ރާއްޖެ އިން ކިރްގިސްތާާން އާއި ލުބުނާންއާ ދެކޮޅަށް މެޗެއް ކުޅެނީ

ރާއްޖޭގެ ސީނިއާ ޤައުމީ ފުޓުބޯޅަ ޓީމުން ކިރްގިސްތާން އާއި ލުބުނާާންއާ ދެކޮޅަށް ރަހުމަތްތެރިކަމުގެ މެޗުތަކެއް ކުޅެން ހަމަޖެހިއްޖެ އެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ހާމަކޮށްފައިވާ ގޮތުގައި މިއީ ކުރިއަށް އޮތް ފީފާ އިންޓަނޭޝަނަލް ބްރޭކާ ދިމާކޮށް ކުޅޭ ދެ މެޗެވެ. ފުރަތަމަ މެޗުގައި ރާއްޖެ އިން ކިރްގިސްތާންއާ ދެކޮޅަށް ކުޅޭނީ ސެޕްޓެމްބަރު މަހުގެ 28 ވަނަ ދުވަހު އެވެ. އަދި އެއަށް ފަހު ލުބުނާންއާ ދެކޮޅަށް ކުޅޭނީ އޮކްޓޫބަރު މަހުގެ އެއް ވަނަ ދުވަހު އެވެ.

ފީފާ ބްރޭކުގަައި ރާއްޖެ އިން ކުޅޭ މެޗުތައް އިއުލާާނުކުރުމަށް އެފްއޭއެމް އިން އާންމުކުރި ޕޯސްޓު | އެފްއޭއެމް

ރާއްޖޭގެ ފުޓުބޯޅަ ސީޒަން ފަށާފައިވާާއިރު، ދިވެހި ޕްރިމިއާ ލީގުގެ ކުޅުން ފަށާނީ ސެޕްޓެމްބަރު މަހުގެ 10 ވަނަ ދުވަހު އެވެ. ލީގު ފެށުމަށް ފަހު، ޤައުމީ ޓީމުގެ ބްރޭކުގެ ގޮތުގައި ކަނޑައަޅާފައި ވަނީ ސެޕްޓެމްބަރު މަހުގެ 25 ވަނަ ދުވަހެވެ. އެ ދުވަހުން ފެށިގެން، އޮކްޓޫބަރު މަހުގެ އަށް ވަނަ ދުވަހާ ހަމައަށް އެއީ ޤައުމީ ޓީމުގެ ބްރޭކު ކަމަށް ވަނީ ކަނޑައަޅައިފަ އެވެ. 

ރާއްޖެ އިން ކިރްތިސްތާން އާއި ލުބުނާންއާ ދެކޮޅަށް މެޗުތަކެއް ކުޅޭއިރު، ޤައުމީ ޓީމަށް އެންމެ އަވަހަށް އޮތް މުބާރާތަކީ ސާފް ޗެމްޕިއަންޝިޕް އެވެ. އެ މުބާރާތް ކުރިއަށް ދަނީ ބަންގްލަދޭޝްގައި ކަމަށްވާއިރު، ރާއްޖެ ހިމެނިފައި ވަނީ ގުރޫޕު އޭގަ އެވެ. ރާއްޖެ އާއެކު މި ގުރޫޕުގައި އޮތީ އިންޑިއާ އާއި ޕާކިސްތާން އެވެ.

މީގެ ކުރިން ވެސް ރާއްޖެ އިން ވަނީ ކިރްގިސްތާާން އާއި ލުބުނާާންއާ ދެކޮޅަށް ކުޅެފަ އެވެ. ލުބުނާންއާ ދެކޮޅަށް ކުޅުނު ފަސް މެޗުން ވެސް ރާއްޖެ ބަލިވެފައިވާއިރު، ރާއްޖެ އިން ވަނީ ކިރްގިސްތާން އަތުން ދެ ފަހަރު މޮޅުވެފަ އެވެ. އަނެއް ދެ ފަހަރު ރާއްޖެ ވަނީ އެ ޓީމު އަތުން ބަލިވެފަ އެވެ.