އިސްރާއީލުގެ ޓެރެރިސްޓު ވަޒަންވެރިން ހިންގަމުންދާ ޖަރީމާތަކުގެ މައުލޫމާތު ހިއްސާކުރަން އެމެރިކާގެ ސެނެޓަރަކު ގޮވާލައްވައިފި

އިސްރާއީލުން އިސްތިއުމާރު ކޮށްފައިވާ ފަލަސްތީނުގެ ހުޅަނގު އައްސޭރީގައި ޓެރެރިސްޓު ވަޒަންވެރިން ހިންގަމުންދާ ލާއިންސާނީ ޖަރީމާތަކުގެ މައުލޫމާތު، އަދި އެމެރިކާގެ ރައްޔިތުންނަށް ދެމުންދާ ހަމަލާތަކުގެ މައުލޫމާތު، އެމެރިކާގެ ކޮންގްރެސްއަށް ފޯރުކޮށްދިނުމަށް ޚާރިޖީ ވުޒާރާއަށް ލާޒިމުކުރާ ގަރާރެއް ކުރިއަށް ގެންދިއުމަށް އެމެރިކާގެ ސެނެޓަރު ކްރިސް ވެން ހޮލެން އަންގާރަ ދުވަހު ސެނެޓަށް ގޮވާލައްވައިފި އެވެ.

ވެން ހޮލެން މި މޭރުމުން ވިދާޅުވީ، ސެނެޓުގެ ފޮރިން ރިލޭޝަންސް ކޮމިޓީން 852 ނަންބަރު ގަރާރު  އަވަހަށް ފާސްކޮށް، ސެނެޓުގެ ތަޅުމަށް ހުށަހެޅުމަށް ގޮވާލައްވަމުންނެވެ. ވެން ހޮލެންއާއި އިތުރު ސެނެޓަރުންތަކެއް ހުށަހެޅުއްވި މި ގަރާރަކީ، 1961 ވަނަ އަހަރުގެ ފޮރިން އެސިސްޓެންސް އެކްޓުގެ ސެކްޝަން 502ބީ(ސީ) ގެ ދަށުން، އިސްރާއީލްގެ އިންސާނީ ހައްގުތަކާ ގުޅޭ އަމަލުތަކުގެ މައުލޫމާތު ހޯދުމަށް އެދި ހުށަހަޅާފައިވާ ގަރާރެއް ކަން އޭނާ ފާހަގަކުރެއްވި އެވެ.

Advertisement

"ހުޅަނގު އައްސޭރީގައި އިތުރުވަމުންދާ ހަމަނުޖެހުންތަކާއި އިންސާނީ ހައްގުތަކަށް އަރައިގަތުމުގެ އަމަލުތަކުގެ މައުލޫމާތު، އޭގެ ތެރޭގައި އެމެރިކާގެ ރައްޔިތުންނާ ދެކޮޅަށް ހިންގާ އަމަލުތައް ހިމެނޭހެން، ކޮންގްރެސްއަށް ފޯރުކޮށްދިނުމަށް ޚާރިޖީ ވުޒާރާއަށްށް ލާޒިމުކުރާ ގަރާރެއް ކަމަށްވާ ރެޒޮލިއުޝަން 852 ކުރިއަށް ގެންދިއުމަށް ގޮވާލުމަށް އަޅުގަނޑު މިއަދު މި ތެދުވީ،" ވެން ހޮލެން ވިދާޅުވި އެވެ.

ވޭތުވެދިޔަ ހަތަރު އަހަރު ދުވަހުގެ ތެރޭގައި ހުޅަނގު އައްސޭރީގައި "އަނިޔާވެރި އިސްރާއީލްގެ ވަޒަންވެރިން" ނުވަތަ އިސްރާއީލްގެ ސަލާމަތީ ބާރުތަކުގެ މެންބަރުންގެ އަތްދަށުވެ އެމެރިކާގެ ނުވަ ރައްޔިތަކު މަރުވެފައިވާ ކަން ވެން ހޮލެން ފާހަގަކުރެއްވި އެވެ.

