ޓްރަމްޕް ދެކޮޅު ހެއްދެވި ނަމަވެސް އޭއައި ރެގިއުލޭޓް ނުކުރުމަކީ "ޒިންމާދާރުކަން ކުޑަ" ކަމެއް: ބިލް ގޭޓްސް
28 ސެޕްޓެމްބަރު 2026 | ހޯމަ 07:10އޭއައި ޓެކްނޮލޮޖީގެ ސަބަބުން އިންސާނިއްޔަތަށް ކުރިމަތިވެދާނެ ނުރައްކާތަކުން ސަލާމަތްވުމަށް ޓަކައި، މި ސިނާއަތް ރެގިއުލޭޓްކޮށް މިނިވަން މުއައްސަސާއަކުން މޮނިޓަރުކުރުން ލާޒިމުކަމަށް ބިލް ގޭޓްސް ވިދާޅުވި. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ވަނީ މި ފަދަ އިންޒާރުތަކަކީ ހަގީގަތެއް ނެތް ވާހަކަތަކެއް ކަމަށް ސިފަކުރައްވައި، މި ދާއިރާ ކޮންޓްރޯލްކުރުމަށް ދެކޮޅު ހައްދަވާފައި
މައިކްރޮސޮފްޓް ކުންފުނީގެ ބާނީ އަދި މަހުޖަނު ބިލް ގޭޓްސް އޮސްޓްރޭލިއަން އޯޕަން ޓެނިސް މުބާރާތުގެ މެޗެއް ބައްލަވާލައްވަނީ | ރޮއިޓާސް
އާޓިފިޝަލް އިންޓެލިޖެންސް (އޭއައި) ޓެކްނޮލޮޖީ ކޮންޓްރޯލްކުރަން ރައްކާތެރިކަމުގެ ފިޔަވަޅުތައް އެޅުމާއި މިނިވަން މުއައްސަސާއަކުން އެ ކަން މޮނިޓަރުކުރުން ލާޒިމު ނުކުރުމަކީ "ޒިންމާދާރުކަން ކުޑަ" ކަމެއް ކަމަށާއި، އޭގެ ސަބަބުން މުޅި އިންސާނިއްޔަތަށް ބޮޑެތި ގެއްލުންތަކެއް ކުރިމަތިވެދާނެ ކަމަށް ޓެކްނޮލޮޖީ ދާއިރާގެ މަހުޖަނު ބިލް ގޭޓްސް ވިދާޅުވެއްޖެ އެވެ. އޭނާ މިހެން ވިދާޅުވީ، މި ޓެކްނޮލޮޖީ ރެގިއުލޭޓް ކުރާނެ ގޮތްތަކާ ގުޅޭ ގޮތުން ބައިނަލްއަގުވާމީ ފެންވަރުގައި ކުރިއަށްދާ މަޝްވަރާތަކާ ގުޅިގެން މީޑިއާތަކަށް ދެއްވި އިންޓަވިއުތަކެއްގަ އެވެ.
ގާނޫނު ތަންފީޒުކުރުމާއި ސިޔާސީ ވެރިންގެ ދައުރު
"ރައްކާތެރިކަމުގެ ފިޔަވަޅުތަކާއި މޮނިޓަރުކުރުން ހުންނާނެ ގޮތުގެ މަޝްވަރާތަކުގެ ތެރެއަށް ގާނޫނު ތަންފީޒުކުރާ ފަރާތްތަކާއި ސިޔާސީ ވެރިން ވަންނަން ޖެހޭ،" އެންބީސީގެ 'މީޓް ދަ ޕްރެސް' ޕްރޮގްރާމަށް ދެއްވި އިންޓަވިއުއެއްގައި ގޭޓްސް ވިދާޅުވި އެވެ.
އޭއައި ޓެކްނޮލޮޖީއަކީ "ބިލިއަނެއްހާ މީހުން މަރުވުމަށް މަގުފަހިވާ ފަދަ ހާދިސާތައް ހިންގުމުގެ ފުރިހަމަ ބާރު ލިބިފައިވާ" ވަސީލަތެއް ކަމަށް ގޭޓްސް އިންޒާރު ދެއްވި އެވެ. އަދި، މި ފަދަ ކަމެއް ހިނގިޔަނުދީ ހުއްޓުވުމަކީ، ނިއުކްލިއާ ހަތިޔާރު ފެތުރުން ހުއްޓުވުން ފަދަ އިންސާނިއްޔަތުގެ ދެމިއޮތުމަށް ހުރި އެހެނިހެން ނުރައްކާތަކާ ކުރިމަތިލުމަށް ވުރެ ވެސް އުނދަގޫ މަސައްކަތަކަށް ވެދާނެ ކަން އޭނާ ފާހަގަކުރެއްވި އެވެ.
