އިންފަންޓީނޯގެ އަމިއްލަ ޤައުމު ސްވިޒަލެންޑުން ވެސް، އޭނާ އަށް ދީފައި އޮތް ތާއީދު އަނބުރާ ގެންގޮސްފި
1 އޮކްޓޯބަރު 2026 | ބުރާސްފަތި 06:34ސްވިޒަލެންޑުގެ ފުޓުބޯޅަ އެސޯސިއޭޝަން އިން ބުދަ ދުވަހު މި ނިންމުން އިއުލާންކުރިއިރު، މިއީ އިންފަންޓީނޯ އަށް ކުރިމަތިވާނެ ބޮޑު ގޮންޖެހުމެއް ކަމަށް ބެލެވޭ. ސަބަބަކީ އިންފަންޓީނޯ އަކީ ސްވިޒަލެންޑުގެ ރައްޔިތަކަށް ވުމުގެ އިތުރުން، ފީފާ އާއި ޔޫރަޕުގެ ފުޓުބޯޅަ އިދާރާ (ޔުއެފާ)ގެ މައި މަރުކަޒުތައް ވެސް ހުންނަނީ އެ ޤައުމުގައި ކަމަށްވާތީ
ފީފާގެ ރައީސް ޖިއާނީ އިންފަންޓީނޯ | ރޮއިޓާސް
ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ އަންނަ އަހަރުގެ އިންތިޚާބުގައި އިތުރު ދައުރަކަށް ކުރިމަތިލައްވާއިރު، އޭނާ އަށް ކުރިން ދީފައިވާ ތާއީދު އަނބުރާ ގެންދަން ސްވިޒަލެންޑުގެ ފުޓުބޯޅަ އެސޯސިއޭޝަން (އެސްއެފްވީ) އިން ނިންމައިފި އެވެ.
ސްވިޒަލެންޑުގެ ފުޓުބޯޅަ އެސޯސިއޭޝަން އިން ބުދަ ދުވަހު މި ނިންމުން އިއުލާންކުރިއިރު، މިއީ އިންފަންޓީނޯ އަށް ކުރިމަތިވާނެ ބޮޑު ގޮންޖެހުމެއް ކަމަށް ބެލެވެ އެވެ. ސަބަބަކީ އިންފަންޓީނޯ އަކީ ސްވިޒަލެންޑުގެ ރައްޔިތަކަށް ވުމުގެ އިތުރުން، ފީފާ އާއި ޔޫރަޕުގެ ފުޓުބޯޅަ އިދާރާ (ޔުއެފާ)ގެ މައި މަރުކަޒުތައް ވެސް ހުންނަނީ އެ ޤައުމުގައި ކަމަށްވާތީ އެވެ.
އެސްއެފްވީ އިން ބުނީ މިދިޔަ ހުކުރު ދުވަހު ބޭއްވި އެ އެސޯސިއޭޝަންގެ އެގްޒެކެޓިވް ބޯޑު ބައްދަލުވުމުގައި، 2026 ވަނަ އަހަރުގެ ޖޫން މަހު ބާއްވާ ފީފާގެ ރައީސް ހޮވާ އިންތިޚާބުގައި އިންފަންޓީނޯ އަށް ތާއީދުކުރުމަށް ކުރިން ނިންމާފައި އޮތް އޮތުން ބާތިލުކުރަން ނިންމާފައިވާ ކަމަށެވެ. ސްވިޒަލެންޑުގެ އިތުރުން ޔޫރަޕުގެ ބޮޑެތި ޤައުމުތަކުގެ ގިނަ އެސޯސިއޭޝަންތަކަކުން ވެސް މިހާރު ވަނީ އިންފަންޓީނޯ އަށް އޮތް ތާއީދު އަނބުރާ ގެންގޮސްފަ އެވެ.
