މެސީ ހިމަނައިގެން ބެލެންޑިއޯގެ ނޮމިނޭޝަން އިއުލާނުކޮށްފި، ރޮނާލްޑޯ އަށް ފުރުސަތެއް ނެތް

ފުޓުބޯޅައިގެ ދުނިޔޭގައި އެންމެ ޝަރަފުވެރި އިނާމަކަށް ބެލެވޭ ބެލެންޑިއޯ އެވޯޑުގެ މިއަހަރުގެ ހަފުލާ އޮކްޓޯބަރު މަހުގެ 26 ވަނަ ދުވަހު ލަންޑަންގެ ޕެލޭޑިއަމް ތިއޭޓަރުގައި ބާއްވަން ހަމަޖެހިއްޖެ އެވެ.

މިއީ ބެލެންޑިއޯ އެވޯޑު ހަފުލާ ލަންޑަންގައި ބާއްވާ ފުރަތަމަ ފަހަރެވެ. މި އަހަރުގެ ހަފުލާ އަކީ ވަރަށް ޚާއްސަ ހަފުލާއަކަށް ވާނެ އެވެ. ސަބަބަކީ 1956 ވަނަ އަހަރު ފްރާންސް ފުޓުބޯޅަ އިން ފެށި ބެލެންޑިއޯ އިނާމަށް 70 ވަނަ އަހަރު ފުރޭ އަހަރަށް ވާތީ އެވެ. 

2024 ވަނަ އަހަރުން ފެށިގެން ބެލެންޑިއޯ އިނާމު އިންތިޒާމު ކުރަމުން އަންނަނީ ފްރާންސް ފުޓުބޯޅަ އާއި ޔުއެފާ ގުޅިގެންނެވެ. ފްރާންސް ފުޓުބޯޅަ އަކީ ލެކީޕް ގްރޫޕްގެ ދަށުން ހިނގާ އިދާރާއެކެވެ. މި އަހަރުގެ ހަފުލާ ލަންޑަންގައި ބާއްވަން ނިންމީ، މި އިނާމު ފުރަތަމަ ފަހަރަށް ލިބުނު އިނގިރޭސި ކުޅުންތެރިޔާ ސްޓެންލީ މެތިއުސް އަށް އިހުތިރާމް އަދާކުރުމުގެ ގޮތުންނެވެ. 

މި އަހަރުގެ ފިރިހެން ބެލެންޑިއޯ އެވޯޑަށް 30 ކުޅުންތެރިން ނޮމިނޭޓު ކޮށްފައިވެ އެވެ. އެ ލިސްޓުގައި ރެއާލް މެޑްރިޑުގެ ޖޫޑް ބެލިންހަމް، ވިނީޝިއުސް ޖޫނިއާ އަދި ކީލިއަން އެމްބަޕޭ ހިމެނެ އެވެ. މެންޗެސްޓަރ ސިޓީގެ އާލިން ހާލަންޑު އަދި ރޮޑްރީ ވެސް ލިސްޓުގައި ހިމެނެ އެވެ.

ބާސެލޯނާގެ ޒުވާން ތަރި ލަމީން ޔަމާލް އަދި ޕައު ކުބާސީ ވެސް އެވޯޑަށް ނޮމިނޭޓުވެފައިވެ އެވެ. މީގެ އިތުރުން އެންމެ ގިނަ ފަހަރު ބެލެންޑިއޯ ކާމިޔާބު ކޮށްފައިވާ، އިންޓަރ މިއާމީގެ ލިއޮނަލް މެސީ ވެސް ވަނީ އެވޯޑަށް ނޮމިނޭޓުވެފަ އެވެ. އަދި އިންޓަރ މިލާންގެ ލައުޓާރޯ މާޓިނޭޒް ވެސް މި ލިސްޓުގައި ހިމެނެ އެވެ.

ޕެރިސް ސެއިންޓް ޖާމަން (ޕީއެސްޖީ)ގެ ކުޅުންތެރިންގެ ތެރެއިން  އެންމެ ފަހުން ބެލެންޑިއޯ ކާމިޔާބު ކުރި އޮސްމާން ޑެމްބެލޭ ވަނީ ނޮމިނޭޓުވެފަ އެވެ. އަދި އެ ޓީމުގެ އަޝްރަފް ހަކީމީ، މާކީނިއޯސް، ނޫނޯ މެންޑޭސް، ޔާއޯ ނޭވެސް، ފަބިއާން ރުއީޒް، ވިލިއަން ޕާޗޯ، ކްވިޗާ ކްވަރޭޝްކޭލިއާ އަދި ވިޓީނިއާ ވެސް ނޮމިނޭޓްކޮށްފައިވެ އެވެ.

އާސެނަލްގެ ގެބްރިއަލް، ޑެކްލަން ރައިސް އަދި ވިލިއަން ސަލީބާ ވެސް މި ލިސްޓުގައި ހިމެނެ އެވެ. ބަޔާން މިއުނިކްގެ ޑަޔޫޓް އުޕަމެކާނޯނޯ، ލުއިސް ޑިއާޒް، ހެރީ ކޭން އަދި މައިކަލް އޮލައިސޭ ވެސް ނޮމިނޭޓް ކުޅުންތެރިންގެ ތެރޭގައި ހިމެނެ އެވެ.

މީގެ އިތުރުން ޗެލްސީގެ މާކް ކުކުރޭލާ، މެންޗެސްޓަރ ޔުނައިޓެޑުގެ ބްރޫނޯ ފެނާންޑޭސް، އަލް ނަސްރުގެ ސަޑިއޯ މާނޭ، އަދި އަލް ޤަދްސިއްޔާގެ ޖޫލިއަން ކުއިނޯނޭސް ވެސް ލިސްޓުގައި ހިމެނެ އެވެ.

މިއަހަރުގެ ބެލެންޑިއޯ އެވޯޑަށް އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އާއި ބާސެލޯނާ އަށް ކުޅެމުން އަންނަ ބްރެޒިލްގެ ރަފީނިއާ ނޮމިނޭޓުވެފައި ނުވެ އެވެ.