ޗެފެރިންގެ ރުޅިގަނޑު ފަޅައިގެން ގޮސް، އިންފަންޓީނޯ ސިފަކުރެއްވީ ބަރަހަނާ ހާލުގައި ހުންނެވި ރަސްކަލެއްގެ ގޮތުގައި!

ޔުއެފާގެ ރައީސް އެލެކްސެންޑާ ޗެފެރިން، ފީފާގެ ރައީސް ޖިއާނީ އިންފަންޓީނޯ އަށް ވަރުގަދަ ހަމަލާތަކެއް އަމާޒު ކުރައްވައި، އިންފަންޓީނޯ އަކީ "ބަރަހަނާ ހާލުގައި ހުންނެވި ރަސްކަލެއް" ކަމަށް ސިފަކުރައްވައިފި އެވެ.

ޗެފެރިން މިމޭރުމުން ވާހަކަ ދެއްކެވީ ފީފާގެ ކޮމާޝަލް ރައިޓްސް ނުވަތަ ވިޔަފާރީގެ ހައްގުތަކުން ބައެއް އަމިއްލަ އިންވެސްޓަރުންނަށް ވިއްކާލުމަށް އިންފަންޓީނޯ ރޭއްވެވި މަޝްރޫއު ނާކާމިޔާބުވުމާ ގުޅިގެންނެވެ.

ޑެންމާކުގެ ކޯޕަންހޭގަންގައި އަންގާރަ ދުވަހު ބޭއްވި ޔޫރަޕިއަން ފުޓުބޯޅަ ކުލަބުތަކުގެ އާންމު މަޖިލީހުގައި ވާހަކަ ދައްކަވަމުން ޗެފެރިން ވަނީ، މަޝްހޫރު ވާހަކަ ލިޔުންތެރިޔާ ހޭންސް ކްރިސްޓިއަން އެންޑަސަންގެ "ދަ އެމްޕަރާސް ނިއު ކްލޯތްސް" ނުވަތަ ރަސްކަލެއްގެ އައު ހެދުން، މި ވާހަކަ އަށް އިޝާރާތް ކުރައްވާފަ އެވެ.

އޭނާ ވިދާޅުވީ އިންފަންޓީނޯގެ "ފީފާ ފޯވާޑް އެންޓަޕްރައިޒް" މަޝްރޫއު ދިފާއުކުރުމަށް ފީފާ އިން ބޭނުންކުރި ބަސްމަގަކީ ހަގީގަތް އޮޅުވާލުމަށް ބޭނުންކުރި ބަސްތަކެއް ކަމަށެވެ.

ޗެފެރިން ވިދާޅުވީ ގާތްގަނޑަކަށް 200 އަހަރު ކުރިން ލިޔެފައިވާ އެ ވާހަކައިގައިވާ ފަދައިން، ރަސްކަލަކަށް ވަރަށް ރީތި ހެދުމެއް ލެވިފައިވާ ކަމަށް ޤަބޫލު ކުރެވުނު ނަމަވެސް، ހަގީގަތުގައި އޭނާ ހުރީ ބަރަހަނާ ހާލުގައި ކަމަށެވެ. އަދި ކުޑަކުއްޖަކު އެ ހަގީގަތް ހާމަކުރަންދެން އެންމެން ވެސް ތިބީ އެކަން ޤަބޫލުކޮށްގެން ކަމަށް އޭނާ ފާހަގަކުރެއްވި އެވެ.

އިންފަންޓީނޯގެ ހުށަހެޅުމަކީ ފީފާގެ ބާރުގެ ދަށުގައި އޮންނަ ކުންފުންޏެއް އުފައްދައި، ދުނިޔޭގެ ތަށިތަކާއި، ކުލަބު ވޯލްޑް ކަޕް ފަދަ މުބާރާތްތަކުގެ ވިޔަފާރީގެ ހައްގުތަކުގެ 20 އިންސައްތަ އަމިއްލަ އިންވެސްޓަރުންނަށް ވިއްކާލުމެވެ.

މި މަޝްރޫއަކީ ފުޓުބޯޅަ ކުރިއެރުވުމަށް ފައިސާ ހޯދުމަށް ކުރާ ކަމެއް ކަމަށާއި، މިއީ ޑިމޮކްރެޓިކް އުސޫލުން 211 މެންބަރު ޤައުމާ މަޝްވަރާކޮށްގެން ކުރާ ކަމެއް ކަމަށް އިންފަންޓީނޯ ވިދާޅުވި ނަމަވެސް، ގިނަ ބައެއްގެ ދެކޮޅުވެރިކަމާ ހެދި އެންމެ ފަހުން އެ މަޝްރޫއު ވަނީ ހުއްޓާލާފަ އެވެ. ޗެފެރިން ވިދާޅުވީ "ކުރިއެރުވުން"، "ޑިމޮކްރަސީ" އަދި "މަޝްވަރާ" ފަދަ ރީތި ބަސްތައް ބޭނުންކުރި ނަމަވެސް، ހަގީގަތުގައި ކަންކަން ހިނގާފައިވަނީ އޭގެ އިދިކޮޅަށް ކަމަށެވެ.

ފުޓުބޯޅައިގެ މުސްތަޤުބަލުން ބައެއް ވިއްކާލުމަކީ "ކުރިއެރުވުން" ކަމަށް ނުވާނެ ކަމަށާއި، އަދި ޤައުމީ އެސޯސިއޭޝަންތަކަށް އެންގުމެއް ނެތި ކަންކަން ނިންމުމަކީ "ޑިމޮކްރަސީ" ނޫން ކަމަށް ޗެފެރިން ވިދާޅުވި އެވެ. މީގެ އިތުރުން ސިއްރުން ކަންކަން ކުރުމަކީ "މަޝްވަރާ" ކުރުން ނޫން ކަމަށް ވެސް އޭނާ ފާހަގަކުރެއްވި އެވެ.

ކުލަބުތަކުގެ އިސްވެރިންނާ މުޚާތަބު ކުރައްވަމުން ޗެފެރިން ވިދާޅުވީ، ކުލަބެއްގެ އިސް އޮފިޝަލަކު ބޯޑަށް ނޭނގި ކުލަބުގެ އެންމެ އަގުބޮޑު މިލްކިއްޔާތުތައް ސިއްރުން ވިއްކާލަން އުޅެނިކޮށް ފަޅާއެރުމުން، ބޯޑުން އަމަލުކުރާނެ ގޮތަކާ މެދު ސުވާލު އުފެދޭ ކަމަށެވެ. އަދި ސިޔާސީ ބޭފުޅުންނަށް އެވޯޑު ދީގެން ޤަވާއިދުތައް ބަދަލުކުރުވާ ހިސާބަށް ކަންކަން ދިއުމުން، "މިހާރު ފުދިއްޖެ" އޭ ބުނަން ޖެހޭ ވަގުތު އަތުވެއްޖެ ކަމަށް އޭނާ ވިދާޅުވި އެވެ.

ޗެފެރިން ވާހަކަ ނިންމާލެއްވީ، ބައެއް ނިންމުންތައް ނިންމާ ފަރާތްތަކުން އަމިއްލަ ފައިދާއަށްޓަކައި ޤަވާއިދުތައް ބަދަލުކޮށް، ފުޓުބޯޅައިގެ މުސްތަޤުބަލަކީ ހަމައެކަނި ވިޔަފާރީގެ މުއާމަލާތެއްގެ ގޮތުގައި ބޭނުންކުރަމުންދާ ކަމަށް ތުހުމަތު ކުރައްވަމުންނެވެ.