ކައުބަތުﷲގެފުޅުގެ އާ އުރަކޮޅު އަޅުވައިފި

މިއަހަރުގެ އިސްލާމީ އާ އަހަރު ފެށުމާ ދިމާކޮށް، މުގައްދަސް ކައުބަތުﷲ ގެފުޅުގެ އާ އުރަކޮޅު (ކިސްވާ) ބަދަލުކުރުމުގެ މަސައްކަތް ކުރިއަށް ގެންގޮސްފިއެވެ. އިސްލާމްދީނުގެ އެންމެ މުގައްދަސް ބިނާގައި އާ އުރަކޮޅު އެޅުވުމުގެ މަސައްކަތް ކުރިއަށްދިޔައީ އަންގާރަ ދުވަހުގެ ހެނދުނު، 1448 ވަނަ އަހަރުގެ މުހައްރަމް މަހުގެ ފުރަތަމަ ދުވަހުއެވެ.

މަސްޖިދުލް ހަރާމް އަދި މަސްޖިދުއް ނަބަވީގެ ކަންކަން ބަލަހައްޓާ ޖެނެރަލް އޮތޯރިޓީގެ ދަށުން ހިންގާ ކިންގް އަބްދުލްއަޒީޒް ކޮމްޕްލެކްސް ފޯ ދަ ހޮލީ ކައުބާ ކިސްވާ އިން ވަނީ ހޯމަ ދުވަހުގެ ރޭ، އުރަކޮޅު ބަދަލުކުރުމުގެ މަސައްކަތް ފަށާފައެވެ. މިގޮތުން ކައުބަތުﷲ ގެފުޅުގެ އުރަކޮޅު ބަދަލުކުރުމުގައި ކޮންމެ އަހަރަކު އަމަލުކުރާ އުސޫލުގެ މަތިން، އުރަކޮޅުގައި ހަރުކޮށްފައިވާ ރަނާއި ރިހީގެ ފަށްތަކާއި، ޒީނަތްތެރިކުރުމަށް ބޭނުންކޮށްފައިވާ ތަކެއްޗާއި، ބޮކިތަކުގެ އިތުރުން ގެފުޅުގެ ދޮރުކޮޅުގެ ފަރުދާ ތިރިކުރުމުގެ މަސައްކަތް ވަނީ ފަށާފައެވެ.

އާ އުރަކޮޅު ކޮމްޕްލެކްސް އިން މަސްޖިދުލް ހަރާމަށް ގެންދިއުމުގެ މަސައްކަތް ކުރިއަށްދަނީ ބައިނަލްއަގުވާމީ އެންމެ މަތީ މިންގަނޑުތަކަށް ފެތޭ ފުރިހަމަ ނިޒާމެއްގެ ދަށުންނެވެ. ކުޅަދާނަ ފަންނުވެރިން ހިމެނޭ ސައުދީ އަރަބިއްޔާގެ ހާއްސަ ޓީމަކުން މި މަސައްކަތް ސުޕަވައިޒް ކުރަމުންދާއިރު، މީގެ ތެރޭގައި ބާ އުރަކޮޅު ނެގުމާއި، ރަނުން ޖަރީކޮށްފައިވާ ބައިތައް ވަކިކުރުމާއި، އަދި އާ އުރަކޮޅު އެޅުވުމުގެ މަސައްކަތް ހިމެނެއެވެ.

ގެފުޅުގެ އުރަކޮޅު ތައްޔާރުކުރުމަށް އެންމެ ފެންވަރު ރަނގަޅު ސާމާނު ބޭނުންކުރެއެވެ. މީގެ ތެރޭގައި 825 ކިލޯގެ ގުދުރަތީ ފަށުވި، ބޭރު ފަށަލައަށް ބޭނުންވާ ކަޅު ފަށުވީގެ 47 ރޯލު، އެތެރެ ފަށަލައަށް ބޭނުންވާ 400 ކިލޯގެ ކަފަ، ޖަރީކުރުމަށް ބޭނުންވާ 60 ކިލޯގެ ސާފު ރިހި، އަދި ގުރުއާނުގެ އާޔަތްތަކާއި ކުރެހުންތައް ފަރުމާކުރުމަށް ބޭނުންވާ ރަންލާފައިވާ 120 ކިލޯގެ ރިހި ހިމެނެއެވެ.

