ނަތަންޔާހޫ ސިއްރުން ޔޫއޭއީއަށް ވަޑައިގެން ބިން ޒައިދާ ބައްދަލުކުރައްވައިފި
28 ސެޕްޓެމްބަރު 2026 | ހޯމަ 14:31އީރާނާ ގުޅޭގޮތުން މަޝްވަރާކުރުމަށް ނަތަންޔާހޫ ޔޫއޭއީއަށް ސިއްރު ދަތުރުފުޅެއް ކުރެއްވިކަން ހާމަވެފައިވާއިރު، އިސްރާއީލާއި ޔޫއޭއީގެ ސަލާމަތީ ގުޅުން މިހާރު ވަނީ ވަރަށް ބޮޑަށް ބަދަހިވެފައި
އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އާއި އޭނާގެ އަނބިކަނބަލުން ސާރާ ނަތަންޔާހޫ | ގެޓީ އިމޭޖަސް
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ މިދިޔަ އާދީއްތަ ދުވަހު ސިއްރު ދަތުރުފުޅެއްގައި އެކުވެރި އަރަބި އިމާރާތް (ޔޫއޭއީ) އަށް ވަޑައިގެން، އެ ގައުމުގެ ރައީސް ޝެއިޚް މުހައްމަދު ބިން ޒައިދުއާ ބައްދަލުކުރައްވާފައިވާ ކަމަށް މި ދަތުރުފުޅުގެ މައުލޫމާތު އެނގޭ އިސްރާއީލުގެ މަސްދަރަކުން ސީއެންއެން އަށް ކަށަވަރުކޮށްދީފި ކަމަށް ރިޕޯޓުކޮށްފި އެވެ.
މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ އީރާނާ ގުޅޭ ކަންކަމާ ބެހޭގޮތުން ކަމަށް އެ މަސްދަރުން ބުނެ އެވެ. އީރާނާ ދެކޮޅަށް ކުރަމުންދާ ހަނގުރާމައިގެ ތެރޭގައި ވެސް އިސްރާއީލާއި ޔޫއޭއީން ވަނީ މި ދާއިރާއިން އޮންނަ ގުޅުން އިތުރަށް ބަދަހިކޮށްފަ އެވެ.
ނަތަންޔާހޫގެ މި ދަތުރުފުޅާ ގުޅޭގޮތުން އިސްރާއީލުގެ ބޮޑުވަޒީރުގެ އޮފީހުން އެއްވެސް އެއްޗެއް ބުނެފައެއް ނުވެ އެވެ.
މިއީ އަންނަ އޮކްޓޫބަރު މަހުގެ 27 ވަނަ ދުވަހު ބޭއްވުމަށް ހަމަޖެހިފައިވާ އިސްރާއީލުގެ އިންތިޚާބުގެ ސީދާ އެއް މަސް ދުވަހަށް ވެފައިވަނިކޮށް ނަތަންޔާހޫ ކުރެއްވި ދަތުރުފުޅެކެވެ. މި ދަތުރުފުޅު މި ކުރެއްވީ، 2023 އޮކްޓޫބަރު 7 ގައި ހަމާސްއިން ދިން ހަމަލާގެ ދުވަސްތަކެއް ކުރިން، އެފަދަ ބޮޑު އޮޕަރޭޝަނެއް ހިންގަން އުޅޭކަމުގެ އިންޒާރު ބިން ޒައިދު ނަތަންޔާހޫއަށް ދެއްވި ކަމަށް ބުނެ ހާރެޓްޒް އަދި ނިއު ޔޯކް ޓައިމްސް އިން ރިޕޯޓްކުރުމާ ގުޅިގެން އިސްރާއީލުގެ ސިޔާސީ މަސްރަހު ހޫނުވެފައިވާ ދަނޑިވަޅެއްގަ އެވެ.