އެމެރިކާގެ ރައީސް ޑޮނަލްޑް ޓްރަމްޕާ ވާހަކަފުޅު ދައްކަވައި މި ކަންބޮޑުވުންތައް ހިއްސާކުރެއްވުމަށް ތައްޔާރަށް ހުންނެވި ކަމަށް، ޓެކްނޮލޮޖީގެ އިސް ސަފުން ދީލަތި އެހީތެރިއަކަށް ބަދަލުވެވަޑައިގެންނެވި ގޭޓްސް ވިދާޅުވި އެވެ. އަދި، އޭއައިގެ ނުރައްކަލާ މެދު ފަހަކަށް އައިސް ދެމުންދާ އިންޒާރުތަކަކީ 'ހޯކްސް' ނުވަތަ އޮޅުވާލުމަށް ދައްކާ ދޮގު ވާހަކަތަކެއްގެ ގޮތުގައި ޓްރަމްޕް ސިފަކުރެއްވި ސިފަކުރެއްވުމާ އޭނާ އެއްބަސްވެވަޑައިނުގަންނަވާ ކަމަށް ވެސް ގޭޓްސް ވިދާޅުވި އެވެ.
"މި ދާއިރާގައި އަޅުގަނޑު މުޅި އުމުރު ދުވަހު ކޮށްފައިވާ މަސައްކަތްތަކަށް ބަލާއިރު، މިއީ ކިހާ ތަފާތު އަދި ޚާއްސަ ކަމެއްކަމާއި އަޅުގަނޑުގެ ހުރި ކަންބޮޑުވުންތައް ހާމަކުރުމުން، އެހެން މީހުންގެ ފަރާތުން އޭނާއަށް [ޓްރަމްޕަށް] އިވޭ ވާހަކަތަކަށް އިތުރު ބުރަދަނެއް ލިބިގެންދާނެ ކަމަށް އުއްމީދުކުރަން،" ގޭޓްސް ވިދާޅުވި އެވެ.
ސިނާއަތުގެ ކަންބޮޑުވުމާއި ޓްރަމްޕްގެ ދެކޮޅުވެރިކަން
މި ޓެކްނޮލޮޖީ އިންސާނުންގެ ބާރުގެ ދަށުން ނެއްޓި، ކޮންޓްރޯލުން ނައްޓައިގެން ގޮސް މުޅި ދުނިޔެއަށް ބޮޑު ކާރިސާއަކަށް ވިޔަނުދިނުމަށް ޓަކައި، މި ސިނާއަތަށް ހަރުދަނާ އޮނިގަނޑުތަކަކާއި ރައްކާތެރިކަމުގެ އިންތަކެއް ބޭނުންވާ ކަމަށް އޭއައި ދާއިރާގެ އިސް ކުންފުނިތަކުގެ ވެރިން ވެސް ފަހަކަށް އައިސް ފާޅުގައި ވަނީ ވިދާޅުވެފަ އެވެ.
"މިކަން ރަނގަޅަށް މެނޭޖް ނުކުރެވިއްޖެ ނަމަ، މުޅި އިންސާނިއްޔަތަށް ވެސް އޭއައިގެ ސަބަބުން ނުރައްކާ އޮތް ކަމަށް އަޅުގަނޑު ގަބޫލުކުރަން،" ކްލޯޑް އުފެއްދި ކުންފުނި ކަމަށްވާ އެންތްރޯޕިކްގެ ޗީފް އެގްޒެކެޓިވް އޮފިސަރު ދާރިއޯ އަމޯދެއި، ހުސްވި ހަފުތާގައި އދ. ގެ ސަލާމަތީ މަޖިލީހުގެ މެންބަރުންނާ ވާހަކަފުޅު ދައްކަވަމުން ވިދާޅުވި އެވެ.
ނަމަވެސް، އެތައް ޓްރިލިއަން ޑޮލަރެއްގެ އަގުހުރި މި ބޮޑު ސިނާއަތް ރެގިއުލޭޓް ކުރުމަށް ޓްރަމްޕާއި އޭނާގެ ސަރުކާރުގެ އިސް އޮފިޝަލުން ވަނީ ދެކޮޅު ހައްދަވާފަ އެވެ. މިއީ، އެމެރިކާއާއި ޗައިނާއާ ދެމެދު ހިނގަމުންދާ ވާދަވެރި ރޭހެއްގެ ބައެއް ކަމަށް ޓްރަމްޕާއި އޭނާގެ ސަރުކާރުން ދެކެ އެވެ.
