ޗައިނާއާއި އެމެރިކާއިން 30 ބިލިއަން ޑޮލަރުގެ މުދަލުން ޓެރިފް ކުޑަކުރަން އެއްބަސްވެއްޖެ
28 ސެޕްޓެމްބަރު 2026 | ހޯމަ 05:03ޗައިނާއާއި އެމެރިކާގެ ވިޔަފާރި ގުޅުން ބަދަހިކުރުމަށް ޓަކައި ބައިލެޓަރަލް ޓްރޭޑް ކައުންސިލަކާއި އިންވެސްޓްމަންޓް ކައުންސިލެއްގެ އިތުރުން ދަނޑުވެރިކަމާ ބެހޭ ވޯކިންގ ގްރޫޕެއް އުފެއްދުމަށް ދެ ގައުމުން ވަނީ އެއްބަސްވެފައި. މީގެ އިތުރުން، އާޓިފިޝަލް އިންޓެލިޖެންސްގެ ދާއިރާއިން މަޝްވަރާކޮށް، ކުއްލި ހާދިސާތަކުގައި މުއާމަލާތުކުރާނެ ހާއްސަ ނިޒާމެއް ގާއިމުކުރުމަށް ވެސް ވަނީ ނިންމާފައި
ވިޔަފާރީ ބަނދަރެއްގައި ޖަހާފައިވާ ކޮންޓެއިނަރުތަކެއް | އަނަދޮލު އޭޖެންސީ
ޗައިނާއާއި އެމެރިކާއިން އެއް ގައުމުން އަނެއް ގައުމަށް އެތެރެކުރާ ގާތްގަނޑަކަށް 30 ބިލިއަން އެމެރިކާ ޑޮލަރުގެ މުދަލުން އިންޕޯޓުޑިޔުޓީ ކުޑަކުރުމަށް އެއްބަސްވެފައިވާ ކަން ޗައިނާގެ ވިޔަފާރިއާ ބެހޭ ވުޒާރާއިން ހޯމަ ދުވަހު ކަށަވަރުކޮށްދީފި އެވެ. މި އެއްބަސްވުމުގެ ދަށުން ހިމެނޭ ބާވަތްތަކުގެ ގާތްގަނޑަކަށް %90 މުދަލަށް ކަނޑައަޅާނީ 'މޯސްޓް-ފޭވާޑް-ނޭޝަން' (އެމްއެފްއެން) ޓެރިފް ނުވަތަ ވޯލްޑް ޓްރޭޑް އޮގަނައިޒޭޝަންގެ (ޑަބްލިޔުޓީއޯ) މެންބަރު ގައުމުތަކުގެ ތެރެއިން މިނިވަން ވިޔަފާރީގެ އެއްބަސްވުމެއް ގާއިމުކޮށްފައި ނުވާ ދެ ގައުމެއްގެ މެދުގައި ނެގޭނެ އެންމެ ކުޑަ ރޭޓުގެ އިންޕޯޓުޑިޔުޓީ ކަމަށް އެ ވުޒާރާއިން ބުންޏެވެ.
މި އެއްބަސްވުމަކީ ސެޕްޓެންބަރު 20 އިން 23 އަށް ނިއު ޔޯކާއި ވޮޝިންގޓަންގައި ޗައިނާއާއި އެމެރިކާގެ އޮފިޝަލުންގެ މެދުގައި ބޭއްވުނު އިގްތިސާދީ އަދި ވިޔަފާރީގެ މަޝްވަރާތަކުން ހާސިލުކުރެވުނު ނަތީޖާއެއް ކަމަށް، އެ ވުޒާރާއިން ހޯމަ ދުވަހު ނެރުނު ބަޔާނެއްގައި ވަނީ ބުނެފަ އެވެ. އަދި، ދެ ގައުމުގެ އެތެރޭގެ ގާނޫނުތަކުގެ ދަށުން ފުރިހަމަކުރަންޖެހޭ އިޖުރާތުތައް ނިމުމުން، އިންޕޯޓުޑިޔުޓީ ކުޑަކުރުމުގެ ނިންމުން ދެ ގައުމުން ވެސް އެއްފަހަރާ ތަންފީޒުކުރަން ފަށާނެ ކަމަށް އެ ބަޔާނުގައި ބުނެފައިވެ އެވެ.
