15000 ރުފިޔާގެ ޖޫރިމަނާއަކާ އެކު، 10 މެޗަށް ސަސްޕެންޑުކޮށް، އެފްއޭއެމް އިން ސުޒެއިރު އަށް ފިޔަވަޅު އަޅައިފި
28 ސެޕްޓެމްބަރު 2026 | ހޯމަ 01:59މުބީން ވިދާޅުވެފައި ވަނީ، އެފްއޭއެމް އިން އެ މައްސަލަ ބަލަމުން އަންނާތީ ނިއު ރޭޑިއަންޓް އިން ފުލުހަށް ހުށަހެޅި މައްސަލަ އަނބުރާ ގެނައީ ކަމަށް
މާޒިޔާގެ އެސިސްޓެންޓް ކޯޗު އަހުމަދު ސުޒެއިރު | ސޯޝަލް މީޑިއާ
މާޒިޔާ ސްޕޯޓްސް އެންޑް ރެކްރިއޭޝަންގެ އެސިސްޓެންޓް ކޯޗު އަޙުމަދު ސުޒެއިރު މާރާމާރީ ހިންގި ކަމަށް ބުނާ މައްސަލަ ބެލުމަށް ފަހު، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޑިސިޕްލިނަރީ ކޮމެޓީ އިން އޭނާ އަށް ފިޔަވަޅު އަޅައިފި އެވެ.
ދިވެހި ޕްރިމިއާ ލީގުގައި މާޒިޔާ އާއި ނިއު ރޭޑިއަންޓް ބައްދަލުކުރި މެޗުގައި ހިނގި ހަމަނުޖެހުންތަކެއްގެ ތެރޭގައި ސުޒެއިރު ވަނީ، ނިއު ރޭޑިއަންޓްގެ އެސިސްޓެންޓް ކޯޗު ލޫޝިއާނޯ ސިގޭރާ ބާބޯސާގެ މޫނުމަތީގައި ޖަހައި ހަމަލާ ދީފަ އެވެ. އެ މެޗުގައި ސުޒެއިރު އަށް ރަތް ކާޑު ދެއްކިއިރު، ނިއު ރޭޑިއަންޓް އިން ވަނީ އެކަން ކުށްވެރިކޮށް ބަޔާނެއް ނެރެފަ އެވެ.
އޭގެ ފަހުން ނިއު ރޭޑިއަންޓް އިން ވަނީ އެ މައްސަލަ ފުލުހަށް ހުށަހަޅައިފަ އެވެ. ފުލުހުން ވަނީ އެ މެޗުގައި ސުޒެއިރު މާރާމާރީ ހިންގި މައްސަލައެއް އެ އިދާރާ އަށް ހުށަހަޅާފައިވާ ކަމަށް ވެސް ބުނެފަ އެވެ. ނަަމަވެސް، އެ މައްސަލައިގެ އިތުރު ތަފްސީލެއް ފުލުހުން ހިއްސާކޮށްފައިނުވެ އެވެ.
ނިއު ރޭޑިއަންޓްގެ އެސިސްޓެންޓް ކޯޗަށް ސެޒެއިރު ހަމަލާ ދިން މައްސަލަ ފުލުހުން ބަލަން ފަށައިފި
އޭގެ ފަހުން ނިއު ރޭޑިއަންޓްގެ ޗެއާމަން އަހުމަދު މުބީން ބައެއް މީޑިއާތަކަށް ވިދާޅުވެފައި ވަނީ، އެ ކުލަބުން ފުލުހަށް ހުށަހެޅި ސުޒެއިރުގެ މައްސަލަ އަނބުރާ ގެނެސްފައިވާ ކަމަށެވެ. މުބީން ވިދާޅުވެފައި ވަނީ، އެފްއޭއެމް އިން އެ މައްސަލަ ބަލަމުން އަންނާތީ ނިއު ރޭޑިއަންޓް އިން ފުލުހަށް ހުށަހެޅި މައްސަލަ އަނބުރާ ގެނައީ ކަމަށެވެ.
