ކައުބަތުﷲ ގެފުޅު ދޮވުމުގެ އަހަރީ ރަސްމިއްޔާތު ބާއްވާފައި
1 ޖުލައި 2026 | ބުދަ 09:34ހިޖުރީ ސަނަތުން ކޮންމެ އަހަރަކުވެސް މުޙައްރަމް މަހުގެ 15 ވަނަ ދުވަހު ބާއްވާ ކައުބަތުﷲ ގެފުޅު ދޮވުމުގެ އަހަރީ ރަސްމިއްޔާތު، މިއަހަރު މައްކާގެ ޑެޕިއުޓީ ގަވަރުނަރު އަމީރު ސައުދު ބިން މިޝްޢަލްގެ އިސްވެ ހުންނަވާ ކުރިއަށް ގެންގޮސްފި. ފިނިފެންމަލުގެ ފެނާއި މޮޅު އޫދުގެ ވަސް ދުވާ މިކްސްޗަރަކާ އެކުލެވޭ ޒަމްޒަމް ފެން ބޭނުންކޮށްގެން ގެފުޅުގެ އެތެރޭގެ ފާރުތަކާއި ތަޅުންގަނޑު ދޮވެ ސާފުކުރި މި ރަސްމިއްޔާތުގައި، ސައުދީ ސަރުކާރުގެ އިސްވެރިންނާއި އިސްލާމީ ގައުމުތަކުގެ ސަފީރުން ބައިވެރިވެވަޑައިގެންނެވި.
ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާން އަލް ސައުދު، 2022 ވަނަ އަހަރުގެ އޯގަސްޓް މަހުގެ 16 ވަނަ ދުވަހު މައްކާގައި ބޭއްވި ކައުބަތުﷲ ގެފުޅު ދޮވުމުގެ ރަސްމިއްޔާތުގައި ބައިވެރިވެވަޑައިގަންނަވަނީ. | ގެޓީ އިމޭޖަސް
ކައުބަތުﷲ ގެފުޅު ދޮވުމުގެ އަހަރީ ރަސްމިއްޔާތު، އެކަމުގެ ފުރަތަމަ މަރުހަލާ ކަމުގައިވާ ގެފުޅުގެ ދޮރުކޮޅު ނިވާކޮށްފައިވާ ފަރުދާ އުފުލުމާއެކު އަންގާރަ ދުވަހު ފަށައިފި އެވެ.
ސައުދީ ޕްރެސް އެޖެންސީން ރިޕޯޓްކޮށްފައިވާ ގޮތުގައި، ކޮންމެ އަހަރަކުވެސް ހިޖުރީ ސަނަތުން މުޙައްރަމް މަހުގެ 15 ވަނަ ދުވަހު ބާއްވާ މި ރަސްމިއްޔާތަކީ، އިސްލާމްދީނުގެ އެންމެ މުުޤައްދަސް ބިނާއާ ގުޅިފައިވާ އެންމެ ދުވަސްވީ އާދަކާދަތަކުގެ ތެރެއިން ހިމެނޭ ކަމެކެވެ.
މަސްޖިދުލް ޙަރާމް އަދި މަސްޖިދުއް ނަބަވީގެ ކަންކަން ބަލަހައްޓާ ޖެނެރަލް އޮތޯރިޓީން ހާމަކުރި ގޮތުގައި، މި ރަސްމިއްޔާތަކީ ގެފުޅު ބެލެހެއްޓުމަށް ސައުދީ ސަރުކާރުން ދޭ އަހައްމިއްޔަތު ރަމްޒުކޮށްދޭ ކަމެކެވެ. މިއީ ކިންގް އަބްދުލްއަޒީޒްގެ ރަސްކަމުން ފެށިގެން، މިހާރުގެ ރަސްގެފާނު ސަލްމާން ބިން އަބްދުލްއަޒީޒް ގެ ޒައާމަތުގައިވެސް މެދުކެނޑުމެއް ނެތި ކުރިއަށްދާ މުހިންމު ކަމެކެވެ.
ރަސްގެފާނު ސަލްމާން ބިން އަބްދުލްއަޒީޒްގެ ފަރާތްޕުޅުން، ގެފުޅު ދޮވުމުގެ ރަސްމިއްޔާތު އިސްވެ ހުންނަވައި ކުރިއަށް ގެންދެވީ މައްކާ ސަރަހައްދުގެ ޑެޕިއުޓީ ގަވަރުނަރު، އަމީރު ސައުދު ބިން މިޝްޢަލް ބިން އަބްދުލްއަޒީޒެވެ.
އަމީރު ސައުދު ވަނީ ފިނިފެންމަލުގެ ފެނާއި މޮޅު އޫދުގެ ވަސް ހިމެނޭ މިކްސްޗަރަކާއި ޒަމްޒަމް ފެން ބޭނުންކުރައްވައިގެން ގެފުޅުގެ އެތެރޭގެ ފާރުތައް ދޮންނަވާފަ އެވެ.
މި ރަސްމިއްޔާތުގެ ތެރެއިން ގެފުޅުގެ އެތެރޭގައި ހުންނަ ތިން ތަނބާއި ތަޅުންގަނޑު ދޮވުމުގެ އިތުރުން، ގެފުޅުގައި ބޭނުންކުރާ ފޮތިތައްވެސް މި ހާއްސަ ފެނުން ތެންމަ އެވެ. އަދި މަސްޖިދުލް ޙަރާމްގައި ހިމެނޭ މި މުޤައްދަސް ބިނާގެ އެތެރޭގެ ފާރުތަކުގައި ހުވަނދުލައި، ހިއްކުމަށްފަހު، އަހަރީ ދޮވުމުގެ ރަސްމިއްޔާތު ނިންމާލަ އެވެ.
މި އަހަރީ ރަސްމިއްޔާތުގައި ސައުދީ ސަރުކާރުގެ އިސްވެރިންނާއި، ސައުދީ އަރަބިއްޔާގައި ތިއްބަވާ އިސްލާމީ ގައުމުތަކުގެ ސަފީރުންނާއި، ގެފުޅުގެ ތަޅުދަނޑި ބަލަހައްޓާ ފަރާތްތަކުން ބައިވެރިވެވަޑައިގެންނެވި އެވެ.
ގެފުޅު ބަލަހައްޓާ އޮތޯރިޓީން ބުނި ގޮތުގައި، މި ރަސްމިއްޔާތަށް ބޭނުންވާ ތައްޔާރީތައް ފުރިހަމަކުރުމަށްޓަކައި އެ އިދާރާގެ ޓެކްނިކަލް، ސާވިސް އަދި އިންޖިނިއަރިންގ ޓީމުތަކުން ވަނީ ހަރަކާތްތެރިވެފަ އެވެ.
ކޮންމެ އަހަރަކު ބާއްވާ މި ރަސްމިއްޔާތުން ދައްކުވައިދެނީ މުސްލިމުންގެ ހިތްތަކުގައި ގެފުޅަށް އޮތް މަތިވެރި ގަދަރާއި އިހުތިރާމެވެ.
