ފުރަތަމަ ހާފުގައި ޖެހި ފަސް ލަނޑާއެކު، ބޮޑު ތަފާތަކުން ކިރްގިސްތާން އިން ރާއްޖެ ބަލިކޮށްފި

ބައިނަލްއަޤުވާމީ ރަހުމަތްތެރިކަމުގައި ކިރްގިސްތާންއާ ދެކޮޅަށް ކުޅުނު މެޗުން، ތަފާތު ބޮޑު ނަތީޖާއަކުން ރާއްޖޭގެ ޤައުމީ ފުޓުބޯޅަ ޓީމު ބަލިވެއްޖެ އެވެ.

ކިރްގިސްތާންގައި ހޯމަ ދުވަހުގެރޭ ކުޅުނު އެ މެޗުގައި އެ ޓީމުން ވަނީ 5-0 އިން ރާއްޖެ ބަލިކޮށްފަ އެވެ. މެޗުގައި ކިރްގިސްތާން އިން އެ ޓީމުގެ ފަސް ލަނޑު ވެސް ޖެހީ މެޗުގެ ފުރަތަމަ ހާފުގަ އެވެ.

މެޗު ފަށައިގެން 10 ވަނަ މިނެޓުގައި ކިރްގިސްތާން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޓަބައޭވް އެރްބޯލް އެވެ. އޭގެ ނުވަ މިނެޓު ފަހުން ކިރްގިސްތާންގެ ދެ ވަނަ ލަނޑު ޖަހައި ލީޑު ފުޅާކުރީ އަސްތަނަކުލޯވް ޝިރޯޒުދީން އެވެ. މިއީ ރާއްޖޭގެ ގޯލު ކީޕަރު ހުސެއިން ޝަރީފް އަށް ހެދުނު ގޯހެއްގައި ވަތް ލަަނޑެކެވެ.

މެޗުގެ 22 ވަނަ މިނެޓުގައި އަޓަބައޭވް ވަނީ ކިރްގިސްތާންގެ ތިން ވަނަ ލަނޑު ޖަހައިފަ އެވެ. އޭގެ ފަހުން ކިރްގިސްތާންގެ ހަތަރު ވަނަ ލަނޑު މުރްޒަކޯވް ވަލެރީ ޖެހީ 32 ވަނަ މިނެޓުގަ އެވެ. ފުރަތަމަ ހާފު ނިމުމުގެ ކުރިން ކިރްގިސްތާންގެ ފަސް ވަނަ ލަނޑު ޖެހީ ޖޮއެލް ކޯޖޯ އެވެ.

މިއީ ރާއްޖެ އާއި ކިރްގިސްތާން ބައްދަލުކުރި ފަސް ވަނަ ފަހަރެވެ. މީގެ ތެރެއިން ތިން ފަހަރު ކިރްގިސްތާން މޮޅުވީއިރު، ރާއްޖެ ވަނީ ދެ ފަހަރު މޮޅުވެފަ އެވެ. 12 އަހަރަށް ފަހު ރާއްޖެއާ ދެކޮޅަށް ކުޅުނު މެޗުން ކިރްގިސްތާން މޮޅުވީއިރު، މީގެ ކުރިން އެންމެ ފަހުން މި ދެ ޓީމު ބައްދަލުކުރީ 2014 ވަނަ އަހަރު އެވެ. އަނެއްކޮޅުން މިއީ 29 އަހަރަށް ފަހު ކިރްގިސްތާން އިން މި ވަނީ ރާއްޖެ ބަލިކޮށްފަ އެވެ.