އޭއައިގެ މައުލޫއަށް ޗައިނާގެ ރައީސް ޝީ ޖިންޕިންގއާއެކު ބޭއްވެވި ބައްދަލުވުމަށް ފަހު ޖެހިގެން އައި ދުވަހު، ޓްރަމްޕް ވަނީ ދެވޭ އިންޒާރުތަކާ މެދު އޭނާގެ ހުރި ޝައްކުތައް ތަކުރާރު ކުރައްވައި، މި ސިނާއަތް ރެގިއުލޭޓް ނުކުރައްވާނެ ކަމަށް ވިދާޅުވެފަ އެވެ. އަދި، ދުނިޔެ ނެތިދާނެ ކަމަށް ބުނެ ދޭ އިންޒާރުތައް އޭނާ އަޅާކިޔުއްވީ، މޫސުމަށް އަންނަ ބަދަލުތަކާއި އެމެރިކާގެ އިންތިޚާބަށް ރަޝިޔާއިން ނުފޫޒު ފޯރުވި ކަމަށް ބުނާ މައްސަލަ ފަދަ އޭނާ ބަލައިނުގަންނަ ކަންކަމާ އެވެ.
"އެއީ ހަމަ އެންމެން ވެސް މަރުވާނެޔޭ، ދުނިޔެ ހޫނުވުމުގެ ސަބަބުން މިހާރު ތިޔަ އެންމެން ވެސް ތިބެންވާނީ މަރުވެފައޭ ބުނާ ކަހަލަ ކަމެއް. އެއީ ހަމަ ރަޝިޔާ ހޯކްސް ކަހަލަ ކަމެއް. މި ހުރިހާ ތަފާތު ހޯކްސްތައް ކަހަލަ ކަމެއް،" ޓްރަމްޕް ވިދާޅުވި އެވެ.
ރައްކާތެރިކަމުގެ ފިޔަވަޅުތަކާއި ސިނާއަތުގެ ކުރިމަގު
އޭއައި ތަރައްގީކުރުމުގައި އަޅަންޖެހޭ ރައްކާތެރިކަމުގެ ފިޔަވަޅުތަކުގެ ސަބަބުން މި ސިނާއަތަށް ގެއްލުމެއް ނުލިބޭނެ ކަމަށް ގޭޓްސް ވިދާޅުވި އެވެ. "އޭގެ ސަބަބުން އަންނަ ލަސްވުމަކީ އެހާ ބޮޑު ލަސްވުމަކަށް ނުވާނެ،" އޭނާ ވިދާޅުވި އެވެ. "މިއީ ސައިބާ ހަމަލާއަކަށްތޯ ބޭނުންކުރެވެނީ، ނުވަތަ ބަޔޯ ޓެރަރިޒަމަށްތޯ ބަލާނެ މޮނިޓަރުކުރުމުގެ ނުވަތަ ބަލަހައްޓާނެ ފަށަލައެއް ގާއިމުކުރުމަކީ ކުރެވިދާނެ ކަމެއް،" އޭނާ ފާހަގަކުރެއްވި އެވެ.
އުމުރުން 70 އަހަރުގެ ގޭޓްސްއަކީ 1975 ވަނަ އުފެއްދި މައިކްރޮސޮފްޓް ކުންފުނީގެ ބާނީ އެވެ. އަމިއްލަ ބޭނުންތަކަށް ކޮމްޕިއުޓަރު އާންމުވެ، އޭގެ ފަހުން އިންޓަނެޓް ފުޅާވެގެން ދިޔަ ދުވަސްވަރު އެ ކުންފުނި ހިންގެވީ އޭނާ އެވެ. އޭނާ ވަނީ 1995 ވަނަ އަހަރު ދުނިޔޭގެ އެންމެ މުއްސަނދި މީހާގެ މަގާމު ހޯއްދަވައި، ޖެހިގެން އައި ވިހި ވަރަކަށް އަހަރުގެ ބޮޑު ބައެއްގައި އެ މަގާމު ދަމަހައްޓަވާފަ އެވެ. ނަމަވެސް، ފަހުން އޭނާ ވަނީ އޭނާގެ މުދަލުގެ ބޮޑު ބައެއް އިންސާނީ އެހީގެ ކަންކަމަށް ހަދިޔާކުރައްވާފަ އެވެ. އަދި، އޭނާގެ ފަހުން އެ މަގާމަށް ވަނީ އިލޮން މަސްކާއި، ޖެފް ބޭޒޯސް އަދި މާކް ޒަކަބާގް ފަދަ ޓެކްނޮލޮޖީގެ އާ ޖީލެއްގެ މަހުޖަނުން އައިސްފަ އެވެ.
މި މަހުގެ ކުރީކޮޅު، އޭނާގެ ޗެރިޓީ ޖަމިއްޔާ ކަމަށްވާ ގޭޓްސް ފައުންޑޭޝަނުން ވަނީ، ތަރައްގީވަމުން އަންނަ ގައުމުތަކުގައި އޭއައިގެ ފުރުސަތުތައް ފުޅާކުރުމަށްޓަކައި 1 ބިލިއަން އެމެރިކާ ޑޮލަރު ހޭދަކުރުމަށް ކަނޑައަޅާފަ އެވެ.
މަސްދަރު: އަލް ޖަޒީރާ
