ޕޯޗުގަލް އިން ނޯވޭ ބަލިކުރި މެޗުގައި، ރޮނާާލްޑޯ އަށް ފުރުސަތެއް ނުދިން

ޔުއެފާ ނޭޝަންސް ލީގުގައި ނޯވޭއާ ދެކޮޅަށް ކުޅުނު މެޗުން ޕޯޗުގަލް މޮޅުވެއްޖެ އެވެ.

އާދިއްތަ ދުވަހުގެރޭ ކުޅުނު މެޗު ޕޯޗުގަލް އިން ކާމިޔާބު ކުރީ 2-1 އިންނެވެ. މެޗުގައި ޕޯޗުގަލް އިން ލީޑު ނަގާފައި ވަނިކޮށް، ނޯވޭ އިން ނަތީޖާ ހަމަހަމަ ވެސް ކުރި އެވެ. ނަމަވެސް، ދެވަނަ ލަނޑެއް ޖަހައިގެން ޕޯޗުގަލް ވަނީ މެޗުން މޮޅުވެފަ އެވެ.

މެޗު ފަށައިގެން 17 ވަނަ މިނެޓުގައި ޕޯޗުގަލް އަށް ލީޑު ނަގައިިދނީ ޔާއޯ ފެލިކްސް އެވެ. އެއީ ޕެޑްރޯ ނެޓޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. ނަމަވެސް، މެޗުގެ ދެވަނަ ހާފު ފަށައިގެން ހަ ވަނަ މިނެޓުގައި އާލިން ހާލަންޑު ވަނީ ލަނޑު ޖަަހައި ނޯވޭ އަށް ނަތީޖާ ހަމަހަމަކޮށްދީފަ އެވެ. ނޯވޭ އިން ނަތީޖާ ހަމަހަމަކުރިތާ ތިންް މިނެޓު ފަހުން ޕޯޗުގަލް އަށް އަލުން ލީޑު ނަގައިދިނީ ގޮންޒާލޯ ރާމޯސް އެވެ. 

ނޯވޭ ބަލިކޮށް ޕޯޗުގަލް އިން ދެވަނަ މޮޅު ހޯދިއިރު، އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ އަށް މެޗުގައި ފުރުސަތު ދީފައި ނުވެ އެވެ. މެޗު ފެށިއިރު ރޮނާލްޑޯ ބެންޗުގައި ހިމަނާފައި އިންއިރު، ބަދަލު ކުޅުންތެރިޔެއްގެ ގޮތުގައި ވެސް ރޮނާލްޑޯ އަށް ފުރުސަތު ދީފައި ނުވެ އެވެ. ނޯވޭ ބަލިކޮށް، ދެ މެޗުން ހަ ޕޮއިންޓާ އެކު ޕޯޗުގަލް އޮތީ އެއްވަނައިގަ އެވެ.