އިންފަންޓީނޯ އަށް ދީފައިވާ ތާާއީދު އަނބުރާ ގެންދަން ފްރާންސް އިން ވެސް ނިންމައިފި

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސްކަމުގެ މަޤާމުގައި މިހާރު ހުންނެވި ޖިއާނީ އިންފަންޓީނޯ އަށް ކުރިއަށް އޮތް އިންތިޚާބުގައި ތާއީދު ނުކުރުމަށް ފްރާންސް ފުޓުބޯޅަ ފެޑެރޭޝަން (އެފްއެފްއެފް) އިން ނިންމައިފި އެވެ.

މޮރޮކޯގެ ރަބާތުގައި 2027 ވަނަ އަހަރުގެ މާޗު މަހުގެ 18 ވަނަ ދުވަހު ބޭއްވުމަށް ހަމަޖެހިފައިވާ ފީފާގެ ރައީސް ހޮވުމުގެ އިންތިޚާބުގައި އިންފަންޓީނޯ އަށް އޮތް ތާއީދު އަނބުރާ ގެންދިޔުމަށް ފްރާންސްގެ ފެޑެރޭޝަންގެ އެގްޒެކެޓިވް ކޮމިޓީ އިން ވަނީ އިއްތިފާގުން ފާސްކޮށްފަ އެވެ.

މިއީ ފްރާންސް އިން ފީފާއާ މެދު ގެންގުޅެމުން އައި ސިޔާސަތަށް އައި ބޮޑު ބަދަލެކެވެ. މިދިޔަ ޖޫން މަހުގެ ނިޔަލަށް ވެސް ފްރާންސް އިން އައީ 2016 ވަނަ އަހަރުން ފެށިގެން ފީފާގެ ރައީސްކަން ކުރައްވަމުން ގެންދަވާ އިންފަންޓީނޯގެ ކެނޑިޑެންސީ އަށް ތާއީދު ކުރަމުންނެވެ. ނަމަވެސް، ފާއިތުވި މަދު މަސްތަކެއްގެ ތެރޭގައި ދެ ފަރާތުގެ ގުޅުން ވަނީ މުޅިން ބަދަލުވެފަ އެވެ.

އެފްއެފްއެފްގެ ރައީސް ފިލިޕް ޑިއާލޯ ވިދާޅުވީ، އިންފަންޓީނޯ އަށް އޮތް އިތުބާރު ގެއްލިފައިވާ ކަމަށާއި، ފީފާގެ މުހިންމު ނިންމުންތައް ނިންމަމުންދާ ގޮތާ މެދު ސުވާލު އުފެދޭ ކަމަށެވެ.

ދެ ފަރާތުގެ ގުޅުން ގޯސްވުމުގެ މައިގަނޑު ސަބަބަކީ، ފީފާގެ މުބާރާތްތަކުގެ ވިޔަފާރީގެ ތެރެއަށް އަމިއްލަ އިންވެސްޓަރުން ވެއްދުމަށް އިންފަންޓީނޯ ކުރިއަށް ގެންދަން އުޅުނު މަޝްރޫއު އެވެ. މި މަޝްރޫއުގެ ދަށުން ފީފާ ވޯލްޑް ކަޕް ހިމެނޭހެން، އެ އިދާރާ އިން ބާއްވާ މުބާރާތްތަކުގެ ކޮމާޝަލް ރައިޓްސް، ނުވަތަ ވިޔަފާރީގެ ހައްގުތަކުގެ 20 އިންސައްތަ ހިއްސާ ވިއްކާލުމަށް ވަނީ ހުށަހަޅާފައި އެވެ. މިކަމާ ގުޅިގެން އެކި ކޮންފެޑެރޭޝަންތަކާއި ޤައުމީ ފެޑެރޭޝަންތަކުގެ ބޮޑު ދެކޮޅުވެރިކަމެއް އަމާޒުވީ، އެކަށީގެންވާ މަޝްވަރާތަކެއް ނުކޮށް މިކަން ކުރަން އުޅުމުންނެވެ.

މި މައްސަލައިގައި ކުރިމަތިވި ފިއްތުންތަކާ ހުރެ ފީފާ އިން އެ މަޝްރޫއު މިހާރު ދޫކޮށްލާފައިވީ ނަމަވެސް، ފްރާންސް އިން ޤަބޫލުކުރާ ގޮތުގައި އެކަނި ގުޅުން ރަނގަޅެއް ނުކުރެވޭނެ އެވެ. ޑިއާލޯ ވިދާޅުވީ ފީފާގެ އެންމެ ބޮޑެތި މުބާރާތްތަކުގެ މާލީ މުސްތަޤުބަލަށް ބޮޑު ބަދަލެއް އަތުވެދާނެ ފަދަ ކަމެއް ނިންމަންވާނީ، ފެޑެރޭޝަންތަކާއެކު ފުޅާ ދާއިރާއެއްގައި މަޝްވަރާކުރުމަށް ފަހު ކަމަށެވެ.

މީގެ އިތުރުން، ފީފާގެ މާލީ ވަސީލަތްތައް ބަލަހައްޓާ ގޮތާއި، އިންފަންޓީނޯގެ ރައީސްކަމުގައި ގެންގުޅުއްވާ ގަވަނަންސް މޮޑެލް ނުވަތަ ހިންގުމުގެ އުސޫލުތަކާ މެދު ވެސް ފްރާންސުން ވަނީ ކަންބޮޑުވުން ފާޅުކޮށްފަ އެވެ.

ފްރާންސް އިން މި ނިންމި ނިންމުމާއެކު، އިންފަންޓީނޯއާ ދެކޮޅަށް ޔޫރަޕުގެ ބޮޑު ފްރަންޓެއް ވަނީ އުފެދިފަ އެވެ. މީގެ ކުރިން އިނގިރޭސިވިލާތް، އިޓަލީ، ބެލްޖިއަމް، ސްވިޑަން އަދި ސްކޮޓްލެންޑް އިން ވެސް ވަނީ އިންފަންޓީނޯ އަށް އޮތް ތާއީދު އަނބުރާ ގެންގޮސްފަ އެވެ.

މިއީ ޔުއެފާގެ ރައީސް އެލެކްސެންޑާ ޗެފެރިން އާއި އިންފަންޓީނޯއާ ދެމެދު އޮތް ޚިޔާލު ތަފާތުވުންތަކާ ގުޅިފައިވާ ކަމެއް ކަމަށް ބެލެވެ އެވެ. މިހާރު ޔޫރަޕުގެ ޤައުމުތަކުން އަންނަނީ އިންފަންޓީނޯއާ ވާދަކުރާނެ އިތުރު ކެންޑިޑޭޓަކު ހޯދުމުގެ މަސައްކަތް ކުރަމުންނެވެ.

މި ވަގުތަށް ބަލާއިރު، 2027 ވަނަ އަހަރުގެ އިންތިޚާބަށް ކުރިމަތިލައްވާނެކަން ރަސްމީކޮށް އިއުލާން ކުރައްވާފައިވާ ހަމައެކަނި ކެންޑިޑޭޓަކީ އިންފަންޓީނޯ އެވެ. އިންފަންޓީނޯއާ ވާދަކުރަން ބޭނުންވާ ފަރާތްތަކަށް ކެންޑިޑޭސީ ހުށަހެޅުމުގެ ފުރުސަތު 2026 ވަނަ އަހަރުގެ ނޮވެމްބަރު މަހުގެ 18 ވަނަ ދުވަހުގެ ނިޔަލަށް އޮންނާނެ އެވެ.