އަންހެނުންނަށް ޚާއްސަ ފުޓުބޯޅަ އަދި ފުޓްސަލް ބޭސިކް ރެފްރީ ކޯހެއް އެފްއޭއެމް އިން ބާއްވަނީ
1 އޮކްޓޯބަރު 2026 | ބުރާސްފަތި 06:3310 ދުވަހުގެ މުއްދަތަކަށް ކުރިއަށްގެންދާ މި ކޯހުގައި ބައިވެރިވާން ބޭނުންވާ އަންހެން ފަރާތްތަކުން، މި ހިނގާ އޮކްޓޫބަރު މަހުގެ ހަތް ވަނަ ދުވަހުގެ ކުރިން ބައިވެރިވުމަށް ވަނީ ފުރުސަތު ހުޅުވާލާފައި
ރާއްޖޭގައި ފުޓުބޯޅަ އަދި ފުޓްސަލްގެ ރެފްރީކަން ކުރާ އަންހެން ރެފްރީއެއް | އަދަދު ސްޕޯޓްސް
އަންހެނުންނަށް ޚާއްސަކޮށްގެން ފުޓުބޯޅަ އާއި ފުޓްސަލްގެ ބޭސިކް ރެފްރީ ކޯހެއް ބާއްވަން، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިއުލާންކޮށްފި އެވެ.
އެފްއޭއެމް އިން ގެޒެޓުގައި ކޮށްފައިވާ އިއުލާނެއްގައި ބުނެފައި ވަނީ، މާލޭގައި މި ކޯސް ކުރިއަށް ގެންދިޔުމަށް ނިންމާފައި ވަނީ އޮކްޓޫބަރު މަހުގެ 10 ވަނަ ދުވަހުން ފެށިގެން، 20 ވަނަ ދުވަހުގެ ނިޔަލަށެވެ. 10 ދުވަހުގެ މުއްދަތަކަށް ކުރިއަށްގެންދާ މި ކޯހުގައި ބައިވެރިވާން ބޭނުންވާ އަންހެން ފަރާތްތަކުން، މި ހިނގާ އޮކްޓޫބަރު މަހުގެ ހަތް ވަނަ ދުވަހުގެ ކުރިން ބައިވެރިވުމަށް ވަނީ ފުރުސަތު ހުޅުވާލައިފަ އެވެ.
އެ އިއުލާންގައި އެފްއޭއެމް އިން ވަނީ ކޯހުގައި ބައިވެރިވުމަށް ފުރިހަމަ ކުރަން ޖެހޭ ލިންކު ވެސް ހިމަނައިފަ އެވެ. ކޯހުގައި ބައިވެރިވުމުގެ ޝަރުތުތަކަކީ އިނގިރޭސި ބަހުން ރަނގަޅަށް ވާހަކަ ދައްކަން އެނގުމާއެކު، ލިޔަން އެނގުމެވެ. ގްރޭޑު ހަތަކުން ފާސްވެފައިވުމާ އެކު، ޕޮލިސް ރިކޯޑު ވެސް ހުށަހަޅަން ޖެހޭނެ ކަމަށް ބުނެފައިވެ އެވެ.
މީގެ އިތުރުން އުމުރުން 18 އަހަރު ނުވާ ކުދިން މި ކޯހުގައި ބައިވެރިވާން ބޭނުންވާ ނަމަ، ބެލެނިވެރިޔާގެ އިއުތިރާޒެއް ނެތް ކަމުގެ ފޯމު ފުރިހަމަ ކުރަން ޖެހޭނެ ކަމަށް އެފްއޭއެމް އިން ބުނެފައިވެ އެވެ.
