ނަތަންޔާހޫއަކީ "ހަނގުރާމައިގެ ކުށްވެރިއެއް"، ދޯހާއިން މެދުވެރިއެއްގެ ގޮތުގައި ދެމިއޮންނާނެ: ޝައިޚް މުޙައްމަދު

އިސްރާއީލްގެ ބޮޑުވަޒީރު ބެންޖަމިން ނަތަންޔާހޫއަކީ "ހަނގުރާމައިގެ ކުށްވެރިއެއް" ކަމަށް ވިދާޅުވެ،  ސަރަހައްދީ ނުތަނަވަސްކަން އިންތިހާއަށް އިތުރުވެފައިވީ ނަމަވެސް، ދޯހާއިން އިސްނަގައިގެން ސުލްހަ ގާއިމުކުރުމަށް މެދުވެރިއެއްގެ ގޮތުގައި ކުރަމުންދާ މަސައްކަތްތައް ހުއްޓުމެއްނެތި ކުރިއަށް ގެންދާނެ ކަމަށް ގަތަރުގެ ބޮޑުވަޒީރު އަދި ޚާރިޖީ ވަޒީރު ޝައިޚް މުޙައްމަދު ބިން ޢަބްދުއްރަޙްމާން އަލް-ޘާނީ އަންގާރަ ދުވަހު ވިދާޅުވެއްޖެ އެވެ.

އިނގިރޭސިވިލާތުގެ ނޫސްވެރިޔާ ޕިއާސް މޯގަންއާއެކު ކުރިއަށް ގެންދެވި އިންޓަވިއުއެއްގައި، ނަތަންޔާހޫއަކީ ހަނގުރާމައިގެ ކުށްވެރިއެއްގެ ގޮތުގައި ދެކެވަޑައިގަންނަވާތޯ ސުވާލު ދެންނެވުމުން، “ހަމަގައިމު ވެސް. ޣައްޒާގައި ހިންގަމުން އެ ދަނީ ހަނގުރާމައިގެ ކުށްތައް، އަދި މި ކަމަށް ޒިންމާވާ ކޮންމެ މީހަކީ ހަނގުރާމައިގެ ކުށްވެރިއެއް،” ޝައިޚް މުޙައްމަދު ވިދާޅުވި އެވެ. މީގެ އިތުރުން، "ހޮސްޕިޓަލްތަކަށް ވަނީ [ހަމަލާތައް] އަމާޒުކޮށްފައި، ސްކޫލްތަކަށް ވަނީ އަމާޒުކޮށްފައި. ކޮންމެ ބަހަނާއެއް ދެއްކި ނަމަވެސް، އަދި ކޮންމެ ދަލީލެއް ގެނައި ނަމަވެސް، މިއިން އެއްވެސް ކަމެއް ދިފާއުކުރެވޭނެ އެއްވެސް ހަމައެއް ނެތް،” އޭނާ ވިދާޅުވި އެވެ.

Advertisement

މީގެ އިތުރުން، އަމިއްލަ އަމަލުތަކާއި ސަރުކާރުގެ އަމަލުތަކުން މީސްތަކުންގެ ސަމާލުކަން އެހެން ދިމާއަކަށް އަނބުރާލުމުގެ ބޭނުމުގައި، ނަތަންޔާހޫ ސިޔާސީ ގޮތުން ގަތަރަށް ހެމުންދާ ކަމަށް ވެސް އޭނާ ވިދާޅުވި އެވެ. ސުލްހައިގެ މަޝްވަރާތަކުގައި މެދުވެރިއެއްގެ މަސައްކަތުގައި ގަތަރު ދެމިއޮއްވައި، ހަމާސްގެ އިސް އޮފިޝަލުންނަށް އަމާޒުކޮށް 2025 ސެޕްޓެމްބަރު 9 ގައި އިސްރާއީލުން ދޯހާއަށް ދިން ހަމަލާ، ޝައިޚް މުޙައްމަދު ވަނީ ކުށްވެރިކުރައްވާފަ އެވެ. އެ ހަމަލާގައި ހަމާސްގެ ފަސް މެންބަރަކާއި ގަތަރުގެ ސަލާމަތީ އޮފިސަރަކު ވަނީ ޝަހީދުވެފަ އެވެ.

އެ ހަމަލާއަކީ މެދުވެރިއަކަށް އަމާޒުކޮށް ދިން މި ފަދަ ދެވަނައެއް ނެތް ވަރުގެ ހަމަލާއެއްގެ ގޮތުގައި ސިފަކުރައްވަމުން، "އަޅުގަނޑުމެން މެދުވެރިއެއްގެ ދައުރު އަދާކުރަމުން ދަނިކޮށް، އިސްރާއީލުން ވަނީ އަޅުގަނޑުމެންނަށް ހަމަލާދީފައި،” ކަމަށް ޝައިޚް މުޙައްމަދު ވިދާޅުވި އެވެ. އަދި، "އޭގެ ކުރިން ވެސް އެތައް ރޮނގެއް ހުރަސްކުރި ފަދައިން، ނަތަންޔާހޫ ވަނީ މި ފަހަރު ވެސް ރޮނގު ފަހަނައަޅައި ގޮސްފައި،" އޭނާ ވިދާޅުވި އެވެ.

