މެދު ވަގުތުން ފިޔަވަޅު އަޅާފައި" ކަމަށެވެ.
"މި ހާދިސާއާ ގުޅިގެން ފަތުރަމުންދާ ވާހަކަތަކަކީ އެއްވެސް ހަގީގަތެއް ނެތް ވާހަކަތަކެއް ކަން ސަލާމަތީ ބާރުތަކުން ޔަގީންކޮށްދޭ،" އެ ބަޔާނުގައި ބުނެފައިވެ އެވެ. ނަމަވެސް، މި ބަޔާނުގައި ތުހުމަތުކުރެވޭ މީހާއާ ގުޅޭ އިތުރު އެއްވެސް ތަފްސީލެއް ދީފައެއް ނުވެ އެވެ.
މީގެ ކުރިން މީސްމީޑިއާގައި ފެތުރި ވާހަކަތަކުގައި ތުހުމަތުކޮށްފައި ވަނީ، ގޮވާތަކެތި ހަރުކޮށްފައިވާ ވެސްޓެއް އަޅައިގެން ހުރި މީހަކު ޙަރަމްފުޅަށް ވަދެފައިވާ ކަމަށެވެ. އަދި، ސަލާމަތީ ފައުޖުގެ ބާރުގެ ދަށަށް އެ މީހާ ގެންގޮސްފައި ވަނީ ކަޢުބަތުالله ގެފުޅު ކައިރިން ކަމަށް ވެސް އެ ޚަބަރުތަކުން ބުނެފައިވެ އެވެ. ނަމަވެސް، ސައުދީ އަރަބިއްޔާގެ ކަމާގުޅޭ އިދާރާތަކުން މި ވަނީ މި ކަން ދޮގުކޮށް، މި ކަމުގެ ހަގީގާތް ހާމަކޮށްދީފަ އެވެ. މި ޚަބަރުތައް ފަތުރާފައި މި ވަނީ، ޔަމަނުގެ ހަނގުރާމަވެރި ހޫޘީ ޖަމާއަތުން ސައުދީ އަރަބިއްޔާގެ ރަށްތަކަށް ހަމަލާތަކެއް ދޭން ފަށާފައިވާ ދަނޑިވަޅެއްގަ އެވެ.
މަސްދަރު: އަނަދޮލު އޭޖެންސީ
