އިސްރާއީލްގެ ޖަރީމާތައް ހައްލުކުރުމުގެ ބަދަލުގައި ބައިނަލްއަގްވާމީ މުޖުތަމައުން އޮތީ ބަލަން: އުރުދުންގެ ރަސްގެފާނު
23 ސެޕްޓެމްބަރު 2026 | ބުދަ 02:31އިސްރާއީލުން ހުޅަނގު އައްސޭރީގައި ހިންގާ ލާއިންސާނީ އަމަލުތަކަކީ ހަނގުރާމައިގެ ޖަރީމާއެއް ކަމަށް ސިފަކުރައްވައި، އުރުދުންގެ ރަސްގެފާނު ޢަބްދުﷲ އދ. ގައި ބައިނަލްއަގްވާމީ މުޖުތަމައަށް ވަރަށް ބޮޑަށް ފާޑުވިދާޅުވެއްޖެ. ފަލަސްތީނުގެ ބިންތައް ފޭރިގަނެ، ރައްޔިތުން ގެދޮރުން ނެރެލުމަކީ އެ މީހުން ބޭރުކޮށްލުމަށް ހިންގާ ސިޔާސަތެއްކަން ފާހަގަކުރައްވައި، ޣައްޒާގެ ގަތުލުއާންމު ހުއްޓުވުމަށް އެމަނިކުފާނު ވަނީ ގޮވާލައްވާފައި
އުރުދުންގެ ރަސްގެފާނު ޢަބްދުالله ދެވަނަ އދ. ގެ އާންމު މަޖިލީހުގެ ޖަލްސާގައި ތަގުރީރު ކުރައްވަނީ | އަނަދޮލު އޭޖެންސީ
ފަލަސްތީނާއި އިސްރާއީލްގެ މައްސަލަ ހައްލުކުރުމުން ބައިނަލްއަގްވާމީ މުޖުތަމައު ދުރުހެލިވެ، އޭގެ ބަދަލުގައި އިޚްތިޔާރުކޮށްފައި ވަނީ އެ މައްސަލައަށް ބަލަހައްޓައިގެން ތިބުމަށް ކަމަށް ވިދާޅުވެ، އދ. ގެ އާންމު މަޖިލީހުގައި އަންގާރަ ދުވަހު ތަގުރީރު ކުރައްވަމުން އުރުދުންގެ ރަސްގެފާނު ޢަބްދުﷲ ބައިނަލްއަގްވާމީ މުޖުތަމައަށް ވަރަށް ބޮޑަށް ފާޑުވިދާޅުވެއްޖެ އެވެ.
"ފަލަސްތީނާއި އިސްރާއީލްގެ މައްސަލައަށް ހައްލެއް ނުހޯދައި ދޫކޮށްލުމުގެ ނުރައްކަލާ މެދު މި މަޖިލީހުގެ ކުރިމަތީގައި އަޅުގަނޑު އިންޒާރު ދެމުން އަންނަތާ އެތައް ދަހަރެއް ވެއްޖެ. އެކަމަކު، ބައިނަލްއަގްވާމީ މުޖުތަމައުން އިޚްތިޔާރުކުރީ މައްސަލައާ ކުރިމަތިލުމުގެ ބަދަލުގައި، އެ މައްސަލަ މެނޭޖްކުރުމަށް،" ނިއު ޔޯކްގައި ކުރިއަށްދާ އދ. ގެ އާންމު މަޖިލީހުގެ 81 ވަނަ ސެޝަންގައި ތަގުރީރު ކުރައްވަމުން ރަސްގެފާނު ޢަބްދުﷲ ވިދާޅުވި އެވެ.
އިސްރާއީލްގެ ކޮންމެ އާ ޚިލާފުވުމަކާ މެދު ވެސް ފުރަތަމަ އަމަލުކުރެވުނީ އެއީ ވަގުތީ ކަމެއްގެ ގޮތުގައި ކަމަށާއި، އެއީ "ވަގުތީ ކަންކަން ދާއިމީ ކަންކަމަށް ވެ، އަދި ދާއިމީ ކަންކަން ސިޔާސަތަކަށް ބަދަލުވަންދެން" ބަލަން ތިބުން ކަމަށް ރަސްގެފާނު ވިދާޅުވި އެވެ.
އިސްތިއުމާރު ކޮށްފައިވާ ހުޅަނގު އައްސޭރިން ފަލަސްތީނުގެ ރައްޔިތުން ގަދަކަމުން ގެދޮރުން ނެރެލުމަކީ "ހަނގުރާމައިގެ ޖަރީމާއެއް" ކަމަށް އުރުދުންގެ ރަސްގެފާނު ވިދާޅުވި އެވެ. އަދި، އެ ސަރަހައްދުގައި ހިނގަމުންދާ ކަންކަމަކީ ހަމައެކަނި މަސްރަހު ގޯސްވުމެއް ނޫން ކަމަށާއި، އެއީ "އަސާސީ ބަދަލެއް" ގެ ގޮތުގައި އޭނާ ސިފަކުރެއްވި އެވެ.
ހުޅަނގު އައްސޭރީގައި ނުގަވާއިދުން އިސްރާއީލުގެ ރައްޔިތުން ވަޒަންވެރިކުރުވުމަށް އިތުރު ބިންތައް ފޭރިގަނެ، ވަޒަންވެރިން ދިރިއުޅޭ ސަރަހައްދުތައް ފުޅާކުރަމުންދާ ކަމަށާއި، ފަލަސްތީނުގެ ރައްޔިތުން "އަޅުވެތިކަމުގެ" ތެރޭގައި ބައިތިއްބަމުންދާ ކަން ރަސްގެފާނު ފާހަގަކުރެއްވި އެވެ. މި ގޮތުން، ހުއްޓުމެއް ނެތި ވަޒަންވެރިކުރުވުން އިތުރުކުރުމާއި، ހިންގާ އަނިޔާވެރިކަމާއި، މީހުން ގެދޮރުން ނެރެލުމަކީ ފަލަސްތީނު މީހުން އެ މީހުންގެ ބިމުން ބޭރުކޮށްލުމަށް އަމާޒުކޮށް ހިންގާ "އެއް ސިޔާސަތެއްގެ ބައިތައް" ކަމަށް ރަސްގެފާނު ޢަބްދުﷲ ވިދާޅުވި އެވެ.
ޣައްޒާގެ ގަތުލުއާންމު ހުއްޓާލުމަށް އެއްބަސްވި ފަހުން ފާއިތުވި ފުރަތަމަ 300 ވަރަކަށް ދުވަހުގެ ތެރޭގައި ވެސް ޣައްޒާއިން 300 އަށްވުރެ ގިނަ ކުޑަކުދިން ޝަހީދު ކޮށްލާފައިވާ ކަން ރަސްގެފާނު ޢަބްދުالله ހާމަކުރެއްވި އެވެ. އަދި، ޣައްޒާގައި އުރުދުނުން ގާއިމުކޮށްދީފައިވާ ފީލްޑް ހޮސްޕިޓަލްތަކަށް އިސްރާއީލުގެ ސިފައިން ގަސްދުގައި ނިރުބަވެރި ހަމަލާތައް އަމާޒުކުރަމުންދާ ކަން ވެސް އޭނާ ފާހަގަކުރެއްވި އެވެ.
މަސްދަރު: އަނަދޮލު އޭޖެންސީ
