ހުސްވި ޖުމާދަލްއާޚިރާ މަހުގައި 68.7 މިލިއަން މީހުން ކަޢުބަތުﷲ ގެފުޅަށާއި މަސްޖިދުއް ނަބަވީ އަށް ޒިޔާރަތްކޮށްފައިވެއެވެ. މަސްޖިދުލް ހަރާމަށް 30 މިލިއަން އަދި މަސްޖިދުއް ނަބަވީ އަށް 23.1 މިލިއަން މީހުން ޒިޔާރަތްކޮށްފައިވާއިރު، އެ މަހު ޢުމްރާ އަދާކުރި މީހުންގެ ޢަދަދު 11.9 މިލިއަނަށް އަރައިފައިވޭ.
މަދީނާގައި ހުންނަ މަސްޖިދުލް ނަބަވީ
ހުސްވި ޖުމާދަލްއާޚިރާ މަހުގެ ތެރޭގައި 68.7 މިލިއަން މީހުން ކަޢުބަތުﷲ ގެފުޅަށާއި މަސްޖިދުއް ނަބަވީ އަށް ޒިޔާރަތްކޮށްފި ކަމަށް ސައުދީ ސަރުކާރުން ހާމަ ކޮށްފި އެވެ. މި ޢަދަދަކީ އޭގެ ކުރީ މަހާ އަޅައިބަލާއިރު 2.1 މިލިއަން މީހުންގެ އިތުރުވުމެކެވެ.
ހުރުމަތްތެރިވެގެންވާ ދެ މިސްކިތުގެ ކަންކަން ބެލެހުއްޓުމާ ބެހޭ އިދާރާ އާ ހަވާލާދީ ސައުދީ މީޑިއާ އިން ރިޕޯޓު ކޮށްފައިވާ ގޮތުގައި، ހުސްވި މަހުގެ ތެރޭގައި ގާތްގަނޑަކަށް 30 މިލިއަން އަޅުވެރިން މަސްޖިދުލް ހަރާމަށް ޒިޔާރަތްކޮށްފައިވެއެވެ. މީގެ ތެރޭގައި 94,700 މީހުން ޙިޖުރު އިސްމާޢީލް ގައި ނަމާދުކޮށްފައިވެއެވެ. އަދި މަސްޖިދުއް ނަބަވީ އަށް 23.1 މިލިއަން މީހުން ޒިޔާރަތްކޮށްފައިވާއިރު، މަސްޖިދުއް ނަބަވީގައިވާ ރައުޟަތުއް ޝަރީފަށް 1.3 މިލިއަން މީހުން ޒިޔާރަތްކޮށްފައިވެއެވެ. މީގެ އިތުރުން 2.3 މިލިއަން މީހުން ކީރިތި ރަސޫލާ އަށް ޒިޔާރަތް ކޮށްފައިވެއެވެ.
ޙައްޖާ އަދި ޢުމްރާ އާ ބެހޭ ވުޒާރާ އާއި ހުރުމަތްތެރިވެގެންވާ ދެ މިސްކިތުގެ ކަންކަން ބެލެހެއްޓުމާބެހޭ ޢާންމު އިދާރާ އިން ހާމަކޮށްފައިވާ ގޮތުގައި، ޖުމާދަލްއާޚިރާ މަހު އެކަނިވެސް ސަޢޫދީ ޢަރަބިއްޔާގެ އެތެރެއިންނާއި ބޭރުން ޢުމްރާގެ އަޅުކަން އަދާކުރި މީހުންގެ ޖުމްލަ ޢަދަދު 11.9 މިލިއަނަށް އަރައެވެ.
މި ތަފާސްހިސާބުތަކުން ދައްކާ ގޮތުގައި، ޖުމާދަލްއާޚިރާ މަހު އެކަނިވެސް ސަޢޫދީ ޢަރަބިއްޔާގެ ބޭރުން އައި ޢުމްރާވެރިންގެ ޢަދަދު 1.7 މިލިއަނަށް ވުރެ އިތުރެވެ.
ކަޢުބަތުﷲ ގެފުޅަށާއި މަސްޖިދުއް ނަބަވީ އަށް ޒިޔާރަތް ކުރާ މީހުންނަށް ފޯރުކޮށްދޭ ޚިދުމަތްތަކުގެ ފެންވަރު ރަނގަޅުކުރުމަށް ގިނަ މަސައްކަތްތަކެއް ސައުދީ ސަރުކާރުން ގެންދަނީ ކުރަމުންނެވެ. ޒިޔާރާތް ކުރާ މީހުންނަށް ލުއިފަސޭހަ އަދި އިތުބާރު ހުރި ތަޖުރިބާއެއް ހޯދައިދިނުމަށް ޑިޖިޓަލް އަދި އޮޕަރޭޝަނަލް ނިޒާމުތައް ވެސް ގެންދަނީ ތަރައްގީ ކުރަމުންނެވެ.
