ޙިޖްރު އިސްމާޢީލަށް ޒިޔާރަތް ކުރުމަށް ފިރިހެނުންނާއި އަންހެނުންނަށް ވަކި ވަގުތުތަކެއް ކަނޑައަޅައިފި
ގެފުޅާ އިންވެގެން އޮންނަ ޙިޖްރު އިސްމާޢީލަށް ޒިޔާރަތްކުރުމަށް އަންހެނުންނަށް ކަނޑައަޅާފައިވަނީ ކޮންމެ ދުވަހަކު ހެނދުނު 6:00 އިން 9:00 އަށް. ފިރިހެނުންނަށް އެ ފުރުޞަތު އޮންނާނީ ކޮންމެ ދުވަހެއްގެ ރޭގަނޑު 10:00 އިން ދަންވަރު 1:00 އަށް. މި ބަދަލަކީ ޙަރަމްފުޅަށް ޒިޔާރަތްކުރާ ފަރާތްތަކަށް އަޅުކަންކުރުމުގައި ލުއިފަސޭހަކޮށްދީ، މީހުންގެ ހަރަކާތްތައް ތަރުތީބުކުރުމަށް ގެނައި ބަދަލެއް ކަމަށް ބުނޭ.
ހައްޖުގެ އަޅުކަމަށް ތައްޔާރުވުމުގެ ގޮތުން، ދުނިޔޭގެ އެކި ގައުމުތަކުން މައްކާ އަށް ޖަމާވި މުސްލިމުން 2026 މޭ 20 ވީ ބުދަ ދުވަހު މަސްޖިދުލް ހަރާމްގައި ތަވާފުކުރަނީ. | ގެޓީ އިމޭޖަސް
ކައުބަތުﷲ ގެފުޅާ އިންވެގެން އޮންނަ ޙިޖްރު އިސްމާޢީލް ނުވަތަ ޙަޠީމަށް ޒިޔާރަތްކުރުމަށް ފިރިހެނުންނާއި އަންހެނުންނަށް ވަކި ޚާއްޞަ ވަގުތުތަކެއް ކަނޑައަޅައި ސައުދީ ސަރުކާރުން އެކަން އިޢުލާންކޮށްފިއެވެ.
މަސްޖިދުލް ޙަރަމް އަދި މަސްޖިދުއް ނަބަވީގެ ކަންކަން ބަލަހައްޓާ ޖެނެރަލް އޮތޯރިޓީން، ހާމަކޮށްފައިވާ ގޮތުގައި، ކޮންމެ ދުވަހަކުވެސް ހެނދުނު 6:00 އިން 9:00 އަށް އަންހެނުންނަށް ޙިޖްރު އިސްމާޢީލަށް ވަނުމުގެ ފުރުޞަތު އޮންނާނެއެވެ. އަދި ފިރިހެނުންނަށް ޙަޠީމަށް ވަނުމަށް ކަނޑައަޅާފައިވަނީ ކޮންމެ ދުވަހެއްގެ ރޭގަނޑު 10:00 އިން ފެށިގެން ދަންވަރު 1:00 އަށެވެ.
މި ވަގުތުތައް ކަނޑައަޅާފައިވަނީ މަސްޖިދުލް ޙަރަމްގެ ތެރޭގައި މީހުންގެ ހަރަކާތްތައް ތަރުތީބުކޮށް، އަޅުކަންކުރާ ފަރާތްތަކަށް ދޭ ޚިދުމަތްތައް އިތުރަށް ފުރިހަމަކުރުމަށް އެ އޮތޯރިޓީން ކުރަމުންދާ މަސައްކަތްތަކުގެ ދަށުން ކަމަށް ބުނެފައިވެއެވެ. އެ އިދާރާއިން ބުނި ގޮތުގައި މިގޮތަށް ވަގުތުތައް ބަހާލުމުގެ މަޤްޞަދަކީ، އަޅުކަންކުރުމަށް ފަސޭހަކޮށްދިނުމާއި، މީހުންގެ ހަރަކާތްތައް އޮމާންކަމާއެކު ކުރިއަށް ގެންދިއުމުގެ އިތުރުން، ޙަރަމްފުޅަށް ޒިޔާރަތްކުރާ ފަރާތްތަކަށް ރަނގަޅު ތަޖުރިބާއެއް ފޯރުކޮށްދިނުމެވެ.
ޙިޖްރު އިސްމާޢީލް ނުވަތަ ޙަޠީމް ހުންނަނީ ކައުބަތުﷲ ގެފުޅުގެ އުތުރު ފަރާތުގައެވެ. މިއީ މަސްޖިދުލް ޙަރަމްގެ ތެރޭގައި ވަރަށް ޚާއްޞަ މަޤާމެއް ދެވިފައިވާ ތަނެކެވެ. ބަލާބެލުމަށް އާދައިގެ ތަނެއްގެ ގޮތުގައި ފެނުނު ނަމަވެސް، މި ސަރަޙައްދަކީ ކައުބަތުﷲ ގެފުޅު ބިނާކުރުމާއި މައްކާގެ ތާރީޚީ އެކި ދުވަސްވަރުގެ މުހިންމު ހާދިސާތަކާ ގުޅިފައިވާ، މުއްސަނދި ތާރީޚެއް އޮތް ތަނެކެވެ.
ޙިޖްރު އިސްމާޢީލަކީ ގެފުޅުގެ ބިނާގެ ބައެއްގެ ގޮތުގައި ބެލެވޭ ތަނެކެވެ. ތާރީޚީ މަޞްދަރުތަކުން އެނގޭ ގޮތުގައި، އިބްރާހީމްގެފާނާއި އެކަލޭގެފާނުގެ ދަރިކަލުން އިސްމާޢީލްގެފާނު ގެފުޅުގެ ބިންގާ އެޅުއްވިއިރު، މި ސަރަޙައްދު ހިމެނިފައިވަނީ ގެފުޅުގެ އަސްލު ބިނާގެ ތެރޭގައެވެ. ނަމަވެސް، މުޙައްމަދުގެފާނު ނަބީކަމާއިގެން ފޮނުއްވުމުގެ ކުރިން ޤުރައިޝްވަންހައިގެ މީހުން ގެފުޅު އަލުން ބިނާކުރިއިރު، މާލީ ތަނަވަސްކަން ހުރި ގޮތުން މި ބައި ވަނީ ބިނާގެ ބޭރުގައި ބާއްވާފައެވެ. އެހެންކަމުން، މިހާރު ގެފުޅު ފެންނަން ހުރި ބިނާގެ ބަޔަކީ އެ ދުވަސްވަރު ޤުރައިޝްވަންހައިގެ މީހުން ބިނާކުރި މިންވަރެވެ.
