ހައްޖު ހުތުބާގައި އުރެދުންތަކުން ދުރުހެލިވެ ތަގުވާވެރިވުމަށް ގޮވާލައިފި
މިއަހަރުގެ ހައްޖު ހުތުބާގައި، ހައްޖުގެ މަތިވެރި އަޅުކަމުގެ ތެރޭގައި ޒުވާބުކުރުމާއި ސިޔާސީ ޝިއާރުތައް ފާޅުކުރުން ފަދަ އަމަލުތަކުން ދުރުހެލިވުމަށް ހައްޖާޖީންނަށް ވަނީ ނަސޭހަތްތެރިވެފަ. ގިޔާމަތް ދުވަހުގެ ބިރުވެރިކަން ހަނދާންކޮށްދެއްވައި، ފާފަތަކުން އެއްކިބާވެ މާތްﷲއަށް ތަގުވާވެރިވުމަށާއި މުސްލިމުންގެ މެދުގައި އޮންނަ އުޚުއްވަތްތެރިކަން ވަރުގަދަކުރުމަށް ހުތުބާގައި ބާރުއަޅުއްވާފައިވޭ. ހަގީގީ ކާމިޔާބީއަކީ އިޚްލާޞްތެރިކަމާއެކު އަޅުކަންތައް އަދާކުރުންކަން ފާހަގަކުރައްވައި، އިރުއޮއްސުމާ ހަމައަށް އަރަފާތު ބިމުގައި ދުޢާކުރުމުގައި ދެމިތިބުމަށްވެސް އިލްތިމާސްކުރެއްވި.
ހައްޖުގެ އަޅުކަމަށް އަރަފާތު ބިމަށް ހައްޖާޖީން ޖަމާވެފަ. | ސޯޝަލް މީޑިއާ
ހައްޖުގެ މަތިވެރި އަޅުކަން އަދާކުރާއިރު އެންމެހައި އުރެދުންތަކުން ދުރުހެލިވެ، މާތްﷲއަށް ތަގުވާވެރިވުމަށް މިއަހަރުގެ ހައްޖު ހުތުބާގައި ގޮވާލައްވައިފި އެވެ.
ސައުދީ އަރަބިއްޔާގެ ނަމިރާ މިސްކިތުގައި މިއަހަރުގެ ހައްޖު ހުތުބާ އިއްވަވައިދެއްވީ ފަޟީލަތުއްޝައިޚް އަލީ ބިން އަބްދުއްރަޙްމާން އަލް ޚުޛައިފީ އެވެ.
ޝައިޚް އަލީ ބިން އަބްދުއްރަޙްމާން އަލް ޚުޛައިފީ އިއްވެވި ހުތުބާގައި ހައްޖުގެ އަޅުކަމުގެ އަދަބުތަކަށް އަލިއަޅުއްވާލައްވަމުން ވިދާޅުވީ، ހައްޖުގެ މަތިވެރި އަޅުކަމުގެ ތެރޭގައި އެންމެހައި އުރެދުންތަކުން ދުރުހެލިވާންޖެހޭ ކަމަށެވެ. ވަކިން ހާއްސަކޮށް ޒުވާބުކުރުމާއި، ސިޔާސީ ޝިއާރުތައް ފާޅުކުރުމާއި، ވަކި ފަރާތްތަކަށް ތާއީދުކޮށް ގޮވާލާ ގޮވާލުންތަކުން ދުރުހެލިވުމަށް ޝައިޚް ނަސޭހަތްތެރިވެވަޑައިގަތެވެ. މީގެ އިތުރުން މަސްޖިދުލްހަރަމްގެ މާތްކަން ފާހަގަކުރައްވައި، ނުބައި ކަމަކަށް ހިތުލައިގެން އެ ބިމަށް ހިނގައްޖެ މީހަކަށް ލިބޭނެ އުގޫބާތުގެ ނުރައްކާތެރިކަން ހުތުބާގައި ބަޔާންކޮށްދެއްވި އެވެ.
ހައްޖު ހުތުބާގައި ގިޔާމަތް ދުވަހުގެ ބިރުވެރިކަމުގެ މައްޗަށްވެސް އަލިއަޅުއްވާލެއްވި އެވެ. އެގޮތުން އެ ދުވަހުގެ ބިންހެލުމަކީ ބޮޑުވެގެންވާ ބިންހެލުމެއް ކަމާއި، އެ ދުވަހުގެ ބިރުވެރިކަމުގެ ސަބަބުން މާބަނޑު މީހުންގެ ބަނޑުގައިވާ ދަރި ވައްޓާލާފައި ދުވާނެ ކަމަށް ޝައިޚް ވިދާޅުވި އެވެ. އަދި މީސްތަކުން މަސްތުވެގެންވާ ބަޔަކު ފަދައިން، އާވާރާވެގެން ބިރުން ކޮޅުކޮޅަށް ދުވާނެކަން ހަނދާންކޮށްދެއްވައި، މާތްﷲއަށް ތަގުވާވެރިވެ ބިރުވެތިވުމަށް ނަސޭހަތްތެރިވެވަޑައިގަތެވެ.
މާތްﷲ އަށް ތަގުވާވެރިވުމުގައި ހިމެނޭ އެންމެ މުހިންމު އެއް ކަމަކީ ގިޔާމަތް ދުވަހަށް ތައްޔާރުވުން ކަމަށް ހުތުބާގައި ފާހަގަކުރެއްވި އެވެ. އެކަމަށްޓަކައި ފާފަތަކުން އެއްކިބާވެ، ހެޔޮ އަމަލުކުރުމާ އެކު އަޅުކަން މާތްﷲ އަށް ހާލިސްކުރުމަށް ހައްޖާޖީންނަށް އިލްތިމާސްކުރެއްވި އެވެ. ހަމައެހެންމެ، މުސްލިމުން ބައިބައިނުވުމަށާއި، ނުބައި ކަންތައްތަކުން ދުރުހެލިވެ އުޚުއްވަތްތެރިކަން ވަރުގަދަކުރުމަށް ހުތުބާގައި ބާރުއަޅުއްވާފައިވެ އެވެ. ހަޤީޤީ ކާމިޔާބީ އަކީ އިޚްލާޞްތެރިކަމާއި ﷲގެ އަމުރުފުޅުތަކަށް ކިޔަމަންތެރިވުންކަންވެސް ޝައިޚް ހަނދާންކޮށްދެއްވި އެވެ.
ޢަރަފާތް ދުވަހަކީ މީގެ ސާދަސަތޭކަ އަހަރު ކުރީން ކީރިތި ރަސޫލާ صلى الله عليه وسلم ކުރެއްވި ވަދާޢުގެ ޙައްޖު ހަނދާންކޮށްދޭ މަތިވެރި ދުވަހެކެވެ. ހައްޖު ހުތުބާއަށްފަހު، ހައްޖާޖީން ވަނީ މެންދުރު ނަމާދާއި އަސުރު ނަމާދު ޖަމްޢުކޮށް ގަޞްރުކޮށްފަ އެވެ. ހައްޖާޖީން މިއަދުގެ އިރުއޮއްސުމާ ހަމައަށް އަރަފާތު ބިމުގައި ތިބޭނީ އަޅުކަމާއި ދުޢާކުރުމުގަ އެވެ.
