ޣައްޒާ ގަތުލުއާންމާ ދެކޮޅަށް އަޑުއުފުލަން މަޝްހޫރު ރެޕަރު މެކްލެމޯގެ ޚާއްސަ ޓުއާއެއް ފަށަނީ

އިސްރާއީލުން ފަލަސްތީނުގެ ޣައްޒާގައި ހިންގަމުންދާ ގަތުލުއާންމާ ދެކޮޅަށް އަޑުއުފުލުމާ ގުޅިގެން މަޝްހޫރު ލަވަކިޔުންތެރިޔާ އެޑް ޝީރަންގެ އެމެރިކާ ޓުއާއިން ވަކިކުރުމުން އުފެދުނު ބޮޑު ޚިޔާލުތަފާތުވުންތަކަށް ފަހު، ގްރެމީ އެވޯޑް ހާސިލުކޮށްފައިވާ އެމެރިކާގެ ރެޕަރު މެކްލެމޯ ފަލަސްތީނުގެ ހައްގުގައި ޚާއްސަ ޝޯތަކެއް ބާއްވަން ނިންމައި އެ ކަން އިއުލާނުކޮށްފި އެވެ.

މަހެއްގެ ތެރޭގައި ސްޕޮޓިފައިއިން 40 މިލިޔަން އެހުންތެރިން ގެއްލުނު 43 އަހަރުގެ މެކްލެކޯ ބުރާސްފަތި ދުވަހު ބުނީ، ފަލަސްތީނުގެ ހައްގުތަކަށް ގޮވާލާ އަޑު އުފުލުމަށް 'ފްރީ ޕަލަސްޓައިން' ގެ ނަމުގައި ޚާއްސަ ޓުއާއެއް ބާއްވަން ނިންމާފައިވާ ކަމަށެވެ. މި ޓުއާގެ ޝޯތައް އަންނަ އޮކްޓޫބަރު މަހުގެ ފަހުކޮޅު ޑަބްލިން، ޕެރިސް އަދި ލަންޑަންގައި ބޭއްވުމަށް ހަމަޖައްސާފައިވާ ކަން ވެސް އޭނާ އިއުލާނު ކުރި އެވެ.

Advertisement

މި ޝޯތަކުގައި އެހެން މިއުޒީޝަނުން ވެސް އޭނާއާ އެކު ބައިވެރިވާނެ ކަމަށާއި، އެ ފަރާތްތަކުގެ ނަންތައް ވަރަށް އަވަހަށް ހާމަކުރާނެ ކަމަށް މެކްލެމޯ ބުންޏެވެ. އަދި، އެމެރިކާގައި ބާއްވާ ޝޯތައް އިންތިޒާމުކުރުމުގެ މަސައްކަތް ވެސް މިހާރު ކުރިއަށްދާ ކަމަށް އޭނާ ބުންޏެވެ.

މި ޓުއާއިން ލިބޭ ހުރިހާ ފައިސާއެއް ހަދިޔާކުރުމަށް ހަމަޖެހިފައިވަނީ ފަލަސްތީނުގެ ރައްޔިތުންނަށާއި ފަލަސްތީނުގެ މިނިވަންކަމުގެ ހަރަކާތްތަކަށް އެހީތެރިވާ ފަރާތްތަކަށް ކަމަށް އޭނާ ހާމަކުރި އެވެ. "މިދިޔަ ދެ ތިން ހަފުތާއިން އެއްވެސް ކަމެއް ހާމަވެގެންދިޔަ ނަމަ، އެއީ ވޭތުވެދިޔަ ތިން އަހަރު ދުވަހުގެ ތެރޭގައި ކަންކަމަށް ބަދަލެއް އަތުވެއްޖެކަން،” މެކްލެމޯ ނެރުނު ބަޔާނެއްގައި ބުނެފައިވެ އެވެ.

