ޤައުމީ ޓީމުގެ ޖާޒީ ކުޅޭ ކުޅޭ އެއްޗަކަށް، އެފްއޭއެމްގައި ސީރިއަސް ކަމެއް ނެތް!

ސޯޝަލް މީޑިއާ ހުޅުވާލުމާ އެކު ފެނުނީ، ރާއްޖޭގައި ހުރި އެންމެ ތަޖުރިބާކާރު އެއް ކޯޗު ކޮށްފައި އޮތް ޕޯސްޓެކެވެ. އެކި އެކި ފެންވަރުގައި މަސައްކަތް ކޮށްފައިވާ، މުހައްމަދު ނިޒާމް (ނިޒާމްބެ) އޭނާގެ ސޯޝަލް މީޑިއާގައި ކޮށްފައި އޮތް ޕޯސްޓެކެވެ. ރަނގަޅަށް އެ ޕޯސްޓު ކިޔާލުމުން، ނިޒާމްބެ އެ ފާހަގަ ކުރަނީ ކިހާ ސީރިއަސް ވާހަކައެއްކަން އެނގިއްޖެ އެވެ. ހިތާމަ ކުރަން ޖެހޭ، އަދި ލަދު ގަންނަން ޖެހޭ ވަރުގެ ވާހަކައެކެވެ. 

އެ ޕޯސްޓުން ފެންނަަނީ ދިވެހި ޕްރިމިއާ ލީގުގައި ކުލަބު އީގަލްސް އާއި، ބިސް ބުރު ބައްދަލު ކުރި މެޗުގައި، ބިސް ބުރުގެ ކުޅުންތެރިން ރާއްޖޭގެ ޤައުމީ ޓީމުގެ ޖާޒީ ލައިގެން ކުޅޭ މަންޒަރެވެ. މެޗުގައި ބިސް ބުރުން ބޭނުން ކުރަން އޮތް ޖާޒީ އާއި ކުލަބު އީގަލްސްގެ ޖާޒީގެ ކުލަ ދިމާވާތީ، ބިސް ބުރަށް ބޭނުން ކުރަން ދިނީ ރާއްޖޭގެ ޤައުމީ ފުޓުބޯޅަ ޓީމުގެ ނޫ ކުލައިގެ ޖާޒީ އެވެ. 

ނިޒާމްބެގެ ސޯޝަލް މީޑިއާގައި ކޮށްފައިވާ ޕޯސްޓު | ސޯޝަލް މީޑިއާ

އެ ވާހަކަ ފާހަގަ ކުރަމުން ނިޒާމްބެ ބުނީ، އެއީ ވަރަށް ސީރިއަސް މައްސަލައެއް ކަމަށެވެ. އަދި އެއީ ރާއްޖޭގެ ޤައުމީ ޓީމުގެ ފަޚުރުވެރި ޖާޒީ އަށް ކުރެވޭ ވަރަށް ބޮޑު އިހުތިރާމް ކުޑަ އަމަލެއް ކަމަށް ވެސް ނިޒާމްބެ ފާހަގަކޮށްފައިވެ އެވެ. ޤައުމީ ޓީމުގެ ޖާޒީ އަކީ ޤައުމު ތަމްސީލު ކުރާ ފަޚުރެއް ކަމަށާއި އެއީ ކޮންމެ ދިވެހި ރައްޔިތެއްގެ ފަޚުރު ކަމަށް ނިޒާމްބެ ބުންޏެވެ. 

މީގެ އިތުރުން ނިޒާމްބެ ބުނީ އެއީ ހިނގައި ދިޔަ އާދައިގެ ކަމެއްގެ ގޮތުގައި ދެކި، އެކަން ފަސޭހަ އިން ދޫކޮށްލައިގެން ނުވާނެ ކަމަށެވެ. ޤައުމީ ކުޅިވަރު ކައުންސިލް އާއި ސްޕޯޓްސް މިނިސްޓްރީ އިން މި މައްސަލަ ސީރިއަސްކޮށް ބަލައި، މިކަމުގައި އިހުމާލުވި ފަރާތްތައް ޖަވާބުދާރީކުރުވައި، އަޅަން ޖެހޭ އެކަށީގެންވާ ފިޔަވަޅު އެޅުން ކަށަވަރު ކުރަން ޖެހޭ ކަމަށް ވެސް ނިޒާމްބެ ބުނެފައިވެ އެވެ. 

