އެޓޯލް ޗެމްޕިއަންޝިޕް އޮކްޓޫބަރު 17 ގައި ފަށަނީ

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އެޓޯލް ޗެމްޕިއަންޝިޕް އަންނަ އޮކްޓޫބަރު މަހުގެ ތެރޭގައި ބާއްވަން ނިންމައި، އެ މުބާރާތުގައި ބައިވެރިވުމުގެ ފުރުސަތު ހުޅުވާލައިފި އެވެ. 

އެފްއޭއެމް އިން އާންމުކޮށްފައިވާ ގޮތުގައި އެ އެސޯސިއޭޝަންގެ 2027/2026 ވަނަ އަހަރުގެ ފުޓުބޯޅަ ކަލަންޑަރުގައި ހިމެނޭ އެޓޯލް ޗެމްޕިއަންޝިޕް ކުރިއަށް އޮތް އޮކްޓޫބަރު މަހުގެ 17 ވަނަ ދުވަހު ފަށަން ނިންމާފައިވާ ކަމަށެވެ. އެހެންކަމުން އެ މުބާރާތުގައި ބައިވެރިވާން ބޭނުންވާ ރަށްތަކުން މި ހިނގާ ސެޕްޓެމްބަރު މަހުގެ 20 ވަނަ ދުވަހުގެ ކުރިން މުބާރާތުގައި ބައިވެރިވާން ބޭނުންވާ ލިޔުންތައް ހުށަހެޅުމަށް އެފްއޭއެމް އިން ވަނީ އެދިފައި އެވެ.

މީގެ އިތުރުން އެފްއޭއެމް އިން ބުނެފައި ވަނީ، ރީޖަންތަކުގައި މެޗުތައް ކުޅޭނެ ތާރީޚުތައް މުބާރާތުގައި ޓީމުތައް ބައިވެރިވެ ނިމުމުން ފަހުން އިއުލާން ކުރާނެ ކަމަށެވެ. އެފްއޭއެމް އިން މިހާރު ވަނީ ރާއްޖެ ހަތަރު ޒޯން އަކަށް ބަހާލައިފަ އެވެ. އެއީ ނޯތު ރީޖަން އާއި، ސެންޓްރަލް ރީޖަން އާއި ސައުތު ރީޖަން އަދި މާލެ ރީޖަން އެވެ. މީގެ ތެރެއިން ނޯތު، ސެންޓްރަލް އަދި ސައުތު ރީޖަންގެ ދިވެހި ޕްރިމިއާ ލީގަށް ކޮލިފައިވުމުގެ މަރުހަލާ ފެށުމަށް ހަމަޖެހިފައި ވަނީ އެޓޯލް ޗެމްޕިއަންޝިޕް އިންނެވެ.