ޔުއެފާ ނޭޝަންސް ލީގު: ޕޯޗުގަލް އިން ވޭލްސް ބަލިކުރިއިރު، ރޮނާލްޑޯގެ ލަނޑު ވީއޭއާރު އިން ބާތިލުކޮށްފި

ޔުއެފާ ނޭޝަންސް ލީގުގެ ގުރޫޕު ޑީގައި ވޭލްސްއާ ދެކޮޅަށް ކުޅުނު މެޗުން ޕޯޗުގަލް މޮޅުވެއްޖެ އެެވެ.

ބުރާސްފަތި ދުވަހުގެރޭ ކުޅުނު މެޗު ޕޯޗުގަލް އިން ކާމިޔާބު ކުރީ 1-0 އިންނެވެ. މެޗުގައި ޕޯޗުގަލް އިން ލަނޑު ޖެހީ ވެސް މެޗުގެ ފުރަތަމަ ހާފުގަ އެވެ.

މެޗު ފަށައިގެން ޕޯޗުގަލް އިން ރަނގަޅަށް ކުޅެމުން ދިޔައިރު، އެ ޓީމުން ވަނީ 22 ވަނަ މިނެޓުގައި ލަނޑު ޖަހައި ލީޑު ނަގައިފަ އެވެ. އެ ލަނޑު ޕޯޗުގަލް އަށް ޖަހައިދިނީ ޔާއޯ ފެލިކްސް އެވެ. އެ ލަނޑު ޖަހަަން ފެލިކްސް އަށް ފުރުސަތު ތަނަވަސްކޮށްދިނީ ނޫނޯ މެންޑޭސް އެވެ. 

އެ ލަނޑަށް ފަހު ވެސް ޕޯޗުގަލް އިން ވަނީ އިތުރު ލަނޑު ޖަހަން ފުރުސަތު ހޯދައިފަ އެވެ. މެޗުގެ ދެ ވަނަ ހާފު ފަށައިގެން 14 ވަނަ މިނެޓުގައި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަަލައި ނުގަންނަން ނިންމައިފަ އެވެ.

މިއީ ޕޯޗުގަލްގެ ކޯޗުކަމާ ހަވާލުވި ޖޯޖް ޖީސުސްގެ އިރުޝާދުގެ ދަށުން އެ ޓީމުން ކުޅުނު ފުރަތަމަ މެޗެވެ. ޕޯޗުގަލްގެ ކޯޗުކަމާ އޭނާ ހަވާލުވެފައި ވަނީ، މިއަހަރުގެ ފީފާ ވޯލްޑް ކަޕަށް ފަހު އެ މަޤާމުގައި ހުރި ރޮބާޓޯ ސަންޗޭޒް މަޤާމުން ވަކިވުމުންނެވެ. މިއީ ޖީސުސްގެ ކޯޗިންް ކެރިއަރުގައި ޤައުމީ ޓީމަކަށް އޭނާ އިރުޝާދު ދޭ ފުރަތަމަ ފަހަރެވެ.

ވޭލްސް ބަލިކޮށް ޕޯޗުގަލް އިން ފެށުން ރަނގަޅު ކޮށްފައިވާއިރު، މި ގުރޫޕުގައި ދެން އޮތީ ނޯވޭ އާއި ޑެންމާކް އެވެ. ޕޯޗުގަލްގެ ދެ ވަނަ މެޗުގައި ނުކުންނާނީ ނޯވޭއާ ދެކޮޅަށެވެ. އަދި ތިން ވަނަ މެޗުގައި ނިކުންނާނީ ޑެންމާކްއާ ދެކޮޅަށެވެ.