މީގެ އިތުރުން މި ހާދިސާގެ ސަބަބުން ރާއްޖޭގެ ފުޓުބޯޅަ އިންތިޒާމުތަކުގެ ފެންވަރާއި، އެންމެ މަތީ ފަންތީގެ މުބާރާތްތައް ހިންގުމުގައި ހުރި ޕްރޮފެޝަނަލް މިންގަނޑުތަކާ މެދު ސީރިއަސް ސުވާލުތަކެއް އުފެދޭ ކަމަށް ވެސް ނިޒާމްބެ ބުންޏެވެ.

ދިވެހި ޕްރިމިއާ ލީގުގައި އީގަލްސް އާއި ބިސް ބުރު ކުޅުނު މެޗުގައި ބިސް ބުރުގެ ކުޅުންތެރިން ޤައުމީ ޓީމުގެ ނޫ ކުލައިގެ ޖާޒީގައި | ސޯޝަލް މީޑިއާ

ޤައުމީ ޖާޒީ އަކީ އެއާ ގުޅިފައިވާ ބޮޑު މަސްއޫލިއްޔަތާއި ޤަދަރެއް އޮތް އެއްޗަކަށް ވާއިރު، ކުޅުންތެރިންނާއި، އޮފިޝަލުންނާއި، އިދާރީ ހިންގުންތެރިންގެ އިތުރުން ފުޓުބޯޅަ އެސޯސިއޭޝަން އިން ވެސް އެ ޖާޒީ އަށް ފުރިހަމަ އަށް އިހުތިރާމް ކުރަން ޖެހޭނެ ކަމަށް ނިޒާމްބެގެ ޕޯސްޓުގައި ވަނީ ބުނެފައި އެވެ. 

ހަމަ އެހެންމެ ދިވެހި ފުޓުބޯޅައިގެ އަބުރު ރައްކާތެރިކޮށް، ޤައުމީ ފެންވަރުގެ މުބާރާތްތައް އިންތިޒާމުކުރާ ގޮތާ މެދު އާންމު ރައްޔިތުންގެ އިތުބާރު އަލުން ހޯދުމަށް ބޭނުންވާ ނަމަ، މިފަދަ ކަންކަމުގައި ޖަވާބުދާރީކުރުވުމަކީ ކޮންމެހެން ކުރަންޖެހޭ ކަމެއްގެ ގޮތުގައި ނިޒާމްބެ ދެކެ އެވެ.

އެފްއޭއެމްގައި ސީރިއަސް ކަމެއް ނެތް!

މިފަދަ ކަންކަމުން ފާހަގަވަނީ އެފްއޭއެމްގައި އެއްވެސް ކަހަލަ ސީރިއަސް ކަމެއް ނެތް ކަމެވެ. ހޯމް އެންޑް އަވޭ އުސޫލުން ލީގު ކުޅެން ތައްޔާރުވީއިރު، ކޮންމެ ޓީމެއްގައި ވެސް ހޯމް އެންޑް އަވޭ ޖާޒީ އޮންނާނެކަން އެފްއޭއެމް އިން ޔަޤީން ކުރަން ޖެހޭނެ އެވެ. ލީގުގެ ޤަވާއިދުގައި ވެސް އެކަން އޮންނަން ވާނެ އެވެ. 

އަނެއްކޮޅުން ހޯމް އެންޑް އަވޭ އުސޫލުން ލީގުން ކުޅެން ފަށަން އެފްއޭއެމް އިން ތައްޔާރުވަމުން އައިތާ ކިތަންމެ ދުވަހެއް ވެއްޖެ އެވެ. ހޮނިހިރު ދުވަހު ގައްދޫގައި ކުޅުނު ދިވެހި ލީގުގެ މެޗަކީ، އަތޮޅު ތެރޭގެ ރަށެއްގައި ދިވެހި ލީގުގެ މެޗެއް ކުޅުނު ފުރަތަމަ ފަހަރެވެ. ދިވެހި ފުޓުބޯޅައިގެ ތާރީޚީ ދުވަހެކެވެ. ތާރީޚީ މެޗެކެވެ. އެކަމަކު، އެ މެޗު ބައްލަވާލައްވަން އެފްއޭއެމްގެ ރައީސް އަހުމަދު ތާރިޤު (ޓޮމް) އަށް ވަޑައިނުގެންނެވުނެވެ.