މި މައްސަލަ ހޫނުވީ މިދިޔަ ޖުލައި މަހު އިންފަންޓީނޯ ހުށަހެޅުއްވި ޕްލޭންއަކާ ގުޅިގެންނެވެ. އެ ޕްލޭން އަކީ ފީފާ ވޯލްޑް ކަޕް އާއި، ކުލަބު ވޯލްޑް ކަޕް ފަދަ މުބާރާތްތަކުގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް އޭނާ ހުށަހެޅުއްވި ހުށަހެޅުމެކެވެ. "ފީފާ ފޯވާޑް އެންޓަޕްރައިޒް" (އެފްއެފްއީ) ގެ ދަށުން އުފައްދާ ކުންފުންޏެއް މެދުވެރިކޮށް އަމިއްލަ ފަރާތްތަކަށް ހިއްސާ ގަނެވޭ ގޮތަށް އޮތް މި ހުށަހެޅުމަށް ގިނަ ބައެއްގެ ފާޑު ކިޔުން އަމާޒުވުމާ ގުޅިގެން، ފަހުން ވަނީ އެ މަސައްކަތް މެދުކަނޑާލާފަ އެވެ.
ސްވިޒަލެންޑުގެ ފުޓުބޯޅަ އެސޯސިއޭޝަންގެ ރައީސް ޕީޓާ ކްނަބެލް ވިދާޅުވީ، ފީފާގެ ލީޑަޝިޕް އިން ދެފުށް ފެންނަ، ޒިންމާދާރު އަދި މުއައްސަސާގެ ހައިބަތު ހިފަހައްޓާނެ ފަދަ މިންގަނޑުތަކަކަށް އަމަލުކުރާނެ ކަމަށް އެ އެސޯސިއޭޝަން އިން އުއްމީދުކުރާ ކަމަށެވެ. ނަމަވެސް، އިންފަންޓީނޯގެ ހުށަހެޅުމާ ގުޅޭ ގޮތުންނާއި، ކަންކަން ނިންމުމުގައި އަމަލުކުރާ ގޮތާ ބެހޭ ގޮތުން އުފެދިފައިވާ މުހިންމު ސުވާލުތަކަށް އަދިވެސް ޖަވާބު ލިބިފައި ނުވާ ކަމަށް އޭނާ ވިދާޅުވި އެވެ.
ކްނަބެލް އިތުރަށް ވިދާޅުވީ، މިކަންކަމުގައި އެކަށީގެންވާ ސާފު ޖަވާބެއް ލިބިފައި ނުވާތީ، އިންފަންޓީނޯގެ ކެންޑިޑެންސީ އަށް ތާއީދުކުރުން ކުރިއަށް ގެންދިޔުމަކީ އެ އެސޯސިއޭޝަން އަށް ކުރެވޭނެ ކަމެއް ނޫން ކަމަށެވެ. އިންފަންޓީނޯ އަށް އޮތް ތާއީދު ގެއްލެމުންދާއިރު، މިއީ ކުރިއަށް އޮތް އިންތިޚާބުގައި އޭނާ އަށް ކުރިމަތިވާނެ ވަރަށް ބޮޑު ގޮންޖެހުމަކަށް ވާނެ އެވެ.
މީގެ ކުރިން އިނގިރޭސިވިލާާތް، ފްރާންސް، ބެލްޖިއަމް، އިސްރާއީލް، ނިއުޒިލެންޑު، އަޔަލެންޑު، އަދި ކެނެޑާ އިން ވެސް ވަނީ އިންފަންޓީނޯ އަށް ދީފައިވާ ތާއީދު އަނބުރާ ގެންގޮސްފައި އެވެ. މީގެ އިތުރުން ޔުއެފާ އާއި ކޮންކާކަފް އަދި އޭއެފްސީ އިން ވެސް އަންނަނީ އިންފަންޓީނޯއާ ދެކޮޅަށް މަސައްކަތް ކުރަމުންނެވެ.
