ފީފާގެ މެންބަރު ޤައުމުތަކަށް ދޭ މާލީ އެހީ އިތުރުކުރުމަށް ތާއީދުކުރައްވާ ކަމަށް އިންފަންޓީނޯ ވިދާޅުވެއްޖެ

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ މެންބަރު 211 ޤައުމަށް ދޭ މާލީ އެހީތެރިކަން ބޮޑުތަނުން އިތުރުކޮށްދިނުމަށް ތައްޔާރަށް ހުންނެވިކަމުގެ އިޝާރާތެއް އެ އިދާރާގެ ރައީސް ޖިއާނީ އިންފަންޓީނޯ ދެއްވައިފި އެވެ.

އިންފަންޓީނޯ މިފަދަ އިޝާރާތެއް ދެއްވާފައި މިވަނީ، ފީފާގެ މާލީ އެހީތެރިކަން އިތުރުކުރުމަށް ބައްރުތަކުގެ ފުޓުބޯޅަ ކޮންފެޑަރޭޝަންތަކުން ބާރު ބޮޑުކުރަމުންދާ ދަނޑިވަޅެއްގަ އެވެ.

މި ހިނގާ ސެޕްޓެމްބަރު މަހުގެ ތެރޭގައި ޔުއެފާގެ ރައީސް އަލެކްސެންޑަރ ޗެފެރިން އާއި ކޮންކާކަފްގެ ވެރިޔާ ވިކްޓަރ މޮންޓަގްލިއާނީ ވަނީ ފީފާގެ ކޮންމެ މެންބަރު ޤައުމަކަށް އިތުރު 10 މިލިއަން ޑޮލަރު ދިނުމަށް ރަސްމީކޮށް އެދިވަޑައިގެންފަ އެވެ. މި ފައިސާ ދޫކުރުމަށް އެދިފައިވަނީ 2027 އިން 2030 އަށް ހިނގާ ދައުރަށެވެ. ފީފާގެ ރިޒާވުގައި މިހާރު ވެސް 4.4 ބިލިއަނާއި، 6 ބިލިއަން ޑޮލަރާ ދެމެދުގެ އަދަދަކަށް ފައިސާ ހުރި ކަމަށް އަންދާޒާކުރެވެ އެވެ.

ފީފާގެ ހަ ކޮންފެޑަރޭޝަންގެ ރައީސުންނަށް ފޮނުއްވި ސިޓީއެއްގައި އިންފަންޓީނޯ ވިދާޅުވީ، ޒިންމާދާރުކަމާއެކު ފޯރުކޮށްދެވެން އޮތް އެންމެ މަތީ މިންވަރަކަށް މާލީ އެހީތެރިކަން އިތުރުކުރުމަށް އޭނާ ތާއީދުކުރައްވާ ކަމަށެވެ. ނަމަވެސް، ކުރިއަށް އޮތް ފީފާ ކައުންސިލް ބައްދަލުވުމުގެ ކުރިން، ކޮންމެ ޤައުމަކަށް 10 މިލިއަން ޑޮލަރު ދޭނެ ކަމުގެ ސީދާ ޔަޤީންކަމެއް އޭނާ މިހާތަނަށް ދެއްވާފައި ނުވެ އެވެ.

އިންފަންޓީނޯގެ ސިޓީގައި ވިދާޅުވެފައިވަނީ، ފީފާގެ ހިންގުމުގެ ނިޒާމުގެ ތެރެއިން ޒިންމާދާރުކަމާއެކު ދެވެން އޮތް އެންމެ ބޮޑު އެހީއަކަށް އޭނާ ތާއީދު ކުރައްވާނެ ކަމަށެވެ. އަދި ދާދި ފަހުން އަނބުރާ ގެންދިޔަ ވިޔަފާރީގެ ޕްރޮޕޯސަލް އަކީ ފުޓުބޯޅަ އަށް ކުރާ އިންވެސްޓްމަންޓްތައް އިތުރުކުރުމުގެ މަގުސަދުގައި ހުށަހެޅި ކަމެއްކަން ވެސް އޭނާ ފާހަގަކުރެއްވި އެވެ.

މާލީ އެހީ އިތުރު ކުރުމުގެ ބަހުސް ގަދަވެފައި މިވަނީ، ފީފާ ވޯލްޑް ކަޕްގެ ވިޔަފާރީގެ ބައެއް ހައްގުތައް އަމިއްލަ ކުންފުނިތަކަށް ވިއްކާލުމަށް އިންފަންޓީނޯ ގެންގުޅުއްވި މަޝްރޫއު ނާކާމިޔާބުވުމާ ގުޅިގެންނެވެ. އެ މަޝްރޫއަކީ ދުނިޔޭގެ ފުޓުބޯޅަ ކުރިއެރުވުމަށް އިތުރު ފައިސާ ހޯދުމަށް ހުށަހެޅި ކަމެއް ކަމަށް އޭރު ބުނި ނަމަވެސް، ގިނަ ބައެއްގެ ފާޑު ކިޔުން އަމާޒުވުމުން އެކަން ވަނީ ހުއްޓާލާފަ އެވެ.

އެހެންކަމުން، މިހާރު މެންބަރު ޤައުމުތަކުން ބާރު އަޅަމުންދަނީ ފީފާގެ ރިޒާވުގައި ހުރި ފައިސާ ބޭނުންކޮށްގެން އެހީތެރިކަން ފޯރުކޮށްދިނުމަށެވެ.