މި ތަކެތީގެ ފެންވަރު ހިފެހެއްޓުމަށާއި މޫސުމީ އެކި ބަދަލުތަކަށް ކެތްކުރާ މިންވަރު ދެނެގަތުމަށްޓަކައި، ކޮމްޕްލެކްސްގެ ލެބޯޓްރީތަކުގައި ވަރުގަދަ ޓެސްޓުތަކެއް ހަދައެވެ. ޕްރިންޓްކުރުމުގެ މަރުހަލާގައި، ގުރުއާނުގެ އާޔަތްތަކާއި އިސްލާމީ ކުރެހުންތައް ފޮއްޗަށް ބަދަލުކުރެވެނީ އެއަށްފަހު ކުރެވޭ އެމްބްރޮއިޑަރީ މަސައްކަތަށް ތައްޔާރުވުމުގެ ގޮތުންނެވެ. މި އާޔަތްތަކާއި ކުރެހުންތައް ރަނާއި ރިހީގެ ރޮދިން ފަރުމާކުރަނީ ސައުދީގެ ފަންނުވެރިކަމުގެ މަތީ މިންގަނޑުތައް ދައްކުވައިދޭ ފަދަ ފުރިހަމަ އުކުޅުތައް ބޭނުންކޮށްގެންނެވެ.

ހާއްސަ ހުނަރާއި ފަރުވާތެރިކަން ބޭނުންވާ ބައިތައް ތައްޔާރުކުރުމުގައި އަދިވެސް ބޭނުންކުރަނީ އަތުން ވިޔުމުގެ މަސައްކަތެވެ. ސައުދީގެ ފަންނުވެރިން ދަނީ ގެފުޅުގެ އުރަކޮޅުގެ ތާރީހީ އަދި ފަންނީ ރީތިކަން ދެމެހެއްޓުމަށް ބޮޑު ހިއްސާއެއް ވަމުންނެވެ. އުރަކޮޅު ތައްޔާރުކުރުމުގެ ހުރިހާ މަރުހަލާއެއް ނިމުމުން، ހުރިހާ ބައިތަކެއް އެއްކޮށް ގުޅުވާލައި، ކައުބަތުﷲ ގެފުޅުގައި އެޅުވުމަށް ފުރިހަމަ އުރަކޮޅެއް ތައްޔާރުކުރެވެއެވެ. މި މުޅި މަސައްކަތް ކުރިއަށްދަނީ ތަޖުރިބާކާރު ފަންނީ މާހިރުންގެ ބެލުމުގެ ދަށުންނެވެ.

އުރަކޮޅު އުފެއްދުމުގެ ހަތް މަރުހަލާ ކަމަށްވާ ކުލަޖެއްސުން، މެޝިނުން ވިޔުން، ލެބޯޓްރީގައި ޓެސްޓުކުރުން، ޕްރިންޓްކުރުން، އެމްބްރޮއިޑަރީ ނުވަތަ ޖަރީކުރުން، އަތުން ވިޔުން އަދި އެއްކޮށް ގުޅުވާލުމުގެ މަސައްކަތަކީ ފެންވަރު ރަނގަޅު ފަންނުވެރިކަމުގެ ނަމޫނާއެކެވެ. އެންމެ މަތީ ފެންވަރުގެ ސާމާނާއި ފަރުވާތެރި މަސައްކަތްތެރިކަން އެއްކޮށްލައިގެން ތައްޔާރުކުރާ މި އުރަކޮޅަކީ، ކައުބަތުﷲ ގެފުޅުގެ މަތިވެރިކަމާއި މަސްޖިދުލް ހަރާމްގެ މުގައްދަސްކަމާ އެކަށީގެންވާ ފަދަ ފުރިހަމަ އުފެއްދުމެކެވެ.

މި މަސައްކަތްތަކުގެ ތެރެއިން ސައުދީ އަރަބިއްޔާއިން ދަނީ ގައުމީ ފަންނުވެރިންނާއި ޒަމާނީ ޓެކްނޮލޮޖީ ބޭނުންކޮށްގެން، އިސްލާމީ މި މުހިންމު ތަރިކަ ރައްކާތެރިކަމާއެކު ދަމަހައްޓަމުންނެވެ. ވޭތުވެދިޔަ ގަރުނެއްހާ ދުވަހު، ކޮންމެ އަހަރަކު ގެފުޅުގެ އުރަކޮޅު ގެންދަނީ ބަދަލު ކުރަމުންނެވެ.