އެފްއޭއެމް އިން އަމަލުކުރި ގޮތާމެދު ގަމު ފުޓްސަލް ޓީމުގެ ކަންބޮޑުވުން

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ކުރިއަށްގެންދާ، އެފްއޭއެމް އެޓޯލް ފުޓްސަލް ޗެމްޕިއަންޝިޕްގައި ވާދަކުރާ ލ. ގަމު ފުޓްސަލްގެ ޓީމުން ކަންބޮޑުވުން ފާޅުކޮށްފި އެވެ.

ގަމު ފުޓްސަލް ޓީމުން އާންމު ކޮށްފައިވާ ނޫސް ބަޔާނެއްގައި ބުނެފައި ވަނީ، ލ.އަތޮޅު ބުރުގެ މެޗުތައް ކުޅޭ ތާރީޚަށް އެފްއޭއެމް އިން ތަކުރާރުކޮށް ބަދަލު ގެންނަމުންދާތީ އެ ޓީމަށް ގެއްލުން ލިބިފައިވާ ކަމަށެވެ. 

އެގޮތުން މުބާރާތުގެ ފުރަތަމަ މެޗު ކުޅުމަށް އެންމެ ފުރަތަމަ ތާވަލުކޮށްފައި ވަނީ މިދިޔަ ބުރާސްފަތި ދުވަހު އެވެ. ނަމަވެސް، ބުރާސްފަތި ދުވަހުގެރޭ އެފްއޭއެމް އިން ވަނީ މެޗު ހުކުރު ދުވަހަށް ފަސްކޮށްފައިވާކަން އަންގާފައި ކަމަށް އެ ޓީމުން ބުނެފައިވެ އެވެ. އޭގެ ފަހުން ހުކުރު ދުވަހު ވެސް މެޗު ކުޅެވެން ނެތް ކަމަށް، އެ ދުވަހުގެ ހެނދުނު އަންގާފައިވާ ކަމަށް ބުނެފައިވެ އެވެ.

ގަމު ފުޓްސަލް ޓީމުން ބުނެފައި ވަނީ، އެފްއޭއެމް އިން މިފަދަ މުބާރާތެއް ބާއްވާތީ އެ ކުލަބުން އުފާކުރާ ކަމަށެވެ. ނަމަވެސް، ބޮޑެތި ޚަރަދުތަކެއް ކޮށްގެން މުބާރާތުގައި ވާދަކުރާއިރު، ތަކުރާރުކޮށް މުބާރާތުގެ ތާރީޚަށް ބަދަލު ގެނައުމަކީ މާލީ ގޮތުން ގެއްލުން ލިބުމުގެ އިތުރުން، ކުޅުންތެރިންގެ މޯޓިވޭޝަން އަށް އަސަރު ކުރާނެ ކަމެއް ކަމަށް ބުނެފައިވެ އެވެ.

އަނެއްކޮޅުން މާލޭގައި ވަޒީފާ އަދާކުރަމުން އަންނަ ކުޅުންތެރިން ޗުއްޓީ ނަގައި، އަދި ވަޒީފާ އިން ރިލީޒް ހޯދާފައި ވަނީ އެފްއޭއެމް އިން ހިއްސާކޮށްފައިވާ ޝެޑިއުަލްއާ އެއްގޮތަށް ކަމަށް ވެސް ބުނެފައިވެ އެވެ. އެފްއޭއެމް އިން މިގޮތަށް އަމަލު ކުރުމުން ރަށް ރަށުގައި އެފްއޭއެމް އަށް އޮތް އިތުބާރު ގެއްލޭ ކަމަށް އެ ކުލަބުން ބުނެފައިވެ އެވެ.

ގަމު ފުޓްސަލް ޓީމުން ބުނެފައި ވަނީ ފުޓްސަލް ކުރިއެރުވުމުގެ މަޤުސަދުގައި މިފަދަ މުބާރާތްތައް ބާއްވާއިރު، މިހާރަށް ވުރެ ހިންގުންތެރިކަމާ އެކު ކުރިއަށް ގެންދިޔުމަށް އެދޭ ކަމަށެވެ.