މެދުއިރުމަތީގެ ހަނގުރާމައާއެކު ވެސް އޭޝިޔާގެ ދަތުރުފަތުރުގެ ޑިމާންޑް ވަރުގަދަކޮށް!
30 ސެޕްޓެމްބަރު 2026 | ބުދަ 09:47މެދުއިރުމަތީގެ ހަމަނުޖެހުންތަކާ ގުޅިގެން ތެލުގެ އަގު އުފުލި ޓިކެޓުގެ އަގުތަކަށް ބަދަލު އައި ނަމަވެސް، އޭޝިޔާ ސަރަހައްދުގައި ދަތުރުފަތުރުގެ ޑިމާންޑް ވަނީ ހިފެހެއްޓިފައި. ދަތުރުވެރިން މިހާރު ބޮޑަށް އިސްކަންދެނީ ކުރު-ރާސްތާގެ ދަތުރުތަކަށާއި ވިސާގެ ލުއިތައް ލިބޭ މަންޒިލްތަކަށް. މީގެއިތުރުން، ދަތުރުތައް ރޭވުމުގައި އާޓިފިޝަލް އިންޓެލިޖެންސް (އޭއައި) ބޭނުންކުރާ މިންވަރު އިތުރުވަމުންދާކަން ސްކައިސްކޭނާއިން ފާހަގަކުރޭ
މެލޭޝިޔާގެ އެއާޕޯޓެއްގައި ޕާކުކޮށްފައި ހުރި މަތިންދާބޯޓުތަކެއް | އެންއެސްޓީޕީ
މެދުއިރުމަތީގެ ހަނގުރާމައިގެ ސަބަބުން ވައިގެ ދަތުރުފަތުރަށް ބުރޫއަރައި، ޓިކެޓުގެ އަގުތަކަށް ބޮޑެތި ބަދަލުތަކެއް އަންނަމުން ދިޔަ ނަމަވެސް، އޭޝިޔާ ސަރަހައްދުގައި ދަތުރުފަތުރުގެ ޑިމާންޑް ދަށަށް ނުގޮސް ހިފެހެއްޓިފައިވާ ކަމަށާއި، ދަތުރުވެރިން މިހާރު ބޮޑަށް އިސްކަންދެނީ ކުރު-ރާސްތާގެ ދަތުރުތަކަށް ކަމަށް މަޝްހޫރު ޓްރެވަލް ޕްލެޓްފޯމް ސްކައިސްކޭނާގެ ސީއީއޯ ބްރަޔަން ބަޓިސްޓާ ވިދާޅުވެއްޖެ އެވެ.
"މެދުއިރުމަތީގެ ހަމަނުޖެހުންތަކުގެ ސަބަބުން ތެލުގެ އަގުތަކަށް ބަދަލުތަކެއް އައިސް. އޭގެ ސަބަބުން އެއާލައިންތަކުގެ އަގުތަކަށް ވެސް ބޮޑެތި ލޮޅުންތަކެއް އެރި،" ސީއެންއޭގެ 'އޭޝިޔާ ފަސްޓް' ޕްރޮގްރާމުގައި ވާހަކަފުޅު ދައްކަވަމުން ބަޓިސްޓާ ވިދާޅުވި އެވެ.
ނަމަވެސް، ގުދުރަތީ ކާރިސާތައް ހިމެނޭހެން ކުރިމަތިވާ ކުއްލި ލޮޅުންތަކަށް އިޖާބަދިނުމަކީ ދަތުރުފަތުރުގެ ދާއިރާއަށް އާ ކަމެއް ނޫން ކަމަށް އޭނާ ފާހަގަކުރެއްވި އެވެ. "ދަތުރުފަތުރަކީ ވަރަށް ވިލުންތެރި ސިނާއަތެއް. އަދި، މި ސިނާއަތް ވަނީ އެ ފަދަ ކަންކަމަށް ހޭނިފައި،" ބަޓިސްޓާ ވިދާޅުވި އެވެ.
