ފީފާގެ ރައީސް ކަމުން އިންފަންޓީނޯ އިސްތިއުފާާ ދޭން ޖެހޭ: ޔުއެފާގެ ކުރީގެ ރައީސް ޕްލެޓީނީ
3 ސެޕްޓެމްބަރު 2026 | ބުރާސްފަތި 06:28ފްރާންސްގެ މީޑިއާ އަކަށް ދެއްވި އިންޓަވިއުއެއްގައި ޕްލެޓީނީ ވިދާޅުވީ އިޤްތިސާދީ ކަންކަން އެއްފަރާތްކޮށް، އިންފަންޓީނޯ ފެއިލްވެފައިވަނީ އޭނާ ކުޅިވަރުގެ ޤަވާއިދުތަކުގެ ޒިންމާދާރު ބޭފުޅެއްގެ ގޮތުގައި ހުންނަވައި، އެ ޤަވާއިދުތަކަށް އިޙުތިރާމް ނުކުރެއްވުމުން ކަމަށް
ޔުއެފާގެ ކުރީގެ ރައީސް ޕްލެޓީނީ އާާއި ފީފާގެ ރައީސް އިންފަންޓީނޯ | ގެޓީ އިމޭޖަސް
ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ކަމުން ޖިއާނީ އިންފަންޓީނީ އިސްތިއުފާ ދޭން ޖެހޭ ކަމަށް ޔުއެފާގެ ކުރީގެ ރައީސް އަދި ފްރާންސްގެ ލެޖެންޑު މިޝެލް ޕްލެޓީނީ ވިދާޅުވެއްޖެ އެވެ.
ޕްލެޓީނީ މިހެން ވިދާޅުވެފައި ވަނީ އިންފަންޓީނޯ ގެންގުޅުއްވި ޕްލޭނެއްގެ ސަބަބުން އެތައް ބައެއްގެ ނުރުހުން ފީފާ އަށް އަމާޒުވެ، އިންފަންޓީނޯ މަސައްކަތް ކުރައްވަނީ ކުޅިވަރުގެ ރޫހާ ޚިލާފަށް ކަމަށް އެތައް ބަޔަކު ބުނަމުން އަންނަ ދަނޑިވަޅެއްގައި އެވެ.
ފްރާންސްގެ މީޑިއާ އަކަށް ދެއްވި އިންޓަވިއުއެއްގައި ޕްލެޓީނީ ވިދާޅުވީ އިޤްތިސާދީ ކަންކަން އެއްފަރާތްކޮށް، އިންފަންޓީނޯ ފެއިލްވެފައިވަނީ އޭނާ ކުޅިވަރުގެ ޤަވާއިދުތަކުގެ ޒިންމާދާރު ބޭފުޅެއްގެ ގޮތުގައި ހުންނަވައި، އެ ޤަވާއިދުތަކަށް އިހުތިރާމް ނުކުރެއްވުމުން ކަމަށެވެ. މީގެ އިތުރުން ޕްލެޓީނީ ވަނީ މިފަހަރުގެ ވޯލްޑް ކަޕްގައި ދީފައިވާ ހައިޑްރޭޝަން ބްރޭކަށް ވެސް ފާޑު ވިދާޅުވެފައި އެވެ.
އެގޮތުން ޕްލެޓީނީ ވިދާޅުވީ ބައެއް ފަހަރު އެ ބްރޭކް ހަތަރު މިނެޓަށް ވެސް ދިގު ދެމިގެން ގޮސްފައިވާ ކަމަށާއި، އެ ވަގުތުތައް ބޭނުން ކޮށްފައި ވަނީ ހޯސްޓް ބްރޯޑްކާސްޓްރުން އިޝްތިހާރުތައް ދެއްކުމަށް ކަމަށެވެ. އަނެއްކޮޅުން މުބާރާތުގެ ފައިނަލް މެޗުގައި ބޭއްވި ހާފް ޓައިމްގެ ޝޯ އަށް ވެސް ޕްލެޓީނީ ނުރުހުން އަމާޒު ކުރެއްވި އެވެ.
މީގެ އިތުރުން ވޯލްޑް ކަޕްގެ ތެރޭގައި އެމެރިކާާގެ ފަލޮރިން ބަލޮގަން އަށް ދެއްކި ރަތް ކާޑުގެ ސަސްޕެންޝަން މައާފު ކުރުމަށް ފީފާ އިން ނިންމިއިރު، ޕްލެޓީނީ ވަނީ އެކަމަށް ވެސް ފާޑު ވިދާޅުވެފައި އެވެ. އޭނާ ވިދާޅުވީ، ކޮންމެ ގުޅުމެއްގެ ތެރެއިން ކަންކަން ދިޔަ ނަމަވެސް، ފީފާ އިން ޤަވާއިދު ނަގަހައްޓަން ޖެހޭނެ ކަމަށެވެ.
އެހެންކަމުން އިންފަންޓީނޯ އަކީ ޒިންދާރު މަޤާމެއްގައި ހުންނެވި ބޭފުޅަކަށް ވީ ނަމަވެސް، އޭނާ އަށް އެ ޒިންމާ އަށް އިހުތިރާމް ކުރެވިފައި ނެތް ކަމަށް ޕްލެޓީނީ ވިދާޅުވި އެވެ. އިންފަންޓީނޯގެ އަމަލު ތަކަކީ ފުޓުބޯޅައިގެ ރޫހާ ޚިލާފު ކަމެއް ކަމަށް ފާހަގަ ކުރައްވައި ޕްލެޓީނީ ވިދާޅުވީ، އިންފަންޓީނޯ މަގާމުން ވަކިވާން ޖެހޭ ކަމަށެވެ.
މީގެ ކުރިން ވެސް ޕްލެޓީނީ ވަނީ އިންފަންޓީނޯ އަށް ފާޑު ވިދާޅުވެފައި އެވެ. 2007 ވަނަ އަހަރުން ފެށިގެން 2015 ވަނަ އަހަރަށް ޕްލެޓީނީ ޔުއެފާ ރައީސްކަން ކުރެއްވިއިރު، އޭނާގެ ޑެޕިއުޓީ އަކަށް ހުންނެވީ އިންފަންޓީނޯ އެވެ.
