ޔޫރޯ ކާމިޔާބު ކުރެވުން، އެއީ ވޯލްޑް ކަޕާ އެއްވަރުގެ މުބާރާތެއް: ރޮނާލްޑޯ
ރޮނާލްޑޯ ބުނީ ޕޯޗުގަލް އާއެކު 2016 ވަނަ އަހަރުގެ ޔޫރޯ ފުޓުބޯޅަ މުބާާރާތް ކާމިޔާބު ކުރެވުނު ކަމަށާއި، އޭނާގެ ނަޒަރުގައި އެއީ ވޯލްޑް ކަޕްއާ އެއްވަރުގެ ކާމިޔާބެއް ނުވަތަ މުބާރާތެއް ކަމަށް. އަދި އެ ކާމިޔާބީ އަބަދު ވެސް ދެމި އޮންނާނެ ކަމަށް ރޮނާލްޑޯ ބުނި.
ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ. | ރޮއިޓާސް
ޕޯޗުގަލްގެ ޤައުމީ ޓީމާ އެކު ޔޫރޯ ފުޓުބޯޅަ މުބާރާތް ކާމިޔާބު ކުރެވުނު ކަމަށާއި، އެއީ ފީފާ ވޯލްޑް ކަޕްއާ އެއްވަރުގެ މުބާރާތެއް ކަމަށް އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ ބުނެފި އެވެ.
ރޮނާލްޑޯ މިހެން ބުނެފައި ވަނީ މިހާރު ކުރިއަށްދާ ވޯލްޑް ކަޕްގެ ގަދަ 16 ގައި ސްޕެއިން އަތުން ބަލިވެ، ޕޯޗުގަލް މުބާރާތުން ކެޓި މެޗަށް ފަހު ވާހަކަ ދައްކަމުންނެވެ. ރޮނާލްޑޯ ބުނީ ވޯލްޑް ކަޕް އިން ކެޓުމަކީ ހިތާމަ ކުރާ ކަމެއް ކަމަށާއި، ނަމަވެސް މުބާރާތުގައި ކުރިއަށް ދިޔުމަށް އޭނާ އަށް ކުރެވުނު ހުރިހާ މަސައްކަތެއް ކުރި ކަމަށެވެ. އަދި މުބާރާތުން ވަކި ވެގެން ދަނީ ސާފު ހިތަކާ އެކު ކަމަށް ރޮނާލްޑޯ ބުންޏެވެ.
މީގެ އިތުރުން ރޮނާލްޑޯ ބުނީ ކުޅިވަރުގައި ބައެއް ފަހަރު ކާމިޔާބު ލިބޭނެ ކަމަށާއި، އަނެއް ބައި ފަހަރު ނާކާމިޔާބު ވެސް ވާނެ ކަމަށެެވެ. މިފަހަރުގެ ވޯލްޑް ކަޕް އަކީ އޭނާ ފެންނާނެ އެންމެ ފަހު ވޯލްޑް ކަޕް ކަމަށް ރޮނާލްޑޯ ތަކުރާރުކޮށް ބުންޏެވެ. ސްޕެއިން މެޗުގެ ކުރިން ވެސް ރޮނާލްޑޯ އޮތީ އެކަން އިއުލާާން ކޮށްފައި އެވެ.
އެއާ އެކު ރޮނާލްޑޯ ބުނީ މާދަމާާ ވެސް އޭނާ ހޭލާނީ އެއް އަޒުމުގައި ކަމަށެވެ. އެއީ މިއަދު ވެސް ހޭލި އަޒުމު ކަމަށް ފާހަގަކޮށް ރޮނާލްޑޯ ބުނީ، އޭނާ ޤަބޫލު ކުރާ ގޮތުގައި މެޗުގައި ރަނގަޅު ކުޅުމެއް ދެއްކުނު ކަމަށެވެ. ޕޯޗުގަލްގެ ޓީމުން ވެސް މެޗުގައި ރަނގަޅު ކުޅުމެއް ދެއްކި ކަމަށް ރޮނާާލްޑޯ ބުންޏެވެ.
ރޮނާލްޑޯ ބުނީ އޭނާގެ ކުރިން ޕޯޗުގަލްގެ ޤައުމީ ޓީމަށް އެއްވެސް ކާމިޔާބެއް ހޯދިފައި ނެތް ކަމަށާއި، އޭނާ އައި ފަހުން ތިން ތަށި ކާމިޔާބު ކޮށްފައިވާ ކަމަށެވެ. އެހެންކަމުން، އެއީ އޭނާ އަށް ލިބޭ ވަރަށް ބޮޑު އުފަލެއް ކަމަށް ރޮނާލްޑޯ ބުންޏެވެ. ރޮނާލްޑޯ ބުނީ ޕޯޗުގަލް އާއެކު 2016 ވަނަ އަހަރުގެ ޔޫރޯ ފުޓުބޯޅަ މުބާާރާތް ކާމިޔާބު ކުރެވުނު ކަމަށާއި، އޭނާގެ ނަޒަރުގައި އެއީ ވޯލްޑް ކަޕްއާ އެއްވަރުގެ ކާމިޔާބެއް ނުވަތަ މުބާރާތެއް ކަމަށެވެ. އަދި އެ ކާމިޔާބީ އަބަދު ވެސް ދެމި އޮންނާނެ ކަމަށް ރޮނާލްޑޯ ބުންޏެވެ.
ރޮނާލްޑޯ އަކީ ޕޯޗުގަލްގެ ޤައުމީ ޓީމަށް އެންމެ ގިނަ މެޗު ކުޅެދީ، އަދި އެންމެ ގިނަ ލަނޑު ޖަހައިދީފައިވާ ކުޅުންތެރިޔާ އެވެ. މިފަހަރުގެ ވޯލްޑް ކަޕް އަކީ ރޮނާާލްޑޯގެ ކެރިއަރުގައި އޭނާ ކުޅުނު ހަ ވަނަ ވޯލްޑް ކަޕް އެވެ. އަދި ރޮނާލްޑޯ އަކީ ހަ ވޯލްޑް ކަޕެއްގައި ލަނޑު ޖެހި ފުރަތަމަ ކުޅުންތެރިޔާ އެވެ. ޕޯޗުގަލް އާއެކު ރޮނާލްޑޯ ވަނީ ޔޫރޯގެ އިތުރުން ޔުއެފާ ނޭޝަންސް ލީގު ދެ ފަހަރު ކާމިޔާބު ކޮށްފައި އެވެ.