ދަތުރުތައް ކެންސަލްވުން ވީހާވެސް މަދުކުރުމަށާއި ފަސިންޖަރުންނަށް ކުރިމަތިވެދާނެ އަސަރުތަކުގެ އިންޒާރު ދުރާލައި ދިނުމަށް ޓަކައި، ލިބެންހުރި ޖާގައާއި ތެލުގެ އަގު ހިފެހެއްޓުމަށް އަޅާފައިވާ ފިޔަވަޅުތަކަށް ބަލައިގެން، ފްލައިޓްތަކުގެ ޝެޑިއުލްތައް ރޭވުމުގައި އެއާލައިންތަކުން މިހާރު އިސްނަގައިގެން މަސައްކަތްކުރަމުން އަންނަ ކަމަށް އޭނާ ވިދާޅުވި އެވެ.
ޚާއްސަކޮށް އޭޝިޔާ ސަރަހައްދުގައި ދަތުރުފަތުރުގެ ޑިމާންޑް އަދިވެސް އޮތީ ދަށަށް ނުގޮސް ހިފެހެއްޓިފައި ކަމަށް ބަޓިސްޓާ ފާހަގަކުރެއްވި އެވެ. "ދުނިޔޭގެ ފެންވަރުގައި ދަތުރުފަތުރުގެ މައުލޫމާތު ހޯދުމަށް ކުރާ ސާޗްތަކުގެ ޑިމާންޑް އަދިވެސް އުޅެނީ މަތީގައި. މި ކަމުގައި އިސްކޮށް އުޅެނީ އޭޝިޔާގެ ދަތުރުތައް،" އޭނާ ވިދާޅުވި އެވެ.
މީގެއިތުރުން، "2025 ވަނަ އަހަރު، ވައިގެ ދަތުރުފަތުރުގެ ނިސްބަތުން އަހަރުން އަހަރަށް ބަލާއިރު އެންމެ ބާރަށް ކުރިއަރާފައިވަނީ އޭޝިޔާ-ޕެސިފިކް ސަރަހައްދުގައި. އެއީ، %7.8 ގެ ކުރިއެރުމަކާ އެކު،" އޭނާ ހާމަކުރެއްވި އެވެ. ސިންގަޕޫރުގެ ދަތުރުވެރިންގެ މެދުގައި ވެސް ދަތުރުކުރުމުގެ ޝައުގުވެރިކަން ވަރުގަދަކޮށް އޮތްއިރު، އޭގެ ތެރެއިން %89 މީހުން ބުނެފައިވަނީ 2026 ވަނަ އަހަރެކޭ އެއްވަރަށް ނުވަތަ އެއަށްވުރެ ވެސް ގިނައިން އަންނަ އަހަރު ދަތުރުކުރުމަށް ގަސްދުކުރާ ކަމަށް ކަން އޭނާ ފާހަގަކުރެއްވި އެވެ.
ކުރު-ރާސްތާގެ ދަތުރުތަކަށް އޮތް މަގުބޫލުކަން އިތުރުވުން
މީހުން ދަތުރުކުރުން މެދުނުކެނޑި ކުރިއަށް ގެންދިޔަ ނަމަވެސް، ދަތުރުކުރަން އިޚުތިޔާރުކުރާ މަންޒިލްތަކަށް މިހާރު ދަނީ ބަދަލުތަކެއް އަންނަމުންނެވެ. ދިގު ދަތުރުތަކުގެ އަގުތަކަށް އަންނަ ބަދަލުތަކުންނާއި ސަރަހައްދީ ހަމަނުޖެހުންތަކުގެ ސަބަބުން ކުރިމަތިވެދާނެ ބުރޫއެރުންތަކުން ރައްކާތެރިވުމަށް ޓަކައި، ކުރު-ރާސްތާގެ ދަތުރުތަކަށް އޮތް ޑިމާންޑް އިތުރުވަމުންދާ މަންޒަރު ސްކައިސްކޭނާއަށް ފާހަގަކުރެވިފައިވާ ކަމަށް އެ ކުންފުނިން ބުނެ އެވެ.
