10 އަހަރު ވަންދެން ލޯބީގެ ގޮތުން ގުޅިގެން އުޅުމަށް ފަހު، ރޮނާލްޑޯ އާއި ޖޯޖީނާ ކައިވެނިކޮށްފި

ދުނިޔޭގެ އެންމެ މޮޅު އެއް ފުޓުބޯޅަ ކުޅުންތެރިޔާ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ، އޭނާ ގިނަ ދުވަސްތަކެއް ވަންދެން ލޯބީގެ ގޮތުން ގުޅިގެން އުޅުނު ޖޯޖީނާ ރޮޑްރިގޭޒްއާ ކައިވެނިކޮށްފި އެވެ. 

ޕޯޗުގަލްގައި ބޭއްވި އާންމު ރަސްމިއްޔާތެއްގައި މި ދެމީހުން ކައިވެނިކުރިކަން ރޮނާލްޑޯ ވަނީ އޭނާގެ ރަސްމީ އިންސްޓަގްރާމް އެކައުންޓު މެދުވެރިކޮށް އާންމުކޮށްފައި އެވެ.

ރޮނާލްޑޯ އިންސްޓަގްރާމްގައި ހިއްސާކުރި ފޮޓޯ އިން ފެންނަނީ ކައިވެނީގެ އަނގޮޓި އަޅައިގެން ތިބި ދެމީހެއްގެ އަތެވެ. ބެލެވޭ ގޮތުގައި އެއީ ޖޯޖީނާގެ އަތް މަތީގައި ރޮނާލްޑޯ އަތް ބާއްވާލައިގެން އިން ފޮޓޯ އެކެވެ. މި ފޮޓޯ އާންމުކުރިތާ އެންމެ 30 މިނެޓު ތެރޭގައި ތިންް މިލިއަނަށް ވުރެ ގިނަ މީހުން ވަނީ އެ ފޮޓޯ އަށް ލައިކް ދީފަ އެވެ. މިހާރު ޖުމްލަ 18 މިލިއަނަށް ވުރެ ގިނަ މީހުން ވަނީ އެ ފޮޓޯ އަށް ލައިކް ދީފައި އެވެ. 

ޕޯޗުގަލްގެ މީޑިއާތަކުން "އަހަރުގެ ކައިވެނި" ގެ ގޮތުގައި ސިފަކުރާ މި ކައިވެނި ބާއްވާފައި ވަނީ އަންގާރަ ދުވަހު އެވެ. މި ރަސްމިއްޔާތު އޮތީ ޕޯޗުގަލްގެ ވެރި ރަށް ލިޒްބަންއާ ކައިރީގައި އޮންނަ އައްސޭރިފަށުގެ ރަށެއް ކަމަށްވާ ކަސްކައިސްގައި އެވެ. މި ކައިވެނީގެ ރަސްމިއްޔާތުގައި މި ދެމީހުންގެ ފަސް ދަރިން ވެސް ބައިވެރިވި ކަމަށް ރިޕޯޓުތައް ބުނެ އެވެ.

ރޮނާލްޑޯ އާއި ޖޯޖީނާ އެކުގައި އުޅޭތާ މިހާރު 10 އަހަރު ވެފައިވާއިރު، މި ދެމީހުން އެންމެ ފުރަތަމަ ބައްދަލުވީ މެޑްރިޑުގައި ހުންނަ ގޫޗީ ފިހާރަ އަކުންނެވެ. އެ ދުވަސްވަރު ޖޯޖީނާ އެ ފިހާރައިގައި މަސައްކަތް ކުރަމުންދިޔައިރު، ރޮނާލްޑޯ ކުޅެމުން ދިޔައީ ސްޕެއިންގެ ރެއާލް މެޑްރިޑަށެވެ. މި ދެމީހުން އެންގޭޖްވިކަން އިއުލާންކުރީ މިދިޔަ އަހަރުގެ އޯގަސްޓް މަހުގެ 11 ވަނަ ދުވަހު އެވެ. އެ ދުވަހު ޖޯޖީނާ ވަނީ ބޮޑު އަނގޮޓިއެއްގެ ފޮޓޯއާ އެކު، އޭނާގެ މާދަރީ ބަހުން "އާނއެކޭ، އަހަރެން ޤަބޫލު" ކަމަށް ލިޔެ ސޯޝަލް މީޑިއާގައި ހިއްސާކޮށްފައި އެވެ.

ދުނިޔޭގެ އެންމެ މޮޅު ކުޅުންތެރިޔާގެ މަގާމު އެތައް ފަހަރަކު ހޯދާފައިވާ ރޮނާލްޑޯ އަކީ އޭނާގެ ކެރިއަރުގައި މިހާތަނަށް ގިނަ ކާާމިޔާބީތަކެއް ހޯދާފައިވާ ކުޅުންތެރިޔެކެވެ. އޭނާ ވަނީ ޕޯޗުގަލްގެ ސްޕޯޓިން ލިޒްބަންގެ އިތުރުން މެންޗެސްޓަރ ޔުނައިޓެޑު، ރެއާލް މެޑްރިޑު އަދި ޔުވެންޓަސް އަށް ކުޅެފައި އެވެ. އަދި މިހާރު އޭނާ ކުޅެމުން އަންނަނީ ސައުދީ އަރަބިއްޔާގެ އަލް ނަސްރަށެވެ.