ޕޯޗުގަލް ކަޓުވާލައި، ސްޕެއިން ކުއާޓާ ފައިނަލް އަށް
7 ޖުލައި 2026 | އަންގާރަ 04:46ސްޕެއިން އަތުން ބަލިވެ ޕޯޗުގަލް މުބާރާތުން ކެޓިއިރު، މި މެޗުގެ ކުރިން ރޮނާލްޑޯ ވަނީ މިއީ އޭނާގެ ފަހު ވޯލްޑް ކަޕް ކަމަށް އިއުލާން ކޮށްފައި. ރޮނާލްޑޯ ވަނީ އޭނާގެ ކެރިއަރުގައި ހަ ވޯލްޑް ކަޕްގައި ކުޅެ، ހަ ވޯލްޑް ކަޕްގައި ލަނޑު ވެސް ޖަހާފައި.
މެޗުގައި ލަނޑު ޖެހުމަށް ފަހު ސްޕެއިންގެ ކުޅުންތެރިން އުފާ ފާޅު ކުރަނީ. | ރޮއިޓާސް
ފީފާ ވޯލްޑް ކަޕްގެ ގަދަ 16 ގައި ޕޯޗުގަލްއާ ދެކޮޅަށް ކުޅުނު މެޗުން މޮޅުވެ، ސްޕެއިން އިން މުބާރާތުގެ ކުއާޓާ ފައިނަލް އިން ޖާގަ ހޯދައިފި އެވެ.
ހޯމަ ދުވަހުގެ ރޭ ދަންވަރު ކުޅުނު މެޗު ސްޕެއިން އިން ކާމިޔާބު ކުރީ 1-0 އިންނެވެ. ވާދަވެރި ކުޅުމެއް ފެނުނު މެޗުގައި ސްޕެއިން އިން ލަނޑު ޖެހީ ވެސް އެންމެ ފަހު ވަގުތުގެ ތެރޭގައި އެވެ.
މެޗުގެ ފުރަތަމަ ހާފުގައި ދެ ޓީމަށް ވެސް ވަނީ ލަނޑު ޖަހަން ފުރުސަތު ލިބިފައި އެވެ. ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އާއި، ޔާއޯ ފެލިކްސް އަށް ވެސް ލަނޑު ޖަހަން ފުރުސަތު ލިބުނެވެ. ސްޕެއިން އިން ޕޯޗުގަލް ކޮޅަށް ނުރައްކާ ކުރުމަށް ލަމީން ޔަމާލް އާއި މިކޭލް އޮޔާޒަބާލް ވެސް ވަނީ ހަމަލާ ތަކެއް ފޮނުވާލައިފަ އެވެ.
މެޗުގެ ފުރިހަމަ ވަގުތުގައި އެއްވެސް ޓީމަކަށް ލަނޑެއް ނުޖެހި އެއްވަރު ވާނެ ކަމަށް ބެލެވިފައި ވަނިކޮށް، ފަހު ވަގުތު ސްޕެއިން އިން ލަނޑު ޖެހި އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އެ ލަނޑު ޖެހީ މިކޭލް މެރީނޯ އެވެ. އެއީ ފެރާން ޓޮރޭސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގައި މެރީނޯ ކުޅެން ނިކުމެފައި ވަނީ ވެސް ބަދަލު ކުޅުންތެރިޔެއްގެ ގޮތުގައި އެވެ.
ސްޕެއިން އަތުން ބަލިވެ ޕޯޗުގަލް މުބާރާތުން ކެޓިއިރު، މި މެޗުގެ ކުރިން ރޮނާލްޑޯ ވަނީ މިއީ އޭނާގެ ފަހު ވޯލްޑް ކަޕް ކަމަށް އިއުލާން ކޮށްފައި އެވެ. ރޮނާލްޑޯ ވަނީ އޭނާގެ ކެރިއަރުގައި ހަ ވޯލްޑް ކަޕްގައި ކުޅެ، ހަ ވޯލްޑް ކަޕްގައި ލަނޑު ވެސް ޖަހައިފަ އެވެ.
