2030 ވަނަ އަހަރުގެ ވޯލްޑް ކަޕްގެ ފައިނަލް ބާއްވާނެ ޤައުމެއް ކަނޑައެޅުމުގެ ބަހުސް ހޫނުވެ، މޮރޮކޯގެ ބޮޑުވަޒީރުގެ ނުރުހުން އެ ޤައުމުގެ ފުޓުބޯޅަ ފެޑެރޭޝަންގެ ރައީސް އަށް

2030 ވަނަ އަހަރު ބޭއްވުމަށް ހަމަޖެހިފައިވާ ފީފާ ވޯލްޑް ކަޕްގެ ފައިނަލް މެޗު މޮރޮކޯގައި ބާއްވާނެ ކަމަށް ބުނެ ވައުދުތައް ނުވުމަށް އެ ޤައުމުގެ ބޮޑު ވަޒީރު އަޒީޒް އަޚަންނޫޝް، ފުޓުބޯޅަ ފެޑެރޭޝަންގެ ރައީސް އަށް އަންގަވައިފި އެވެ.

ބޮޑު ވަޒީރު މިގޮތަށް އެންގެވީ ވޯލްޑް ކަޕްގެ ފައިނަލް މެޗު ބާއްވާނެ ޤައުމަކާ މެދު މޮރޮކޯ އާއި ސްޕެއިންއާ ދެމެދު ބަހުގެ ހަމަލާތަކެއް ބަދަލު ކުރެވެމުންދާ ދަނޑިވަޅެއްގަ އެވެ.

މޮރޮކޯގެ ފުޓުބޯޅަ ފެޑެރޭޝަންގެ ރައީސް ފައުޒީ ލަކްޖާ މީގެ ކުރިން ބޭއްވި ސިޔާސީ ހަރަކާތެއްގައި ވިދާޅުވެފައިވަނީ، 2030 ވަނަ އަހަރުގެ ވޯލްޑް ކަޕް ފައިނަލް މެޗު ކަސަބްލަންކާގައި ބޭއްވުމުގެ ޝަރަފު އެ ޤައުމަށް ލިބޭނެ ކަމަށެވެ. ނަމަވެސް ބޮޑު ވަޒީރު އަޒީޒް ވަނީ މިކަމާ ގުޅިގެން ލަކްޖާ އަށް ވަރުގަދަ އިންޒާރެއް ދެއްވާފަ އެވެ.

ބޮޑު ވަޒީރު ވިދާޅުވީ، މި މުބާރާތް ބޭއްވުމުގައި ބައިވެރިވާ ޤައުމުތައް ކަމަށްވާ ސްޕެއިން އަދި ޕޯޗުގަލްއާ މަޝްވަރާ ނުކޮށް، ފައިނަލް މެޗު މޮރޮކޯގައި ބާއްވާނެ ކަމުގެ ވައުދުތައް ނުވުމަށެވެ. އަދި މިއީ އިންތިޚާބީ ވައުދުތަކެއްގެ ގޮތުގައި ބޭނުން ކޮށްގެން އަވަށްޓެރި ޤައުމުތަކުގެ އިތުބާރު ގެއްލޭ ފަދަ އަމަލުތައް ނުކުރުމަށް ވެސް ބޮޑު ވަޒީރު ގޮވައިލެއްވި އެވެ.

2030 ވަނަ އަހަރުގެ ވޯލްޑް ކަޕް އަކީ ތާރީޚީ މުބާރާތެކެވެ. މި މުބާރާތުގެ މައިގަނޑު މެޗުތައް ބޭއްވުމަށް ހަމަޖެހިފައިވަނީ މޮރޮކޯ، ސްޕެއިން އަދި ޕޯޗުގަލްގައި އެވެ. ނަމަވެސް މުބާރާތުގެ 100 ވަނަ އަހަރީ ދުވަސް ފާހަގަކުރުމުގެ ގޮތުން ފުރަތަމަ ތިން މެޗު ކުޅުމަށް ހަމަޖެހިފައިވަނީ އުރުގުއޭ، އާޖެންޓީނާ އަދި ޕެރަގުއޭގަ އެވެ.

މުބާރާތް ބާއްވާނެ ސްޓޭޑިއަމްތަކުގެ ލިސްޓެއް ހުށަހަޅާފައިވީ ނަމަވެސް، ފައިނަލް މެޗު ބާއްވާނެ ވަކި ތަނެއް ފީފާ އިން މިހާތަމަށް ނިންމާފައި ނުވެ އެވެ. ފީފާ އިން ބުނެފައިވަނީ އެކަމާ މެދު ގޮތެއް ނިންމާނީ އެންމެ އެކަށީގެންވާ ވަގުތުގައި ކަމަށެވެ. 

ސްޕެއިންގެ ފުޓުބޯޅަ ފެޑެރޭޝަންގެ ރައީސް ރަފައެލް ލޫޒާން ވެސް ވަނީ ފައިނަލް މެޗު ބާއްވަން ޖެހޭނީ ސްޕެއިންގައި ކަމަށް ވިދާޅުވެފައި އެވެ. އޭނާ ވިދާޅުވި ގޮތުގައި ސްޕެއިން އަކީ މިހާރުގެ ދުނިޔޭގެ ޗެމްޕިއަނުން ކަމަށްވުމާއި، ބޮޑެތި މުބާރާތްތައް ބޭއްވުމުގެ ތަޖުރިބާ ހުރުމުން ފައިނަލް މެޗު ބޭއްވުމަށް އެންމެ އެކަށީގެންވަނީ ސްޕެއިން ކަމަށެވެ. ސްޕެއިންގެ ރެއާލް މެޑްރިޑުގެ ބާނަބައު ސްޓޭޑިއަމް މިހާރު ވަނީ 83،000 މީހުންގެ ޖާގަ އަށް ބޮޑުކޮށްފައި އެވެ. އަދި ބާސެލޯނާގެ ކޭމްޕް ނޯގެ މަރާމާތު ނިމުމުން އެތަނުގައި 105،000 މީހުންނަށް ތިބެވޭނެ އެވެ.

މީގެ އިތުރުން މޮރޮކޯ އިން ވެސް ދަނީ ފައިނަލް މެޗަށް އަމާޒުކޮށްގެން ދުނިޔޭގެ އެންމެ ބޮޑު ފުޓުބޯޅަ ސްޓޭޑިއަމް ބިނާކުރުމުގެ މަސައްކަތް ކުރަމުންނެވެ. އެއީ 115،000 މީހުންގެ ޖާގަ ހިމެނޭ ސްޓޭޑިއަމް އެކެވެ. ވޯލްޑް ކަޕްގެ ފައިނަލް ބާއްވާނެ ތަނެއް ކަނޑައެޅުމުގައި ޤައުމުތަކުގެ މެދުގައި ވާދަވެރިކަން ބޮޑުވެފައިވާއިރު، 2026 ވަނަ އަހަރުގެ ވޯލްޑް ކަޕް ފައިނަލް ބާއްވާނެ ތަނެއްގެ ގޮތުގައި ނިއު ޖާޒީ ހަމަޖެއްސީ ވެސް މުބާރާތް ފެށުމުގެ ދެ އަހަރު ކުރިން 2024 ވަނަ އަހަރުގެ ފެބްރުވަރީ މަހު އެވެ.

އެހެންކަމުން 2030 ވަނަ އަހަރުގެ ފައިނަލް މެޗާ މެދު ގޮތެއް ނިންމުމަށް އަދި ގިނަ ދުވަސްތަކެއް ނަގާނެ ކަމަށް ބެލެވެ އެވެ.