ހުޅަނގު އައްސޭރީގައި ދިރިއުޅޭ އެމެރިކާ ރައްޔިތެއްގެ ގޭގައި އިސްރާއީލުގެ ވަޒަންވެރިން ހުޅުޖަހައިފި

ޔަހޫދީ އިސްރާއީލުން އިސްތިއުމާރު ކޮށްފައިވާ ފަލަސްތީނުގެ ހުޅަނގު އައްސޭރީގެ ރާމަﷲ ގެ އިރުމަތީގައި އޮންނަ އަވަށަކަށް ރޭގަނޑުގެ ވަގުތެއްގައި ދިން ހަމަލާއެއްގައި، ހަތިޔާރުއެޅި އިސްރާއީލްގެ ވަޒަންވެރިންތަކެއް ފަލަސްތީނު ދަރިކޮޅުގެ އެމެރިކާ ރައްޔިތެއްގެ ގެއަށް ހަމަލާދީ ތިން އުޅަނދެއްގައި ރޯކޮށްލާފައި އެވެ.

މުސްތަފާ ޒަޢުތަރު ބުނީ، ދަންވަރު ގާތްގަނޑަކަށް 1:30 ހާއިރު އިސްރާއީލްގެ ގިނަ އަދަދެއްގެ ވަޒަންވެރިންނެއް އަބޫ ފަލާހް އަވަށަށް ވަދެގަތް ކަމަށެވެ. އަދި، އެ މީހުން އޭނާގެ ގެ ވަށާލައި މުދަލަށް ގެއްލުންދިނުމަށް ފަހު، އުޅަނދުތަކުގައި އަލިފާން ރޯކޮށްލި ކަމަށް ވެސް އޭނާ ބުންޏެވެ. ގޭގައި ވަށައިގެން ހަރުކޮށްފައިވާ ސެކިއުރިޓީ ކެމެރާތަކުން އެ ހަމަލާ ހިނގަމުންދިޔަ މަންޒަރު އޭނާ ވަނީ ބަލާފަ އެވެ. "ގާތްގަނޑަކަށް 10 މިނެޓުގެ ތެރޭގައި، އެ ކާރުތަކުގައި އަލިފާން ރޯވެ އަނދައިގެންދިޔަ މަންޒަރު އަޅުގަނޑުމެން ދުށީން،" ޒަޢުތަރު ބުންޏެވެ.

Advertisement

އަވަށުގެ ރައްޔިތުން ފަހުން އެ ވަޒަންވެރިންނާ ކުރިމަތިލައި އަލިފާންގަނޑު ނިއްވާލި ކަމަށް ޒަޢުތަރު ކިޔައިދިނެވެ. މި ގޮތުން، އަވަށުގެ މީހުން އެ މަސައްކަތް ކުރީ ބަޑީގެ ހަމަލާއެއް އަމާޒުވެދާނެ ކަމުގެ ބިރުވެރިކަމުގެ ތެރޭގައި ތިބެ ކަން ވެސް އޭނާ ފާހަގަކުރި އެވެ. މިދިޔަ އަހަރު ވެސް އެ ސަރަހައްދުގައި އިސްރާއީލްގެ ހައްދުފަހަނަ އެޅި ވަޒަންވެރިން ދިން ހަމަލާއެއްގައި ފަލަސްތީނުގެ ދެ މީހަކު ޝަހީދުކޮށްލާފައިވާ ކަމަށް ޒަޢުތަރު ބުންޏެވެ. "އެ މީހުން [ޣައިރުގާނޫނީ ވަޒަންވެރިން] މަސައްކަތް ކުރަމުން އެ ދަނީ އަޅުގަނޑުމެންގެ ބިމުން އަޅުގަނޑުމެން ނެރެލުމަށް،" އޭނާ ބުންޏެވެ. "އަޅުގަނޑުމެން ތިބޭނީ މި ތަނުގައި. އަޅުގަނޑުމެން ދުރަކަށް ނުދާނަން."