މި ފަދަ ނުތަނަވަސްކަން އޮތް ނަމަވެސް، ޑިޕްލޮމަސީއަށް އަބަދުވެސް އިސްކަންދޭނެ ކަމަށް ވިދާޅުވެ، ކުރިއެރުމެއް ހޯދުމަށް އޮތް އެންމެ ފައިދާހުރި ވަސީލަތަކީ ފަރުދާގެ ފުރަގަހުގައި ކުރެވޭ މަޝްވަރާތައް ކަމުގައި ޝައިޚް މުޙައްމަދު ފާހަގަކުރެއްވި އެވެ. "ހައްލަކާ ހަމައަށް ވާސިލްވާނެ ގޮތްތަކާ ގުޅޭގޮތުން އެމެރިކާގެ ސަރުކާރަށާއި އީރާނަށް އެންމެ ފުރިހަމަ ލަފާ އެރުވުމަށް އަޅުގަނޑުމެން މި ދަނީ މަސައްކަތްކުރަމުން،” އޭނާ ވިދާޅުވި އެވެ.

މުޅި ސަރަހައްދަށް ފެތުރިފައިވާ ހަމަނުޖެހުންތަކާ ގުޅޭގޮތުން ވާހަކަފުޅު ދައްކަވަމުން، ހަނގުރާމައިގެ ހުޅުގަނޑު މައިތިރިކުރުމަށް ޓަކައި މައިގަނޑު ތިން ކަމަކަށް ހައްލު ހޯދަންޖެހޭ ކަމަށް ޝައިޚް މުޙައްމަދު ބަޔާންކުރެއްވި އެވެ. މި ގޮތުން ފާހަގަކުރެއްވި ކަންތައްތަކަކީ އީރާނުގެ ނިއުކްލިއާ ޕްރޮގްރާމާއި އެ ޤައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާއި، ހުރްމުޒް ކަނޑުއޮޅިން ދަތުރުފަތުރު ކުރުމުގެ މިނިވަންކަން ކަށަވަރުކުރުމާއި، އީރާނާއި ގަލްފް ކޯޕަރޭޝަން ކައުންސިލްގެ (ޖީސީސީ) ޤައުމުތައް ހިމެނޭ ސަރަހައްދީ ސަލާމަތީ އިންތިޒާމުތަކެވެ.

އަދި، ސަރަހައްދީ ސަލާމަތީ ކޮންމެ އޮނިގަނޑެއް ވެސް ބިނާވާންވާނީ މަޝްވަރާއާއި، އެއް ބަޔަކު އަނެއް ބައެއްގެ ދާޚިލީ ކަންކަމުގެ ތެރެއަށް ނުފޫޒު ނުފޯރުވުމާއި، އިސްވެ ހަމަލާނުދިނުމުގެ އިތުރުން އިގްތިސާދީ ގޮތުން އެއްބާރުލުން އިތުރުކުރުމުގެ މައްޗަށް ކަން ޝައިޚް މުޙައްމަދު ފާހަގަކުރެއްވި އެވެ.

އަންގާރަ ދުވަހުގެ ކުރީކޮޅު، ދޯހާއިން މެދުވެރިއެއްގެ މަސައްކަތް މެދުކެނޑުމެއްނެތި ކުރިއަށް ގެންދާ ކަމަށާއި، އެމެރިކާއާއި އީރާނާ ދެމެދު މެސެޖުތައް ބަދަލުކުރުމުގެ ދައުރު އަދާކުރަމުން އަންނަ ކަމަށް ގަތަރުގެ ޚާރިޖީ ވުޒާރާގެ ތަރުޖަމާނު މާޖިދު އަލް-އަންސާރީ ވެސް ވަނީ ވިދާޅުވެފަ އެވެ. އަސްކަރީ ކުރިމަތިލުންތައް އިތުރަށް ވަރުގަދަވެދާނެ ކަމުގެ ކަންބޮޑުވުން ގަތަރުގައި އަދިވެސް އޮތް ކަމަށާއި، އެ ޤައުމުން މަސައްކަތް ކުރަމުން ދަނީ ސުލްހަވެރި ހައްލެއް ހޯދުމަށް ކަމަށް ވެސް ތަރުޖަމާނު ފާހަގަކުރެއްވި އެވެ.