ޗައިނާއާ ދެކޮޅަށް ރާއްޖެ އިން ކުޅެން ހަމަޖެހިއްޖެ

ކުރިއަށް އޮތް ބައިނަލްއަޤުވާމީ ބްރޭކުގައި ދިވެހިރާއްޖެ އިން ޗައިނާއާ ދެކޮޅަށް ވެސް ރަހުމަތްތެރިކަމުގެ މެޗެއް ކުޅޭ ގޮތަށް ހަމަޖެހިއްޖެ އެވެ.

ފީފާ ބްރޭކުގައި ރާއްޖެ އިން އެންމެ ފުރަތަމަ ނިންމީ ކިރްގިސްތާން އާއި ލުބުނާންއާ ދެކޮޅަށް ދެ މެޗު ކުޅުމަށެވެ. އެފްއޭއެމް އިން އެންމެ ފަހުން ހާމަކޮށްފައިވާ ކަލަންޑަރުގައި ޤައުމީ ޓީމުގެ ބްރޭކް އާއި، އިންޓަނޭޝަނަލް ފްރެންޑްލީ އަށް ކަނޑައަޅާފައި އޮތީ ސެޕްޓެމްބަރު މަހުގެ 21 އިން ފެށިގެން، އޮކްޓޫބަރު މަހުގެ އަށް ވަނަ ދުވަހުގެ ނިޔަލަށެވެ.

އެގޮތުން ފުރަތަމަ މެޗުގައި ސެޕްޓެމްބަރު މަހުގެ 28 ވަނަ ދުވަހު ރާއްޖެ އިން ކިރްގިސްތާންއާ ދެކޮޅަށް ކުޅޭއިރު، ދެ ވަނަ މެޗުގައި ލުބުނާންއާ ދެކޮޅަށް ކުޅެން އޮތީ އޮކްޓޫބަރު މަހުގެ އެއް ވަނަ ދުވަހު އެވެ. މި ދެ މެޗު ވެސް ކުޅުމަށް ހަމަޖެހިފައި ވަނީ ކިރްގިސްތާންގެ ބިޝްކެކްގަ އެވެ.

ކިރްގިސްތާން އާއި ލުބުނާން މެޗު އިއުލާންކުރި ފަހުން އެފްއޭއެމް އިން ވަނީ ޗައިނާއާ ދެކޮޅަށް ވެސް މެޗެއް ކުޅުމަށް ހަމަޖެއްސުމަށް މަސައްކަތްކޮށްފަ އެވެ. އަންގާރަ ދުވަހު އެފްއޭއެމް އިން ވަނީ އެ މެޗު ވެސް ހަމަޖެހިފައިވާ ކަމަށް ހާމަކޮށްފަ އެވެ. އެގޮތުން ޗައިނާއާ ދެކޮޅަށް ރާއްޖެ އިން ކުޅޭނީ މި ހިނގާ ސެޕްޓެމްބަރު މަހުގެ 24 ވަނަ ދުވަހު އެވެ. މި މެޗު ކުޅޭނީ ޗައިނާގެ ޗޮންގްގިންގަ އެވެ. 

ރާއްޖެ އިން ވަނީ މިހާތަނަށް ހަ ފަހަރެއްގެ މަތިން ޗައިނާއާ ދެކޮޅަށް ކުޅެފަ އެވެ. އެ ހަ މެޗުގައި ވެސް ޗައިނާ އިން ވަނީ ރާއްޖެ ބަލިކޮށްފަ އެވެ. ހަމައެހެންމެ ރާއްޖެ އިން ވަނީ ކިރްގިސްތާާން އާއި ލުބުނާާންއާ ދެކޮޅަށް ވެސް މީގެ ކުރިން ކުޅެފަ އެވެ. ލުބުނާންއާ ދެކޮޅަށް ކުޅުނު ފަސް މެޗުން ވެސް ރާއްޖެ ބަލިވެފައިވާއިރު، ރާއްޖެ އިން ވަނީ ކިރްގިސްތާން އަތުން ދެ ފަހަރު މޮޅުވެފަ އެވެ. އަނެއް ދެ ފަހަރު ރާއްޖެ ވަނީ އެ ޓީމު އަތުން ބަލިވެފަ އެވެ.