ޢަރަފާތް ޚުތުބާ 35 ބަހަކުން ޑިޖިޓަލް ޕްލެޓް ފޯމްތަކުގައި ދުރަށް ފޮނުވާނެ

މަސްޖިދުލް ޙަރަމް އަދި މަސްޖިދުއް ނަބަވީގެ ދީނީ ކަންކަމާ ބެހޭ ރިޔާސަތުން ހާމަކޮށްފައިވާ ގޮތުގައި، މިއަހަރުގެ ޙައްޖު މޫސުމުގައި އިއްވާ ޢަރަފާތް ޚުތުބާ 35 ބަހަކަށް ތަރުޖަމާކޮށް، އެ އިދާރާގެ ޑިޖިޓަލް ޕްލެޓްފޯމްތަކާއި ގުޅުންހުރި ޗެނަލްތައް މެދުވެރިކޮށް ދުރަށް ފޮނުވުމަށް ވަނީ ނިންމާފައެވެ. ދީނީ ކަންކަމާ ބެހޭ ރިޔާސަތުގެ އިސްވެރިޔާ ޝައިޚް ޢަބްދުއްރަޙްމާން އަލް-ސުދައިސް ވިދާޅުވި ގޮތުގައި، މި މަޝްރޫޢުގެ މަޤްޞަދަކީ ދުނިޔޭގެ އެކި ކަންކޮޅުތަކުގައި ތިބި މުސްލިމުންނަށް ޢަރަފާތް ޚުތުބާގެ މެސެޖުތައް ފޯރުކޮށްދިނުމާއި، އިސްލާމްދީނުގެ މެދުމިނުގެ އުސޫލުތައް މުޅި ދުނިޔެއަށް ހާމަކޮށްދިނުމެވެ.

ޝައިޚް އަލް-ސުދައިސް ވިދާޅުވީ، މި ތަރުޖަމާގެ މަސައްކަތަކީ އިސްލާމްދީނާއި މުސްލިމުންގެ ޚިދުމަތުގައި ސައުދީ އަރަބިއްޔާއިން ދެމިއޮތް މިންވަރު ހާމަކޮށްދޭ ކަމެއް ކަމަށާއި، މިއީ ޙައްޖުވެރިންނަށް އެ ޤައުމުގެ ލީޑަޝިޕުން ބަހައްޓަވާ ޚާއްޞަ އަޅާލުން ރަމްޒުކޮށްދޭ ކަމެއް ކަމަށެވެ. އަދި ޒަމާނީ ޓެކްނޮލޮޖީއާއި ޑިޖިޓަލް ވަސީލަތްތަކުގެ އެހީގައި، ޙައްޖު މޫސުމުގެ މުހިންމުކަން ބައިނަލްއަޤްވާމީ ފެންވަރުގައި އިތުރަށް ފުޅާކުރުމަށް މިކަމުގެ ސަބަބުން އެހީތެރިވެދޭނެ ކަމަށްވެސް އޭނާ ފާހަގަކުރެއްވިއެވެ.

"ޢަރަފާތް ޚުތުބާ ތަރުޖަމާ ކުރުމުގެ މަޝްރޫޢަކީ ގިނަ އަހަރުތަކެއްގެ ތަޖުރިބާގެ މައްޗަށް ބިނާކޮށް، ދީނީ ކަންކަމާ ބެހޭ ރިޔާސަތުން ކުރިއަށްގެންދާ އެންމެ މުހިންމު އެއް މަސައްކަތް. މީގެ ސަބަބުން ދުނިޔޭގެ އެކި ބަސްބަހުން ދީނީ މަޢުލޫމާތު މުއްސަނދިވެގެންދާނެ،" ޝައިޚް ސުދައިސް ވިދާޅުވިއެވެ. މީގެ އިތުރުން، މި އިސްނެގުމުގެ ސަބަބުން ޢަރަބި ބަސް ނޭނގޭ މުސްލިމުންނަށްވެސް ޚުޠުބާގައި ހިމެނޭ ރޫޙާނީ އަދި އިންސާނީ މެސެޖުތަކުން ފައިދާ ހޯދުމުގެ ފުރުޞަތު ލިބިގެންދާނެ ކަމަށް އޭނާ ވިދާޅުވިއެވެ.

އަލް-ސުދައިސް އިތުރަށް ފާހަގަކުރެއްވި ގޮތުގައި، މި ޚުޠުބާ އެންމެ ފުރިހަމަ ގޮތުގައި އަދި އެންމެ މަތީ ފެންވަރުގައި ދުނިޔޭގެ ވީހާވެސް ގިނަ ބަޔަކަށް ފޯރުކޮށްދިނުމަށްޓަކައި، އެ އިދާރާގެ ފަންނީ އަދި މީޑިއާ ވަސީލަތްތަކުގެ އިތުރުން ޚާއްޞަ މާހިރުންގެ ޓީމުތައް މިހާރު ވަނީ ތައްޔާރުކޮށްފައެވެ.