ރާއްޖެ އާއި ބަންގްލަދޭޝް އެއްވަރުވެ، ފައިނަލްގެ ފަހު ޖާގަ އަފްޣާނިސްތާން އަށް
ހަތަރު ޓީމު ވާދަ ކުރާ މުބާރާތުގެ ފައިނަލްގައި ބައްދަލު ކުރާނީ ޕާކިސްތާން އާއި އަފްޣާނިސްތާން. ރާއްޖެއާ އެއްވަރުވެ ބަންގްލަދޭޝް އަށް ތިން ވަނަ ލިބުނުއިރު، ރާއްޖެ ދިޔައީ ފުލަށް.
ރާއްޖެ އާއި ބަންގްލަދޭޝް ބައްދަލު ކުރި މެޗުގެ ތެރެއިން. | އަދަދު ސްޕޯޓްސް
ރާއްޖޭގައި މިހާރު ކުރިއަށްދާ ޑައިމަންޑް ޖުބުލީ އިންޓަނޭޝަނަލް މުބާރާތުގެ ލީގު ބުރުގެ ފަހު މެޗުގައި ރާއްޖެ އާއި ބަންގްލަދޭޝް ބައްދަލު ކުރި މެޗު އެއްވަރުވެ، އަފްޣާނިސްތާން އަށް ފައިނަލްގެ ފަހު ޖާގަ ލިބިއްޖެ އެވެ.
އާދީއްތަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗަށް ނިކުތްއިރު ވެސް ރާއްޖެ ވަނީ މުބާރާތުން ކަޓައިފަ އެވެ. ނަމަވެސް، ރާއްޖެ އަތުން މޮޅުވެ ފައިނަލްގެ ޖާގަ ހޯދުމުގެ ފުރުސަތު ބަންގްލަދޭޝް އަށް އޮތެވެ. މެޗު އެއްވަރުވުމާ އެކު ބަންގްލަދޭޝް އަށް ފައިނަލްގެ ފުރުސަތު ގެއްލުނީ އެވެ.
މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ރާއްޖެ އިންނެވެ. އެގޮތުން ރާއްޖެ އަށް ލިބުނު ޕެނަލްޓީ ކާމިޔާބުކޮށް ލީޑު ނަގައިދިނީ އަލީ ފާސިރު (ސެންޓޭ) އެވެ. އެއީ ބަންގްލަދޭޝްގެ އޭރިޔާގެ ތެރެއިން ރާއްޖޭގެ ޢަބްދުﷲ ލޫތު އިބްރާހީމް އަށް ކުރި ފައުލަކާ ގުޅިގެން ދިން ޕެނަލްޓީ އެކެވެ.
ބަންގްލަދޭޝް އިން މެޗުގެ ނަތީޖާ ހަމަހަމަ ކުރީ ދެ ވަނަ ހާފުގަ އެވެ. އެގޮތުން ދެ ވަނަ ހާފު ފަށައިގެން ހަތް ވަނަ މިނެޓުގައި އެ ޓީމަށް ލިބުނު ޕެނަލްޓީ ކާމިޔާބުކޮށް ނަތީޖާ ހަމަހަމަ ކޮށްދިނީ މިރާޖުލް އިސްލާމް އެވެ. މި ޕެނަލްޓީ އަކީ ރާއްޖޭގެ އޭރިޔާ ތެރެއިން ޠާއިފް ޤާސިމްގެ އަތުގައި ބޯޅަ ޖެހުމުން ދިން ޕެނަލްޓީ އެކެވެ.
މެޗުގައި ރެފްރީގެ ނިންމުންތަކާ މެދު ބަންގްލަދޭޝްގެ ކުޅުންތެރިން ވަރަށް ބޮަޑަށް ނުރުހުން ފާޅު ކުރަމުން ދިޔައިރު، މެޗުގެ ފަހު ވަގުތު ވަނީ ބޮޑު ހަމަ ނުޖެހުމެއް ވެސް ހިނގައިފަ އެވެ. ރާއްޖޭގެ ކުޅުންތެރިންނާއި ބަންގްލަދޭޝްގެ ކުޅުންތެރިންނާ ދެމެދު ހިނގި ހަމަ ނުޖެހުމުގެ ތެރެއިން ބަންގްލަދޭޝްގެ ސަޕޯޓަރުން ވަނީ ދަނޑަށް ވެސް އަރައިގެންފައި އެވެ. އެކަން ކޮންޓްރޯލް ކުރަން ފުލުހުން ވަނީ މަސައްކަތް ކޮށްފައި އެވެ.
ހަތަރު ޓީމު ވާދަ ކުރާ މުބާރާތުގެ ފައިނަލްގައި ބައްދަލު ކުރާނީ ޕާކިސްތާން އާއި އަފްޣާނިސްތާން އެވެ. ރާއްޖެއާ އެއްވަރުވެ ބަންގްލަދޭޝް އަށް ތިން ވަނަ ލިބުނުއިރު، ރާއްޖެ ދިޔައީ ފުލަށެވެ.
