އޭއެފްސީ އިން އެފްއޭއެމްގެ ދަރަނި މައާފުކޮށްދީ، ފަންޑިން ސަސްޕެންޝަން އުވާލައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެެފްއޭއެމް) އިން އޭޝިއަން ފުޓުބޯޅަ ކޮންފަޑެރޭޝަން (އޭއެފްސީ) އަށް ދައްކަން ޖެހޭ ދަރަނި މައާފުކޮށްދިނުމާ އެކު، އެފްއޭއެމްގެ ފަންޑިން ސަސްޕެންޝަން އުވާލައިފި އެވެ. 

އެފްއޭއެމް އިން އާންމުކޮށްފައިވާ ބަޔާނެއްގައި ބުނެފައި ވަނީ، އޭއެފްސީ އިން މައާފުކޮށްދީފައި ވަނީ އެ އިދާރާ އިން އެެފްއޭއެމް އަށް ދައްކަން އޮތް 253،030 (ދެ ލައްކަ ފަންސާސް ތިން ހާސް، ތިރީސް) އެމެރިކާ ޑޮލަރު ކަމަށެވެ. މިއީ ގާތް ގަނޑަކަށް 3.9 މިލިއަން ދިވެހި ރުފިޔާ އެވެ. މި ދަރަނި މައާފުކޮށްދިނުމަށް ނިންމާފައި ވަނީ އޭއެފްސީގެ ހިންގާ ކޮމެޓީ އިންނެވެ. 

މި ދަރަންޏަކީ އެފްއޭއެމްގެ ކުރީގެ އިސްވެރިންގެ އިހުމާލުން އެ އިދާރާގެ ބޮލުގައި އެޅިފައި އޮތް ދަރަންޏެކެވެ. އެގޮތުން 2023 ވަނަ އަހަރު އޭއެފްސީ އިން އެފްއޭއެމް އަށް ދީފައިވާ ފައިސާ ނަހަމަ ގޮތުގައި ބޭނުންކޮށްފައިވާކަން އޮޑިޓް އިން ވަނީ ފާހަގަވެފަ އެވެ. އެއާ އެކު އޭއެފްސީ އިން ވަނީ އެ ފައިސާ އަލުން އަނބުރާ ދެއްކުމަށް އެފްއޭއެމް އަށް އަންގައިފަ އެވެ. އަދި 2024 ވަނަ އަހަރު އޭއެފްސީ އިން ވަނީ އެފްއޭއެމްގެ ފަންޑު ސަސްޕެންޑުކޮށްފަ އެވެ.

އެފްއޭއެމްގެ މިހާާރު އިސްވެރިން ވަނީ އެ ފައިސާ މައާފުކޮށްދިނުމަށް އޭއެފްސީގައި އެދިފަ އެވެ. އެ ފައިސާ ދެއްކުން މައާފުކޮށްދިނުމާ އެކު، 2027 ވަނަ އަހަރުން ފެށިގެން އޭއެފްސީގެ ފައިނޭންޝަލް ޕްރޮގްރާމްތަކަށް ކުރިމަތިލުމުގެ ފުރުސަތު ވެސް އެ އިދާރާ އިން ވަނީ އެފްއޭއެމް އަށް ދީފަ އެވެ. އެފްއޭއެމް އިން ބުނީ އެ ނިންމުމަކީ، ދިވެހިރާއްޖޭގެ ފުޓުބޯޅަ އަލުން އާރާސްތުކޮށް، މާލީ ގޮތުން ހަމަ މަގަށް އަޅުވައި، ކުރިއަށް އޮތް ތަނުގައި އޭއެފްސީގެ އެހީތެރިކަމާ އެކު ފުޓުބޯޅަ ކުރިއަރުވަން ލިބުނު ފުރުސަތެއް ކަމަށެވެ.