ކޯޗާ މައްސަލަ ޖެހި ރޮނާލްޑޯ ޓީމު ދޫކޮށްލުމާއެކު، ޕޯޗުގަލް އިން ބުނީ ބާކީ ތިބި ކުޅުންތެރިންނާއެކު މެޗަށް ފުރިހަމައަށް ތައްޔާރުވާނެ ކަމަށް

ޕޯޗުގަލް ޤައުމީ ޓީމުގެ ކޯޗު ޖޯޖް ޖީސޫސްއާ މައްސަލަ ޖެހި، އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ ޓީމު ދޫކޮށްލި މައްސަލައިގައި ޕޯޗުގަލްގެ ފުޓުބޯޅަ ފެޑެރޭޝަން އިން ބަޔާނެއް ނެރެފި އެވެ.

ޕޯޗުގަލް އިން ޔުއެފާ ނޭޝަންސް ލީގުގައި ބުރާސްފަތި ދުވަހުގެރޭ ޑެންމާކްއާ ދެކޮޅަށް ނުކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޖީސޫސް ވަނީ ރޮނާލްޑޯއާ އެއްވެސް މައްސަލައެއް ނެތް ކަމަށް ބުނެފަ އެވެ. އޭގެ ކުރިން ޕޯޗުގަލް އިން ނޯވޭއާ ދެކޮޅަށް ކުޅުނު މެޗުގައި ރޮނާލްޑޯ އަށް ފުރުސަތު ދީފައި ނުވެ އެވެ. 

ޖީސޫސްގެ ނޫސްވެރިންގެ ބައްދަލުވުން ނިމުނުތާ ގިނައިރުތަކެއް ނުވަނީސް ރޮނާލްޑޯ ވަނީ، އޭނާ ޤައުމީ ޓީމުގެ ކޭމްޕް ދޫކޮށްލަން ނިންމިކަން އިއުލާންކޮށްފަ އެވެ. އެގޮތުން ޕޯޗުގަލް ފުޓުބޯޅަ ފެޑެރޭޝަންގެ ރައީސް އާއި ކޯޗު ޖީސޫސްއާ މަޝްވަރާ ކުރުމަށް ފަހު އެ ނިންމުން ނިންމީ ކަމަށް ރޮނާލްޑޯ ބުނެފައިވެ އެވެ. 

ރޮނާލްޑޯ ބުނީ ޤައުމީ ޓީމުގެ ކޭމްޕް ދޫކޮށް އޭނާ ދާން ޖެހުނު ސަބަބު، އެންމެ ރަނގަޅު ވަގުތުގައި ޕޯޗުގަލްގެ ރައްޔިތުންނާ ހިއްސާކުރާނެ ކަމަށެވެ. ޕޯޗުގަލް ޤައުމީ ޓީމަށް ހުރިހާ ޚިދުމަތެއް ކުރުމުގައި އަބަދުވެސް ދެމިހުރިކަން ފާހަގަކޮށް ރޮނާލްޑޯ ބުނީ، މިއީ ޕޯޗުގަލްގެ ޓީމާއި ކުޅުންތެރިންނަށް ކާމިޔާބަށް އެދެންވީ ވަގުތު ކަމަށެވެ. 

މި ހާދިސާއާ ގުޅިގެން ޕޯޗުގަލް ފުޓުބޯޅަ ފެޑެރޭޝަން އިން ވެސް ރަސްމީ ބަޔާނެއް ނެރެފައިވެ އެވެ. އެ ބަޔާނުގައި ބުނެފައިވަނީ ރޮނާލްޑޯ ޤައުމީ ޓީމުގެ ކޭމްޕު ދޫކޮށްލާފައިވާ ކަމަށެވެ. އަދި ކުރިއަށް އޮތް މެޗުތަކަށް ތައްޔާރުވުމުގެ މަސައްކަތް ބާކީ ތިބި 24 ކުޅުންތެރިންނާއެކު ވަރަށް ބޮޑު ސަމާލުކަމާއެކު ކުރިއަށް ގެންދާނެ ކަމަށް ފެޑެރޭޝަން އިން ބުނެފައިވެ އެވެ.

ރޮނާލްޑޯ ޤައުމީ ޓީމުގެ ކޭމްޕު ދޫކޮށްލި ސަބަބުތައް މިހާތަނަށް ރަސްމީކޮށް ހާމަކޮށްފައި ނުވެ އެވެ. ޕޯޗުގަލް ޤައުމީ ޓީމުގައި އެންމެ މުހިންމު ކުޅުންތެރިޔެއްގެ ގޮތުގައި ހުރި ރޮނާލްޑޯ ކޭމްޕު ދޫކޮށްލާފައިވާއިރު، ނޯވޭ މެޗުގައި އޭނާ އަށް ފުރުސަތު ނުދިނީ އަނިޔާގެ މައްސަލައެއް އުޅޭތީއެއް ނޫނެވެ. އެކަމުގެ ސަބަބުން ރޮނާލްޑޯ އާއި ޖީސޫސްއާ ދެމެދު މައްސަލަ ޖެހިފައިވާ ކަަމަށް ރިޕޯޓުތައް ބުނެ އެވެ.