މިއީ ޕްރޮފެޝަނަލް ފުޓުބޯޅައިގެ ފަހު އަހަރު: ރޮނާލްޑޯ

މިހާރު ކުރިއަށްދާ ސީޒަން އަކީ ޕްރޮފެޝަނަލް ފުޓުބޯޅައިގައި އޭނާ ހޭދަ ކުރާނެ އެންމެ ފަހު ސީޒަން ކަމަށް، އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ބުނެފި އެވެ. 

ދާދި ފަހުން ދިން އިންޓަވިޔުއެއްގައި ރޮނާލްޑޯ ބުނެފައި ވަނީ، މިއީ އޭނާގެ ކެރިއަރުގެ ފަހު ސީޒަން ކަމަށެވެ. އެގޮތުން މި އަހަރަށް ފަހު ޕްރޮފެޝަނަލް ފުޓުބޯޅަ އިން ދުރަށް ދާން ނިންމާފައިވާ ކަމަށާއި، އޭނާ ބޭނުން ވަނީ ރީތި ލެގަސީއަކާ އެކު ކެރިއަރު ނިންމާލަން ކަމަށް ވެސް ރޮނާލްޑޯ ވަނީ ބުނެފައި އެވެ. އެއާ އެކު ރޮނާލްޑޯ ބުނީ، އެއަށް ފަހު މުސްތަޤުބަލުގައި ކުރާނެ ކަމެއް ޕްލޭން ކޮށްފައިވާ ކަމަަށެވެ.

އުމުރުން މިހާރު 41 އަހަރުވެފައިވާ ރޮނާލްޑޯ ބުނީ، އޭނާގެ ކެރިއަރުގައި މިހާތނަށް ވަރަށް ގިނަ ކަންކަން ޤުރުބާންކޮށްފައި ވާނެ ކަމަށެވެ. އަދި 25 އަހަރު ވަންދެން ޕްރޮފެޝަނަލް ފުޓުބޯޅަ ކުޅުމުގައި ދެމިހުރިއިރު، ވަރަށް ގިނަ ކަންތައްތަކެއް ކާމިޔާބު ކުރެވިފައިވާ ކަމަށް ވެސް ރޮނާލްޑޯ ބުންޏެވެ. އެކަންކަމަށް ބަލައި އޭނާގެ ބާކީ ދުވަސްތައް އާއިލާ އާއެކު ހޭދަކޮށް، ޝައުޤުވެރި އެހެން ކަންކަމުގައި އުޅެން ބޭނުންވާ ކަމަށް ވެސް ރޮނާލްޑޯ ވަނީ ބުނެފައި އެވެ.

ދުނިޔޭގެ މޮޅު ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު ފަސް ފަހަރު ކާމިޔާބު ކޮށްފައިވާ ރޮނާލްޑޯ އަކީ، މިހާތަނަށް ފުޓުބޯޅައިގައި އުފެދުނު އެންމެ މޮޅު އެއް ކުޅުންތެރިޔާާ އެވެ. ކުލަބު ލެެވެލްގެ އިތުރުން، ޤައުމީ ލެވެލްގައި ވެސް ރޮނާލްޑޯ ވަނީ ގިނަ ކާމިޔާބީތަކެއް ހޯދައިފަ އެވެ. ކެރިއަރުގައި މިހާތަނަށް 976 ލަނޑު ރޮނާލްޑޯ ޖަހާފައިވާއިރު، އޭނާގެ އަމާޒަކީ ކެރިއަރުގައި 1000 ލަނޑު ހަމަ ކުރުމެވެ. އެހެން ވެއްޖެ ނަމަ، ރޮނާާލްޑޯ ވަނީ ކެރިއަރުގައި 1000 ލަނޑު ހަމަކުރާ ފުރަތަމަ ކުޅުންތެރިޔާ އަށެވެ. 

މިހާރު ވެސް ރޮނާލްޑޯ އަކީ ބައިނަލްއަޤުވާމީ މައިދާނުގައި އެންމެ ގިނަ ލަނޑު ޖަހާފައިވާ ކުޅުންތެރިޔާ އެވެ. އޭނާ ވަނީ ސްޕޯޓިންގެ އިތުރުން، މެންޗެސްޓަރ ޔުނައިޓެޑާއި ރެއާލް މެޑްރިޑާއި ޔުވެންޓަސް އަދި އަލް ނަޞްރުގައި ވެސް ކުޅެފައި އެވެ. ކުލަބު ލެވެލްގައި ވެސް ރޮނާާލްޑޯ ވަނީ ފާހަގަކޮށްލެވޭ ގިނަ ކާމިޔާބީތަކެއް ހޯދައިފަ އެވެ.