މި ބަދަލު އައުމަށް ވިސާއާ ނުލައި އެތެރެވުމުގެ އުސޫލުތައް އެކުލަވައިލުމުން ވެސް ބޮޑު ބާރަކަށް ވެފައިވާ ކަމަށް ބަޓިސްޓާ ބަޔާންކުރެއްވި އެވެ. "މިސާލަކަށް، ވިސާއާ ނުލައި ދަތުރުކުރެވޭ ސިޔާސަތުތައް ތަންފީޒުކުރުމުގެ ސަބަބުން، ސިންގަޕޫރުން ޗައިނާއަށް ކުރާ ދަތުރުތައް ވަރަށް ބޮޑަށް އިތުރުވެފައިވޭ،" ސިންގަޕޫރުން ޗައިނާއަށް ދަތުރުކުރުމަށް ސާޗްކުރި މިންވަރު %25 އިތުރުވެފައިވާކަން ފާހަގަކުރައްވަމުން އޭނާ ވިދާޅުވި އެވެ. މީގެ އިތުރުުން، އޮސްޓްރޭލިޔާއިން ޗައިނާއަށް ދަތުރުކުރުމަށް ކުރި ސާޗްތަކުގެ އަދަދު އަހަރުން އަހަރަށް ބަލާއިރު %48 އިތުރުވެފައިވާ ކަން ވެސް އޭނާ ފާހަގަކުރެއްވި އެވެ.
މެދުއިރުމަތީގެ ހަމަނުޖެހުންތަކާ ގުޅިގެން ވައިގެ ދަތުރުފަތުރުގެ މިސްރާބުތަކަށް ވެސް މިހާރު ދަނީ ބަދަލުތަކެއް އަންނަމުންނެވެ. "އަލަށް އުފެދެމުން އަންނަ ބައެއް ވައިގެ ކޮރިޑޯތައް ވެސް އަޅުގަނޑުމެންނަށް ފެންނަމުންދޭ. މެދުއިރުމަތީގެ ސަގާފީ ހަބްތަކުގެ ބަދަލުގައި ސިންގަޕޫރު، ކުއަލަ ލުމްޕޫރު އަދި ހޮންގކޮންގ ފަދަ އެހެން އެއާލައިން ހަބްތަކުން އެ ބައިނަލްއަގުވާމީ ފްލައިޓްތަކުގެ ބައެއް ހިއްސާ ނަގަން ފަށާފައިވާ މަންޒަރު ފެނޭ،“ އޭނާ ވިދާޅުވި އެވެ.
ޓިކެޓުގެ އަގުތައް އަދިވެސް ބޮޑު، ތިރިވާނެ އިރެއް ނޭނގޭ
ތެލުގެ އަގަށް އަންނަ ބަދަލުތަކާ ގުޅިގެން ވައިގެ ދަތުރުފަތުރުގެ ޓިކެޓު އަގުތަކަށް ވަނީ ޚާއްސަ ސަމާލުކަމެއް ހުއްޓިފަ އެވެ. އެއާލައިންތަކުން އާންމު ގޮތެއްގައި އަގު ކަނޑައަޅަނީ ކަސްޓަމަރުންގެ ޑިމާންޑާއި، ލިބެންހުރި ޖާގައާއި، ހިންގުމުގެ ޚަރަދުތަކަށް ބަލައިގެން ކަމަށާއި، އޭގެ ތެރެއިން އެންމެ ބޮޑު އެއް ޚަރަދަކީ މަތިންދާބޯޓު ތެޔޮ ނުވަތަ ޖެޓް ފިއުލް ކަމަށް ބަޓިސްޓާ ވިދާޅުވި އެވެ.
އޭޝިޔާ ސަރަހައްދުގެ ގިނަ މަންޒިލްތަކަށް ދަތުރުކުރާ އެއާއޭޝިޔާގެ މަތިންދާބޯޓުތަކެއް އެއާޕޯޓެއްގެ ޓާމެކުގައި ޕާކުކޮށްފައި | އެއާލައިންރޭޓިންގސް
"ޖެޓް ފިއުލްގެ އަގުތައް ވަކި ހަމައެއްގައި ނުހިފެހެއްޓި އޮންނަހާ ހިނދަކު، އެއާލައިންތަކުގެ ޓިކެޓު އަގުތައް ވެސް އޮންނާނީ އެގޮތަށް،" އޭނާ ވިދާޅުވި އެވެ. "ނަމަވެސް، އަޅުގަނޑު އުއްމީދުކުރަނީ، އަދި ބެލެވެނީ ވެސް، ތެލުގެ އަގުތައް ހަމައަކަށް އެޅުމުން ޓިކެޓުގެ އަގުތައް ދަށަށް ދާނެ ކަމަށް." މި ހުރިހާ ކަމަކާއެކު ވެސް، އެއާލައިންތަކުން އަދިވެސް ބޭނުންވަނީ ވާދަވެރިކަން ދަމަހައްޓައި، ކަސްޓަމަރުންނަށް ފައިދާހުރި އަގުތަކެއް ފޯރުކޮށްދިނުމަށް ކަމަށް އޭނާ ވިދާޅުވި އެވެ.
