1.7 މިލިއަން ހައްޖުވެރިން ހައްޖުގެ އަޅުކަން ފުރިހަމަކޮށްފި
ދުނިޔޭގެ 165 ގައުމަކުން 1.7 މިލިއަނަށްވުރެ ގިނަ މީހުން ބައިވެރިވި މިއަހަރުގެ ހައްޖުގެ އަޅުކަން، ވަދާއީ ތަވާފަށްފަހު ގިނަ ބަޔަކު މިހާރު ވަނީ އެނބުރި ގައުމަށް ދިއުމަށް ދަތުރު ފަށާފައި. ގަދަ ހޫނުގެ ސަބަބުން ސިއްހީ ގޮންޖެހުންތަކެއް ކުރިމަތިވި ނަމަވެސް، ސައުދީ ސަރުކާރުން ވަނީ ހައްޖުވެރިންނަށް ބޭނުންވާ ރައްކާތެރިކަމާއި ސިއްހީ އެހީތެރިކަން ފޯރުކޮށްދިނުމަށް ހާއްސަ ފިޔަވަޅުތަކެއް އަޅާފައި. މި އަހަރުގެ ހައްޖުގެ އަޅުކަން ނިންމާލި ގިނަ ހައްޖުވެރިން ފާހަގަކުރި ގޮތުގައި، މިއީ އެމީހުންގެ ހަޔާތުގައި އައި އެންމެ އުފާވެރި އަދި މުހިންމު ދީނީ ތަޖުރިބާ.
ސައުދީ އަރަބިއްޔާގެ މިނާގައި ކުރިއަށްދާ އަހަރީ ހައްޖުގެ އަޅުކަމުގެ ތެރެއިން، ޖަމްރާއަށް ހިލަ އުކުމުގެ ދެވަނަ ދުވަހުގެ ހަރަކާތްތަކުގައި މުސްލިމް ހައްޖުވެރިން ބައިވެރިވަނީ - 28 މޭ 2026. | ރޮއިޓާސް
މިއަހަރުގެ ހައްޖުގެ އަޅުކަން ފުރިހަމަކުރުމަށްފަހު، އެތައް ހާސް މުސްލިމުންނެއް ހުކުރު ދުވަހު މައްކާގެ ބިމުން ފުރަން ފަށައިފިއެވެ.
ދުނިޔޭގައި ބޭއްވޭ އެންމެ ބޮޑު ދީނީ އެއްވުންތަކުގެ ތެރޭގައި ހިމެނޭ މިއަހަރުގެ ހައްޖުގެ އަޅުކަމުގައި، ދުނިޔޭގެ 165 ގައުމަކުން 1.7 މިލިއަނަށްވުރެ ގިނަ މީހުން ބައިވެރިވެފައިވެއެވެ.
"އަޅުގަނޑަށް ހައްޖުގެ އަޅުކަން ފުރިހަމަކުރެވުނުކަން ގަބޫލުކުރަންވެސް ދަތި،" އަލަށް ހައްޖުގެ އަޅުކަން އަދާކުރި މިސްރުގެ އުމުރުން 37 އަހަރުގެ އަހުމަދު މަމްދޫހު ބުންޏެވެ.
އުފަލުން ލޮލުން ކަރުނަ އަންނަ ހާލުގައި އޭނާ އިތުރަށް ބުނީ، ހައްޖުގެ އެންމެހާ ކަންކަން އަމާންކަމާއެކު ނިންމާލެވުމުން ވަރަށް ބޮޑަށް އުފާވާ ކަމަށާއި، ހާއްސަކޮށް މިފަދަ ހޫނު މޫސުމެއްގައި ހައްޖުގެ އަޅުކަން އަދާކުރުމަކީ ވަރަށް ވަރުބަލިވާ ކަމެއް ކަމަށެވެ.
އަލްޖީރިއާގެ އުމުރުން 74 އަހަރުގެ ހައްޖުވެރިއެއް ކަމަށްވާ އަލް-ޒާވީ، އޭނާގެ އަނބިމީހާގެ ކޮނޑުގައި އަތް އަޅާލައިގެން ހުރެ ބުނީ، ދެމަފިރިން އެކުގައި ހައްޖުގެ އަޅުކަން އަދާކުރުމަކީ އަބަދުވެސް ދެކެމުން އައި ހުވަފެނެއް ކަމަށެވެ. އަދި ކައިވެންޏަށް 50 އަހަރު ފުރުނު ފަހުން މިއަދު އެ ހުވަފެން ހަގީގަތަކަށް ވެފައިވާ ކަމަށް އޭނާ ބުންޏެވެ.
ހުކުރު ދުވަހު ހައްޖުވެރިން ވަނީ މައްކާގެ އިރުދެކުނުން އޮންނަ މިނާގެ ވާދީގައި، ޝައިތާނާއަށް ރަމްޒީގޮތުން އުކާ ހިލަ އުކުމުގެ ތިންވަނަ ދުވަހުގެ ކަންކަން ފުރިހަމަކޮށްފައެވެ.
އެއަށްފަހު، ހައްޖުވެރިން ބަސްތަކުގައި މައްކާގެ މަސްޖިދުލް ހަރާމަށް ގޮސް، ވަދާއީ ތަވާފު ކުރާނެއެވެ. ވަދާއީ ތަވާފަކީ މުސްލިމުންގެ ގިބުލަ ކަމުގައިވާ ކައުބަތުﷲ ގެ ވަށައިގެން ހަތް ބުރު ޖެހުމެވެ.
ހައްޖުގެ އަޅުކަމަކީ އިސްލާމްދީނުގެ ފަސް ރުކުނުގެ ތެރެއިން އެއް ރުކުނެވެ. އަދި ކުޅަދާނަކަން ލިބިގެންވާ ކޮންމެ މުސްލިމަކު އުމުރުން އެއްފަހަރު މި އަޅުކަން އަދާކުރުން ވާޖިބުވެގެންވެއެވެ.
ސައުދީ އަރަބިއްޔާގެ ކަމާބެހޭ ފަރާތްތަކުން ފަހަކަށް އައިސް ވަނީ ހޫނުން ސަލާމަތްވުމަށްޓަކައި ހިޔާލިބޭނެ ގިނަ ސަރަހައްދުތަކެއް ގާއިމުކޮށް، ސިއްހީ އެހީތެރިންގެ އަދަދު އިތުރުކުރުން ފަދަ ފިޔަވަޅުތައް އަޅާފައެވެ.
ސައުދީ ރެޑް ކްރެސެންޓުން ބުރާސްފަތި ދުވަހު ހާމަކުރި ގޮތުގައި، ހައްޖު މޫސުން ފެށުނީއްސުރެ މިހާތަނަށް 83,000 އަށްވުރެ ގިނަ މީހުންނަށް ވަނީ ކުއްލި ސިއްހީ އެހީތެރިކަން ފޯރުކޮށްދީފައެވެ.