މީގެ އިތުރުން، ޣައްޒާގެ ހާލަތު "ގޮވާފާނެ" ކަމުގެ އިންޒާރު ދިނުމަށް މިސްރުގެ އިންޓެލިޖެންސް ވެރިޔާ އައްބާސް ކާމިލް 2023 ސެޕްޓެމްބަރު 26 ގައި އިސްރާއީލަށް ވަޑައިގެންނެވި ކަމަށް ދަ އެޓްލާންޓިކް އިން ވަނީ ރިޕޯޓްކޮށްފަ އެވެ. އަދި އާދީއްތަ ދުވަހު ވޯލް ސްޓްރީޓް ޖާނަލް އިން ރިޕޯޓްކުރި ގޮތުގައި، ޣައްޒާއާ ގުޅޭގޮތުން މިސްރުން ތިން ފަހަރެއްގެ މަތިން އިސްރާއީލަށް އިންޒާރު ދީފައިވެ އެވެ. އޭގެ ތެރެއިން އެންމެ ފަހު އިންޒާރު ދީފައިވަނީ ހަމަލާގެ މަދު ދުވަސްކޮޅެއް ކުރިން ނަތަންޔާހޫއަށް ފޯނުން ގުޅައިގެންނެވެ.
ނަތަންޔާހޫގެ އޮފީހުން ވަނީ އެއްވެސް އިންޒާރެއް ލިބުނުކަމަށް ތަކުރާރުކޮށް އިންކާރުކޮށްފަ އެވެ. އަދި އެއީ އިންތިޚާބުގައި އޭނާގެ އަގު ވައްޓާލުމަށް ހަދާފައިވާ ދޮގު ވާހަކަތަކެއް ކަމަށް ބުނެ އެ ރިޕޯޓްތައް ވަނީ ބޭރުކޮށްލާފަ އެވެ. ނަމަވެސް، ނަތަންޔާހޫގެ ސިޔާސީ ވާދަވެރިން ދަނީ 2023 އޮކްޓޫބަރު 7 ގެ ހަމަލާ ހުއްޓުވުމުގައި ފެއިލްވި ފެއިލްވުމުގެ ޒިންމާ އުފުލުމަކީ އިންތިޚާބުގެ މައިގަނޑު މައްސަލައަކަށް ހަދަމުންނެވެ.
ބިން ޒައިދު އިންޒާރު ދެއްވި ކަމަށް ބުނާ ރިޕޯޓްތަކާ ގުޅިގެން ޔޫއޭއީގެ ފޮރިން މިނިސްޓްރީން މި މަހުގެ ކުރީކޮޅު ބުނެފައިވަނީ، ސަރުކާރުތަކުގެ ވެރިންގެ މެދުގައި ދެކެވޭ ވާހަކަތަކާ ގުޅޭގޮތުން މީޑިއާތަކުން ފަތުރާ ޚަބަރުތަކަށް އެ ގައުމުން ކޮމެންޓް ނުކުރާނެ ކަމަށެވެ. ނަމަވެސް އެ ފޯނު ކޯލް ކުރިކަން އެ ގައުމުން ދޮގެއް ނުކުރެ އެވެ. އެ މިނިސްޓްރީގެ ބަޔާނުގައި ބުނެފައިވަނީ، ބޭނުންވާ ހުރިހާ އިންޓެލިޖެންސް މައުލޫމާތެއް ކަމާބެހޭ އިދާރާތަކުގެ މެދުގައި މީގެ ކުރިން ވެސް އަދި މިހާރު ވެސް ހިއްސާކުރަމުންދާ ކަމަށެވެ.
އެ ދުވަސްވަރު މިކަމުގެ މައުލޫމާތު އެނގޭ އިސްރާއީލުގެ މަސްދަރަކުން ބުނި ގޮތުގައި، އެ ރިޕޯޓްތައް ދޮގުކުރުމަށް ނަތަންޔާހޫގެ އޮފީހުން ޔޫއޭއީގައި އެދުނެވެ. ނަމަވެސް ޔޫއޭއީން އެއްބަސްވީ ހަމައެކަނި އިންޓެލިޖެންސް މައުލޫމާތު ހިއްސާކުރުމާ ގުޅޭ ބަޔާނެއް ނެރުމަށެވެ.