ދަތުރުވެރިންނަށް ވެސް މި ފަދަ ނުތަނަވަސްކަން ކުޑަކުރުމަށް ގިނަ ވަސީލަތްތަކެއް ލިބިފައިވާ ކަމަށާއި، ސްކައިސްކޭނާ ފަދަ އަގު އަޅާކިޔާ ޕްލެޓްފޯމްތަކުގެ މުހިންމުކަން ކުރިއަށްވުރެ ބޮޑުވެފައިވާ ކަމަށް އޭނާ ވިދާޅުވި އެވެ. މި ގޮތުން، ދަތުރުވެރިން ޓްރާންސިޓްވާން ބޭނުންނުވާ ވަކި އެއާޕޯޓުތައް ދޫކޮށްލުމުގެ ފުރުސަތު ފަހިކޮށްދޭ 'ލޭއޯވަރ ފިލްޓަރ' އެއް އެ ކުންފުނިން މިހާރު ވަނީ ތައާރަފުކޮށްފަ އެވެ. އަދި، ވައިގެ ސަރަހައްދުތައް ބަންދުކުރުމާއި ފްލައިޓްތައް ކެންސަލްވުމުގެ މައުލޫމާތުގެ އިތުރުން، ނުރައްކާތަކުން ރައްކާތެރިވުމަށް އެހީތެރިވެދޭ އިންޝުއަރެންސް ޚިދުމަތްތަކުގެ މުހިންމުކަން ވެސް އިތުރުވަމުން އަންނަ ކަމަށް އޭނާ ވިދާޅުވި އެވެ.
ދަތުރުތައް ހޯދައި ރޭވުމަށް އޭއައި ގެނުވާ ބަދަލުތައް
ހަމަމިއާއެކު، ދަތުރުވެރިން ދާނެ މަންޒިލްތައް ނިންމުމާއި ދަތުރުތައް ރޭވުމުގައި އާޓިފިޝަލް އިންޓެލިޖެންސް (އޭއައި) ބޭނުންކުރާ ގޮތަށް ވެސް ދަނީ ބޮޑެތި ބަދަލުތަކެއް އަންނަމުންނެވެ. އެމެރިކާގެ 1،000 އަށްވުރެ ގިނަ ދަތުރުވެރިން ބައިވެރިކޮށްގެން ސްކިފްޓް ރިސާޗާއި މެކިންޒީ އެންޑް ކޮމްޕެނީން މި މަހު ޝާއިއުކުރި ދިރާސާ ރިޕޯޓަކުން ދައްކާ ގޮތުގައި، ދަތުރުތަކުގެ ޚިޔާލު ހޯދުމަށް އޭއައި ބޭނުންކުރުމަށް %71 މީހުން ފަސޭހަކަމަށް ދެކޭއިރު، ކުރިމަގުގައި ދަތުރުތައް ބުކްކުރުމަށް އޭއައި ބޭނުންކުރުމާމެދު ވިސްނާނެ ކަމަށް %86 މީހުން ވަނީ ބުނެފަ އެވެ. ސިންގަޕޫރުގައި ވެސް ދަތުރުތައް ރޭވުމުގައި އޭއައިގެ ވަސީލަތްތައް ބޭނުންކުރުމަށް %65 ދަތުރުވެރިން ހިތްހަމަޖެހުމާއި އިތުބާރު އޮތް ކަމަށް ހާމަކޮށްފައިވާ ކަން ބަޓިސްޓާ ފާހަގަކުރެއްވި އެވެ.