"ފަލަސްތީނު މިނިވަންކުރުމާ ގުޅޭ ގޮތުންނާއި، އެ ގޮވާލުން ހުއްޓުވަން މަސައްކަތްކުރާ ބިލިއަނަރުންގެ ނުފޫޒާ މެދު، އަދި މި ދަނޑިވަޅުގައި ފަންނާނުންގެ ކިބައިން އުންމީދުކުރެވޭ ކަންކަމާ މެދު އާންމުންގެ މެދުގައި ވަނީ  ހޭލުންތެރިކަމެއް އުފެދިފައި. މިއީ، 2026 ވަނަ އަހަރު. ގަތުލުއާންމެއް ހިނގަމުންދާއިރު ސިޔާސީ ކަންކަމާ ދުރުގައި ވަކިފަރާތަކަށް ނުޖެހި ހުރުމަކީ ދެން ކުރެވޭނެ ކަމެއް ނޫން،” މެކްލެމޯ ބުންޏެވެ.

"އާންމުން މިއަދު ފަންނާނުންގެ ކިބައިން އެދެނީ ކަންކަމުގައި ބައިވެރިވުމަށާއި، ކަންކަން އޮޅުންފިލުވައި ދަސްކުރުމަށާއި، މުޖުތަމައާއެކު ދެމިތިބުމަށް. ސްޓޭޖަކީ ހަމައެކަނި މުނިފޫހިފިލުވުމަށް ވުރެ މާ މަތީ ކަމަކަށް ބޭނުންކުރާ ތަނަކަށް ހެދުމަށް. ފަލަސްތީނު މިނިވަންކުރުމަށް ގޮވާލާ ގޮވާލުމުގެ އަޑު ކަނޑުވާލަން މަސައްކަތްކުރާ ހާލަތްތަކުގައި އެ ކަމާ ދެކޮޅަށް ތެދުވުމަށް،” މެކްލެމޯ ބުންޏެވެ.

އިނގިރޭސި ޕަންކް ރެޕް ޑުއޯ ބޮބް ވައިލަން ވެސް ވަނީ މެކްލެމޯގެ އިންސްޓަގްރާމް ޕޯސްޓަށް ހިތެއްގެ އިމޯޖީއަކުން ރައްދުދީ، މި ޓުއާއަށް ތާއީދުކުރާކަން ހާމަކޮށްފަ އެވެ. އަދި، އިންސްޓަގްރާމުގައި ހަތަރު މިލިއަނަށް ވުރެ ގިނަ ފޮލޮވަރުން ތިބޭ އިނގިރޭސި ޔޫޓިއުބަރު އަދި އިންފްލުއެންސަރު ޗަންކްޒް ވެސް ވަނީ މެކްލެމޯއަށް ތައުރީފުކޮށްފަ އެވެ.

މެކްލެމޯގެ އަޑު ކަނޑުވާލަން ކުރި މަސައްކަތްތައް

ނިއު ޖާޒީގެ މެޓްލައިފް ސްޓޭޑިއަމްގައި ސެޕްޓެންބަރު 4 ވަނަ ދުވަހު އޮތް ކޮންސެޓުގައި، މަޝްހޫރު ލަވަކިޔުންތެރިޔާ އެޑް ޝީރަންގެ ޝޯ ފެށުމުގެ ގޮތުން ޕާފޯމްކުރި މެކްލެމޯ ވަނީ ފަލަސްތީނަށް ތާއީދުކޮށް ވާހަކަދައްކާފަ އެވެ. އަދި، އެއާއެކު އޭނާ ޓޫއާއިން ބޭރު ކުރުމަށް އެޑް ޝީރަން ވަނީ ނިންމާފަ އެވެ.

"އަހަރެން މި ޓުއާގައި ބައިވެރިވާން އެންމެ ބޮޑަށް ބޭނުންވި އެއް ސަބަބަކީ، މި ފަދަ ސްޓޭޑިއަމްތަކުގައި ހުރެ، އަޅުގަނޑުގެ ހިތާ އެންމެ ގާތް ދެ ލަފުޒު ކަމަށްވާ 'ފްރީ ޕަލަސްޓައިން' މި ހެން ބުނުމުގެ ފުރުސަތު ހޯދުން... އަޅުގަނޑުގެ މެސެޖަކީ ސުލްހައިގެ މެސެޖެއް؛ ހުރިހާ އިންސާނުންނާމެދު ވެސް ކަރާމާތާއި، އިހުތިރާމާއި، ހަމަހަމަކަމާ އެކު މުއާމަލާތުކުރުމަށް އޮތް ލޯބީގެ މެސެޖެއް،” އެޑް ޝީރަންގެ ޝޯ ފަށައިދިނުމުގެ ގޮތުން މެކްލެމޯ ބުންޏެވެ.

