ވޯލްޑް ކަޕްގެ ނާާކާމިޔާބާ އެކު، ޕޯޗުގަލްގެ ކޯޗު މާޓިނޭޒް މަގާމުން ވަކިވެއްޖެ

ފީފާ ވޯލްޑް ކަޕް އިން ޕޯޗުގަލް ކެޓުމާ އެކު، އެ ޓީމަށް އިރުޝާދު ދެމުން އައި ރޮބާޓޯ މާޓިނޭޒް މަގާމުން ވަކިވެއްޖެ އެވެ.

ވޯލްޑް ކަޕް އިން ޕޯޗުގަލް ކަޓާފައި ވަނީ ގަދަ 16 ގައި ސްޕެއިންއާ ދެކޮޅަށް ކުޅުނު މެޗުން ބަލިވެގެންނެވެ. މުބާރާތުގެ ކުރިން ވެސް، މާޓިނޭޒް ޕޯޗުގަލްގެ ކޯޗު ކަމުން ވަކި ވާނެ ކަމުގެ އަޑު ތަކެއް މީޑިއާ ތަކުގައި ފެތުރިގެން ދިޔަ އެވެ.

ސްޕެއިން މެޗަށް ފަހު އޮތް ނޫސްވެރިންގެ ބައްދަލުވުމުގައި މާޓިނޭޒް ވަނީ، ޕޯޗުގަލްގެ ކޯޗުކަމުން އެނާ ވަކިވާން ނިންމިކަން އިއުލާން ކޮށްފައި އެވެ. އެކަން އިއުލާން ކުރަމުން މާޓިނޭޒް ބުނެފައި ވަނީ، ޕޯޗުގަލްއާ އޭނާ ހަވާލުވުމުގެ އެންމެ ބޮޑު މަގުސަދަކީ ވެސް ވޯލްޑް ކަޕް ކާމިޔާބު ކުރުން ކަމަށެވެ. އެކަން ނުކުރެވުމުން އޭނާ އިސްތިއުފާ ދޭން ނިންމީ ކަމަށާއި، ޕޯޗުގަލް އިން ދެން އައު ކޯޗެެއް ހަމަޖައްސާނެ ކަމަށް އޭނާ ބުންޏެވެ.

ޕޯޗުގަލްގެ ކޯޗަކަށް މާޓިނޭޒް ހަމަޖެއްސީ 2023 ވަނަ އަހަރުގެ ފެބްރުވަރީ މަހު އެވެ. އެއީ އޭނާގެ ކުރިން އެ މަގާމުގައި ހުރި ފެނާންޑޯ ސަންޓޯސްގެ ބަދަލުގައި އެވެ. ޕޯޗުގަލްއާ ހަވާލުވުމުގެ ކުރިން މާޓިނޭޒް ވަނީ ބެލްޖިއަމް އަށް ވެސް އިރުޝާދު ދީފައި އެވެ. މާޓިނޭޒްގެ އިރުޝާދުގެ ދަށުން ޕޯޗުގަލް އިން ވަނީ 45 މެޗު ކުޅެފައި އެވެ. އޭގެ ތެރެއިން 39 މެޗުން އެ ޓީމު މޮޅުވެފައިވާއިރު، ނުވަ މެޗުން ވަނީ އެއްވަރުވެފައި އެވެ. އަދި ބަލިވެފައި ވަނީ ހަ މެޗުންނެވެ.

މާޓިނޭޒްގެ އިރުޝާދުގެ ދަށުން ޕޯޗުގަލް އިން ވަނީ މިދިޔަ އަހަރުގެ ޔުއެފާ ނޭޝަންސް ލީގު ކާމިޔާބު ކޮށްފައި އެވެ.