"އޭއައިގެ އެހީގައި ހަމައެކަނި ސާޗްކުރުމުން އެއްކިބާވެ، ޖަވާބުތަކާއި އިރުޝާދުތައް ދިނުމާ ދިމާއަށް އަޅުގަނޑުމެން މިސްރާބު ޖަހާއިރު، ވަކި ދަތުރަކަށް ކަސްޓަމަރަށް އެންމެ އެކަށޭނަ، ޒާތީ އަދި އިތުބާރުހުރި ޖަވާބުތައް ދިނުމުގެ ގާބިލުކަން އަޅުގަނޑުމެންނަށް ލިބިގެންދާނެ،" އޭނާ ވިދާޅުވި އެވެ. މި ފަދަ އިރުޝާދުތަކުގައި ދަތުރުކުރާ ސަބަބާއި، މަންޒިލަށް ދާން ބޭނުންވާ އަވަސްމިނާއި، ބަޖެޓުގެ ކަންކަމަށް ރިއާޔަތްކުރެވޭނެ ކަމަށް ވެސް އޭނާ ވިދާޅުވި އެވެ.
ޖެނެރެޓިވް އޭއައި ކުރިއަރަމުން އައުމަކީ ދަތުރުފަތުރުގެ މައުލޫމާތު ހޯދާ ޕްލެޓްފޯމްތަކަށް ކުރިމަތިވާ ބޮޑު ގޮންޖެހުމެއް ކަމަަށް މި ދާއިރާގެ މާހިރުން ގަބޫލުކުރެ އެވެ. ސަބަބަކީ ގޫގްލް ޖެމިނައި އަދި އޯޕަންއޭއައިގެ ޗެޓްޖީޕީޓީ ފަދަ ވަސީލަތްތަކަށް މަންޒިލްތައް ދިރާސާކުރުމާއި ދަތުރުގެ ޝެޑިއުލްތައް އެކުލަވައިލުމުގެ ގާބިލުކަން މިހާރު ލިބިފައިވުމެވެ. މި ފަދަ އޭއައި ވަސީލަތްތަކުގެ ވާދަވެރިކަމަށް ސްކައިސްކޭނާއިން އިޖާބަދެނީ ކިހިނެއްތޯ ސުވާލުކުރުމުން ބަޓިސްޓާ ވިދާޅުވީ، އެ ޓެކްނޮލޮޖީ އެ ކުންފުންޏަށް ވެސް ލިބެން ހުރި ކަމަށާއި، އެ ޓެކްނޮލޮޖީ މިހާރު ވެސް ތަންފީޒުކުރަމުން އަންނަ ކަމަށެވެ.
"މި ދުވަސްވަރު ދަތުރުވެރިންގެ ދަތުރުގެ ކޮންމެ މަރުހަލާއެއްގައި ބައިވެރިވުމުގެ ގާބިލުކަން ހަގީގަތުގައި ވެސް އަޅުގަނޑުމެންނަށް އެބައޮތް،" އޭނާ ވިދާޅުވި އެވެ. "މިސާލަކަށް، ކުރިން އަޅުގަނޑުމެންނަށް ނުކުރެވޭ ކަމެއް ކަމަށްވާ، އެޖެންޓިކް ބުކިންގ ގާބިލުކަން ޓެސްޓުކުރުމުގެ މަސައްކަތް މިހާރު އަންނަނީ ވަރަށް ފުރިހަމައަށް ކުރަމުން."
މީގެއިތުރުން، ފާއިތުވި 20 އަހަރު ދުވަހުގެ ފްލައިޓް ސާޗް ޑޭޓާއާއެކު އޭއައި އެއްކޮށްލުމަށް ވެސް އެ ކުންފުނިން މަސައްކަތްކުރަމުން އަންނަ ކަމަށް އޭނާ ވިދާޅުވި އެވެ. "އޭއައިގެ ސަބަބުން އަޅުގަނޑުމެންނަށް ކުރިއެރުމެއް ލިބި، އެއާލައިންތަކުގެ އަގުތަކާއި ސަޕްލައިއާ ގުޅޭ ގޮތުން އަޅުގަނޑުމެން ހޯދާފައިވާ އިތުބާރުހުރި، ފުން މައުލޫމާތުގެ މައްޗަށް ބިނާކޮށް ކުރިއަށްދިއުމުގެ ފުރުސަތު ފަހިވެގެންދޭ،“ ބަޓިސްޓާ ވިދާޅުވި އެވެ.
މަސްދަރު: ސީއެންއޭ