އެމެރިކާގެ ސެނެޓުގެ މެންބަރު ކްރިސް ވެން ހޮލެން ރަސްމިއްޔާތެއްގައި ވާހަކަފުޅު ދައްކަވަނީ | މެރިލެންޑް މެޓަރސް

"ބޭރު ދުނިޔޭގައި އަޅުގަނޑުމެންގެ އެންމެ އިސް އަމާޒަކީ އެމެރިކާގެ ރައްޔިތުން ރައްކާތެރިކުރުން ކަމަށް އެމެރިކާ ސަރުކާރުން ތަކުރާރުކޮށް ބުނޭ. ނަމަވެސް، އަނިޔާވެރި އިސްރާއީލްގެ ވަޒަންވެރިން ހުޅަނގު އައްސޭރީގެ އާންމުންނަށް ބިރުދެއްކުން ކުރިއަށް ގެންދާއިރު، އެމެރިކާގެ ރައްޔިތުން ދަނީ ތަކުރާރުކޮށް މަރަމުން. އަދި, ގިނަ ހާލަތްތަކުގައި މިއީ އިސްރާއީލްގެ ސަރުކާރު، [ބޮޑުވަޒީރު ބެންޖަމިން] ނަތަންޔާހޫގެ ސަރުކާރުގެ ބައިވެރިވުމާ އެކުގައި [ހިންގާ ޖަރީމާތަކެއް]،" އޭނާ ވިދާޅުވި އެވެ.

ހުޅަނގު އައްސޭރީގައި މަރާލެވިފައިވާ ނުވަތަ ހައްޔަރުކުރެވިފައިވާ އެމެރިކާ ރައްޔިތުންނަށް އިންސާފު ހޯދައިދީ ޖަވާބުދާރީ ކުރުވުމަށް އެމެރިކާ ސަރުކާރުން އެކަށީގެންވާ މަސައްކަތްތަކެއް ކޮށްފައިވޭތޯ ސެނެޓަރު ވަނީ ސުވާލު އުފައްދަވާފަ އެވެ. "އިންސާފު ގާއިމުކުރުމަށް ޓަކައި މި ސަރުކާރުން ސީރިއަސް އަދި އިތުބާރު ހުރި ފިޔަވަޅުތަކެއް އެޅުމުގެ ކުރިން، ހުޅަނގު އައްސޭރީގައި އެމެރިކާގެ އިތުރު ކިތައް ރައްޔިތުން މަރުވާން ޖެހޭތޯ؟" އޭނާ ސުވާލު ކުރެއްވި އެވެ.

އެމެރިކާގެ ރައްޔިތުންނާ މެދު އަމަލުކުރެވެމުންދާ ގޮތުގެ ސަބަބުން، އެމެރިކާގެ ރައްޔިތުކަން ނެތް ފަލަސްތީނު މީހުން ތަހައްމަލުކުރަންޖެހޭ ހާލަތްތަކާމެދު ފުޅާ ދާއިރާއެއްގައި ވިސްންނަ ޖެހޭ ކަމަށް ވެސް ވެން ހޮލެން ވިދާޅުވި އެވެ. "އެއްވެސް އަދަބެއް ނުލިބި އެމެރިކާގެ ރައްޔިތުން މަރައި، އަނިޔާކޮށް ނުވަތަ ބަންދުކުރެވޭ ކަމަށްވާނަމަ، އެމެރިކާގެ ޕާސްޕޯޓެއް ނެތް ފަލަސްތީނުގެ ރައްޔިތުންނާއި، އޭގެ ތެރޭގައި ފަލަސްތީނުގެ ކުޑަކުދިން ވެސް ހިމެނޭހެން، ހުޅަނގު އައްސޭރީގައި އެ މީހުންގެ ހާލަތު އޮންނާނެ މިންވަރު ތަސައްވުރު ކޮށްލައްވާ."

ހުޅަނގު އައްސޭރީގައި އިސްރާއީލުގެ ޓެރެރިސްޓު ވަޒަންވެރިން ހިންގާ ހަމަނުޖެހުންތަކާއި ލާއިންސާނީ ޖަރީމާތައް އިތުރުވަމުންދާތީ ކަންބޮޑުވުން ފާޅުކުރައްވައި ޚާރިޖީ ވަޒީރު މާކޯ ރޫބިއޯ ދާދިފަހުން ދެއްކެވި ވާހަކަފުޅުތަކަށް ވެސް ވެން ހޮލެން ވަނީ ރައްދުދެއްވާފަ އެވެ. "އެމެރިކާގެ ނުވަ ރައްޔިތަކު މަރާލެވިފައިވާއިރު ހަމައެކަނި ކަންބޮޑުވުން ފާޅުކުރުމަކުން ނުފުދޭ،" ވެން ހޮލެން ވިދާޅުވި އެވެ. "އަޅުގަނޑުމެންގެ އެމެރިކާ ރައްޔިތުން އަސްކަރީ ބަންދުގައި ތިބިއިރު، ހަމައެކަނި ކަންބޮޑުވުން ފާޅުކޮށްލައިގެން ނުފުދޭ."