މީގެ ފަހުން ނަތަންޔާހޫގެ ލިކޫޑް ޕާޓީން ނެރުނު ބަޔާނެއްގައި، ޔޫއޭއީގައި ހުންނަވާ ފަލަސްތީނުގެ ސިޔާސީ ފަރާތެއް ކަމަށްވާ މުހައްމަދު ދަހްލާން އިސްރާއީލުގެ އިންތިޚާބަށް "ސީދާ ގޮތުން ނުފޫޒު ފޯރުވަމުންދާ" ކަމަށް ތުހުމަތުކޮށްފައިވެ އެވެ. ނަމަވެސް އެ ޕާޓީން އެއްވެސް ހެއްކެއް ދައްކާފައެއް ނުވެ އެވެ.
އަނެއްކޮޅުން، ނަތަންޔާހޫގެ ވާދަވެރިން ދަނީ އޮކްޓޫބަރު 7 ގެ ކުރިން ކަންތައްތައް ހިނގައިދިޔަ ގޮތާ މެދު އޭނާއަށް އަމާޒުކުރާ ހަމަލާތައް ވަރުގަދަކުރަމުންނެވެ.
ކުރިއަށް އޮތް އިންތިޚާބުގައި ނަތަންޔާހޫއާ އެންމެ ގާތުން ވާދަކުރައްވާނެ ކަމަށް ބެލެވޭ ގާޑީ އައިޒެންކޮޓް ހޮނިހިރު ދުވަހު ވިދާޅުވީ، އިންޒާރުގެ ޚަބަރުތަކުން އެނގެނީ ނަތަންޔާހޫގެ ބޮޑާކަމާއި ޒިންމާދާރުކަން ކުޑަކަމުގެ ސަބަބުން އިސްރާއީލުގެ ތާރީޚުގައި ކުރިމަތިވި އެންމެ ބޮޑު ކާރިސާއަށް އެ ގައުމު ވައްޓާލާފައިވާ ކަމަށެވެ.
މިދިޔަ މެއި މަހު ނަތަންޔާހޫގެ އޮފީހުން ބުނެފައިވަނީ، އީރާނު ހަނގުރާމައިގެ ކުރީކޮޅު، މާރިޗު މަހު ބޮޑުވަޒީރު ސިއްރު ދަތުރުފުޅެއްގައި ޔޫއޭއީއަށް ވަޑައިގެންނެވި ކަމަށާއި އެއީ "ތާރީޚީ ކުރިއެރުމެއް" ކަމަށެވެ. ނަމަވެސް ޔޫއޭއީގެ ފޮރިން މިނިސްޓްރީން އެ ފަހަރު ވަނީ އެއީ އެއްވެސް އަސާސެއް ނެތް ވާހަކައެއް ކަމަށް ބުނެ އެކަން ދޮގުކޮށްފަ އެވެ.
ހަނގުރާމައިގެ ތެރޭގައި އިސްރާއީލުގެ "އަޔަން ޑޯމް" މިސައިލް ޑިފެންސް ސިސްޓަމް ޔޫއޭއީގައި ގާއިމުކޮށްފައިވާ ކަމަށް އަޑުފެތުރިފައިވާއިރު، ދެ ގައުމުގެ މެދުގައި އޮތް ސަލާމަތީ އެއްބާރުލުން މީގެ ކުރިން ދުވަހަކުވެސް ބަދަހިނުވާ މިންވަރަށް ވަރުގަދަވެފައިވާ ކަމަށް އިސްރާއީލުގެ އޮފިޝަލުން ބުނެ އެވެ.
މިހާތަނަށް ނަތަންޔާހޫ ޔޫއޭއީއަށް ކުރެއްވި އެއްވެސް ރަސްމީ ދަތުރުފުޅެއް އާންމުކޮށް އިއުލާނުކޮށް ކަށަވަރުކޮށްދީފައެއް ނުވެ އެވެ.