އެމެރިކާގެ ރައްޔިތުކަން ވެސް އޮންނަ ޒަޢުތަރު ބުނީ، އެ ރައްޔިތުކަމުގެ ސަބަބުން އޭނާއަށް އެއްވެސް ރައްކާތެރިކަމެއް ލިބިފައި ނުވާ ކަމަށެވެ. "އަޅުގަނޑަކީ އެމެރިކާގެ ރައްޔިތެއް، ނަމަވެސް އެ ކަމުގެ ސަބަބުން އަޅުގަނޑަށް އެއްވެސް ރައްކާތެރިކަމެއް ނުވަތަ އެހީތެރިކަމެއް ލިބުނު ކަމުގެ އިހުސާސެއް ނުކުރެވޭ،" އޭނާ ބުންޏެވެ. އެމެރިކާގައި ދިރިއުޅޭ އޭނާގެ އާއިލާގެ މެންބަރުން އެމެރިކާގެ ކޮންސިއުލޭޓާ ގުޅުމުން، ފަހުން އެ ކޮންސިއުލޭޓުން އޭނާއާ ގުޅި ކަމަށް ޒަޢުތަރު ބުންޏެވެ. އަދި، ލިބިފައިވާ ގެއްލުންތަކާއި އޭނާއަށް ކުރިމަތިވެފައިވާ ނުރައްކާތައް ވަޒަންކުރުމަށް ޓަކައި އޭނާގެ ގެއަށް ޒިޔާރަތްކުރުމަށް ކޮންސިއުލޭޓުގެ އޮފިޝަލުންގެ ކިބައިން އޭނާ ވަނީ އެދިފަ އެވެ.

އިސްތިއުމާރު ކޮށްފައިވާ ހުޅަނގު އައްސޭރީގެ އެކި ސަރަހައްދުތަކުގައި ފަލަސްތީނު މީހުންނާ ދެކޮޅަށް އިސްރާއީލްގެ ޣައިރުގާނޫނީ ވަޒަންވެރިން ހިންގާ އަނިޔާވެރި އަމަލުތަކަކީ "ޓެރަރިޒަމް" ގެ ގޮތުގައި، އިސްރާއީލަށް އެމެރިކާއިން ކަނޑައަޅާފައި ހުންނަވާ ސަފީރު މައިކް ހަކަބީ އޮގަސްޓު މަހު ވަނީ ސިފަކުރައްވާފަ ވެ އެވެ. މި ފަދަ އަނިޔާވެރި އަމަލުތަކުގެ ސަބަބުން އިސްރާއީލްގެ އަގު ވެއްޓޭ ކަމުގެ އިންޒާރު ވެސް އޭނާ ވަނީ ދެއްވި އެވެ.

އޮކްޓޫބަރު 2023 ގައި ޣައްޒާ ގަތުލުއާންމު ފެށި ފަހުން، ހުޅަނގު އައްސޭރީގައި އިސްރާއީލްގެ އަސްކަރިއްޔާއިން އަދި ހައްދުފަހަނަ އެޅި ވަޒަންވެރިން ދެމުންގެންދާ ހަމަލާތައް ވަނީ ވަރަށް ބޮޑަށް އިތުރުވެފަ އެވެ. ފަލަސްތީނުގެ ރަސްމީ ހިސާބުތަކުން ދައްކާ ގޮތުގައި، އެ މުއްދަތުގެ ތެރޭގައި  1،206 ފަލަސްތީނު މީހުން ވަނީ ޝަހީދުކޮށްލާފަ އެވެ. އޭގެ ތެރޭގައި 254 ކުޑަކުދިން ހިމެނެ އެވެ. އަދި، ގާތްގަނޑަކަށް 13،350 މީހުން ޒަޚަމްކޮށްލައި، 24،600 އަށް ވުރެ ގިނަ މީހުން ވަނީ ހައްޔަރުކޮށްފަ އެވެ.