ނިއު ރޭޑިއަންޓް އިން ފުލުހަށް ހުށަހެޅި މައްސަލަ އަނބުރާ ގެނެސްފައި ވަނިކޮށް، އެފްއޭއެމް އިން އާދީއްތަ ދުވަހުގެރޭ ނެރުނު ބަޔާނެއްގައި ބުނެފައި ވަނީ، އެ މައްސަލަ ބެލުމަށް ފަހު ސުޒެއިރު އަށް ފިޔަވަޅު އަޅާފައިވާ ކަމަށެވެ. އެގޮތުން އެފްއޭއެމް އިން ވަނީ ސުޒެއިރު 10 މެޗަށް ސަސްޕެންޑު ކުރުމާއެކު، 15،000 (ފަނަރަ ހާސް) ރުފިޔާ އިން ޖޫރިމަނާކޮށްފަ އެވެ. އަދި އެ ފައިސާ 15 ދުވަހުގެ ތެރޭގައި ދެއްކުމަށް ވެސް ވަނީ އަންގައިފަ އެވެ.
މީގެ އިތުރުން އެ މައްސަލަ އިސްތިއުނާފު ކުރަން ބޭނުންވާ ނަމަ، ތިން ދުވަހުގެ ތެރޭގައި އެކަން ލިޔުމުން އެންގުމަށް ވެސް އެފްއޭއެމް އިން ވަނީ ބުނެފަ އެވެ.
އެ މައްސަލައާ ގުޅޭ ގޮތުން ނިއު ރޭޑިއަންޓް އިން މީގެ ކުރިން ނެރެފައިވާ ބަޔާނެއްގައި ބުނެފައި ވަނީ، ސުޒެއިރުގެ މައްސަލަ އެފްއޭއެމް އަށް ހުށަހަޅާފައިވާ ކަަމަށެވެ. އަދި ޖިސްމާނީ ގޮތުން އަނިޔާ ދިނުމަކީ، ނުވަތަ ހަމަލާ ދިނުމަކީ ފުޓުބޯޅައިގައި ހިނގައިގެން ވާނެ ކަމެއް ނޫން ކަމަށް އެ ކުލަބުން ބުނެފައިވެ އެވެ. އެކަމުގެ ސަބަބުން ފުޓުބޯޅައިގައި އޮންނަން ޖެހޭ ރައްކާތެރިކަން އަދި ސަލާމަތްތެރިކަމަށް ހީނަރުކަން އަންނަ ކަމަށް ވެސް އެ ބަޔާނުގައި ވަނީ ބުނެފަ އެވެ.
ސުޒެއިރުގެ މައްސަލަ އެފްއޭއެމް އަށް ހުށަހަޅާފައިވާކަން ފާާހަގަކޮށް ނިއު ރޭޑިއަންޓް އިން ބުނީ، ސުޒެއިރުއާ ދެކޮޅަށް އެންމެ އެކަށީގެންވާ ފިޔަވަޅު އެޅުމަށް އެ ކުލަބުން ގޮވާލާ ކަމަށެވެ. ހަމައެހެންމެ އެ ޓީމުގެ ކުޅުންތެރިންނާއި އޮފިޝަލުންގެ ރައްކާތެރިކަން ޔަޤީން ކުރަން ބޭނުންވާ ކަމަށް ވެސް ނިއު ރޭޑިއަންޓް އިން ބުނެފައިވެ އެވެ.
އެ މެޗުގައި ނިއު ރޭޑިއަންޓް އިން ވަނީ 3-2 އިން މާޒިޔާ ބަލިކޮށްފަ އެވެ. މިއީ 2018 ވަނަ އަހަރުގެ ފަހުން ނިއު ރޭޑިއަންޓް އަށް މާޒިޔާ ބަލި ކުރެވުނު ފުރަތަމަ ފަހަރެވެ. ހަމައެހެންމެ، 2022 ވަނަ އަހަރުގެ ލީގުގެ ފަހުން، މާޒިޔާ ލީގުގެ މެޗަކުން ބަލިވި މިއީ ފުރަތަމަ ފަހަރެވެ.