މީގެ އިތުރުން، އިގްތިސާދީ އަދި ވިޔަފާރީގެ މަޝްވަރާ ނިޒާމުގެ ދަށުން، ދެ ގައުމުގެ ދެމެދުގައިވާ ވިޔަފާރި ކުރިއެރުވުމުގެ މައިގަނޑު މަގުސަދުގައި ބައިލެޓަރަލް ޓްރޭޑް ކައުންސިލެއް އުފެއްދުމަށް ވެސް ޗައިނާއާއި އެމެރިކާއިން ވަނީ އެއްބަސްވެފަ އެވެ. އަދި، ދެ ގައުމުން އެއްބަސްވި 30 ބިލިއަން ޑޮލަރުގެ ޓެރިފް ކުޑަކުރުމުގެ އޮނިގަނޑުގެ ތެރޭގައި އެމެރިކާއިން ޗައިނާއަށް އެކްސްޕޯޓްކުރާ ބޯޓުދެލިން ނަގާ ޓެރިފް ވެސް ހިމެނޭނެ އެވެ. ޗައިނާގެ ވިޔަފާރިއާ ބެހޭ ވުޒާރާއިން ބުނީ، މީގެ ސަބަބުން 2027 އަދި 2028 ވަނަ އަހަރު އެމެރިކާގެ ބޯޓުދެލި ޗައިނާއަށް އެތެރެކުރުމަށް މަގުފަހިވެގެން ދާނެ ކަމަަށެވެ.
ހަމަމިއާއެކު، އެ ވުޒާރާ އަދި އެމެރިކާގެ ޓްރޭޑް ރެޕްރެޒެންޓެޓިވްގެ އޮފީސް ގުޅިގެން އިސްވެ ހިންގާ އިންވެސްޓްމަންޓް ކައުންސިލަކާއި ދަނޑުވެރިކަމާ ބެހޭ ވޯކިންގ ގްރޫޕެއް އެކުލަވާލުމަށް ވެސް ދެ ގައުމުން ވަނީ އެއްބަސްވެފަ އެވެ. ދަނޑުވެރިކަމާ ބެހޭ ވޯކިންގ ގްރޫޕުގެ ފުރަތަމަ ބައްދަލުވުން 2026 ވަނަ އަހަރު ނިމުމުގެ ކުރިން ބޭއްވުމަށް ވަނީ ހަމަޖެހިފަ އެވެ.
މާލީ ޚިދުމަތްތަކާ ގުޅޭގޮތުން ދެ ފަރާތުގެ ދެމެދުގައި އުސޫލީ އެއްބަސްވުމަކަށް އާދެވިފައިވާ ކަމަށާއި، ޗައިނާގެ ބޮޑުވަޒީރުގެ ނައިބު ހީ ލައިފޮންގ އަދި އެމެރިކާގެ މާލީ ވަޒީރު ސްކޮޓް ބެސެންޓް އިސްވެ ހުންނަވައި އާޓިފިޝަލް އިންޓެލިޖެންސްގެ (އޭއައި) މަޝްވަރާތަކެއް ކުރިއަށްގެންދިއުމަށް ނިންމާފައިވާ ކަމަށް ވެސް ޗައިނާގެ ވިޔަފާރިއާބެހޭ ވުޒާރާއިން ވަނީ ހާމަކޮށްފަ އެވެ. މިއާއެކު، އޭއައިއާ ގުޅޭ ދެވަނަ މަޝްވަރާ ބައްދަލުވުން ނޮވެންބަރު މަސް ނިމުމުގެ ކުރިން ބޭއްވުމަށް އުންމީދުކުރެވޭއިރު، އޭއައިއާ ގުޅުންހުރި ކުއްލި ހާދިސާތަކުގައި މުއާމަލާތުކުރުމަށް ހާއްސަ މުއާސަލާތީ ޗެނަލެއް ގާއިމުކުރުމަށް ވެސް ދެ ގައުމުން ވަނީ އެއްބަސްވެފަ އެވެ.
މަސްދަރު: އަނަދޮލު އޭޖެންސީ