މި ހާދިސާއަށް ފަހު މާ ގިނަ ދުވަސްތަކެއް ނުވެ، ޝީރަންގެ ޓުއާއިން އޭނާ ވަކިކޮށްފައިވާ ކަން މެކްލެމޯ ވަނީ ހާމަކޮށްފަ އެވެ. ޓޫއާއިން މެކްލެމޯ ވަކިކުރުމަށް އެޑް ޝީރަން ނިންމީ، އިސްރާއީލަށް ތާއީދުކުރާ ބިލިޔަނަރު ރޮބަޓް ކްރާފްޓެވެ. އޭނާވަނީ، ޓުއާގައި މެކްލެމޯ ބައިވެރިވާ ނަމަ މެސެޗުސެޓްސްގެ ފޮކްސްބަރޯގައި ހުންނަ އޭނާގެ ޖިލެޓް ސްޓޭޑިއަމްގައި ޝޯ ބޭއްވުމުގެ ފުރުސަތު ނުދޭނެ ކަމަށް ބުނެ އެޑް ޝީރަންއަށް އިންޒާރު ދީފަ އެވެ.

ކްރާފްޓަކީ ޔަހޫދީ ދަރިކޮޅަށް ނިސްބަތްވާ އެމެރިކާގެ ބިލިއަނަރެއް ކަމަށް ވާއިރު، އޭނާ ވަނީ އިސްރާއީލްގެ އެކި ކަންކަމަށް މާލީ އެހީތެރިކަން ފޯރުކޮށްދީފަ އެވެ. ހަނގުރާމައިގެ ޖަރީމާތަކާއި އިންސާނިއްޔަތާ ޚިލާފު ޖަރީމާތަކާ ގުޅިގެން އިންޓަނޭޝަނަލް ކްރިމިނަލް ކޯޓުން (އައިސީސީ) ހައްޔަރުކުރުމުގެ އަމުރެއް ނެރެފައިވާ އިސްރާއީލްގެ ބޮޑުވަޒީރު ބެންޖަމިން ނަތަންޔާހޫ 2019 ވަނަ އަހަރު ވަނީ އޭނާއަށް އެންމެ "ވަފާތެރި އެކުވެރިއަކީ" ކްރާފްޓް ކަމަށް ބުނެފަ އެވެ. ޝީރަން އަދި އޭނާގެ ޓީމުން މެކްލެމޯ ޓުއާއިން ވަކިކުރީ ކްރާފްޓްގެ ފަރާތުން ކުރިމަތިވި ޕްރެޝަރާ ހުރެ ކަމަށް މެކްލެމޯ ބުނި ނަމަވެސް، އެޑް ޝީރަން އެ ކަން ކަށަވަރު ކޮށްދީފައެއް ނުވެ އެވެ.

މެކްލެމޯ ބައިވެރިވާ ޝޯތައް ކެންސަލް ކުރުމަށް ކްރާފްޓް ވަނީ ސްޓޭޑިޔަމްތަކުގެ ވެރިންނަށާއި އެހެން ބިލިޔަނަރުންނަށް ގުޅައި، ޕްރެޝަރު ކޮށްފައި ކަމަށް ރިޕޯޓުތައް ބުނެ އެވެ. އެޑް ޝީރާން ބުނީ، ޓޫއާއިން މެކްލެމޯ ވަކިކުރުމަށް ނިންމާފައި ވަނީ ޓުއާ ޕްރޮމޯޓު ކުރުމުގެ މަސައްކަތް ކުރި ކުންފުނިން ކަމަށެވެ. ނަމަވެސް، މެކްލެމޯ ވަކިކުރި މައްސަލައިގައި އެޑް ޝީރަން ފަހުން ވަނީ މާފަށް އެދިފަ އެވެ.