ސާފް ޗެމްޕިއަންޝިޕްގައި ރާއްޖޭގެ ފުރަތަމަ މެޗު ޕާކިސްތާންއާ ދެކޮޅަށް!

މިއަހަރު ބަންގްލަދޭޝްގައި އޮންނަ ސާފް ޗެމްޕިއަންޝިޕްގައި ދިވެހިރާއްޖޭގެ ފުރަތަމަ މެޗުގައި ޕާކިސްތާންއާ ބައްދަލުކުރަން ޖެހިއްޖެ އެވެ.

މުބާރާތުގައި ރާއްޖެ ހިމެނިފައި ވަނީ އެންމެ ފަހުގެ އިންޑިއާގެ އިތުރުން ޕާކިސްތާން އާއެކު ގުރޫޕު ބީގަ އެވެ. މުބާރާާތް ހުޅުވާ މެޗުގައި ނޮވެމްވަރު މަހުގެ ފަސް ވަނަ ދުވަހު ބައްދަލު ކުރާނީ ޕާކިސްތާން އާއި އިންޑިއާ އެވެ. 

ގްރޫޕް ސްޓޭޖުގެ ފުރަތަމަ މެޗުގައި ނޮވެމްބަރު މަހުގެ އަށް ވަނަ ދުވަހު ރާއްޖެ އިން ކުޅޭނީ ޕާކިސްތާންއާ ދެކޮޅަށެވެ. އޭގެ ދެ ދުވަސް ފަހުން، ނޮވެމްބަރު މަހުގެ 11 ވަނަ ދުވަހު ރާއްޖެ އިން ކުޅޭނީ އިންޑިއާއާ ދެކޮޅަށެވެ. 

މުބާރާތުގެ ގުރޫޕު އޭގައި އޮތީ ބަންގްލަދޭޝްގެ އިތުރުން ސްރީ ލަންކާ އާއި ބޫޓާން އެވެ. ބަންގްލަދޭޝް އާއި ބޫޓާން ބައްދަލު ކުރާ ގުރޫޕް ސްޓޭޖުގެ ފުރަތަމަ މެޗު އޮތީ ނޮވެމްވަރު ފަސް ވަނަ ދުވަހުގެރޭ އެވެ. މި ގުރޫޕުގައި ސްރީ ލަންކާ އާއި ބޫޓާން ބައްދަލުކުރާ މެޗު އޮތީ ނޮވެމްބަރު މަހުގެ އަށް ވަނަ ދުވަހުގެރޭ އެވެ. ގުރޫޕް ސްޓޭޖުގެ ފަހު މެޗުގައި ބަންގްލަދޭޝް އާއި ލަންކާ ބައްދަލު ކުރާ މެޗު އޮތީ ނޮވެމްބަރު 11 ވަނަ ދުވަހުގެރޭ އެވެ. 

މުބާރާތް ރޭވިފައި އޮތީ ގުރޫޕް ސްޓޭޖުގައި ކޮންމެ ޓީމެއް ކޮންމެ ޓީމަކާ ބައްދަލު ކުރުމަށް ފަހު، ދެ ގުރޫޕުގެ އެއް ވަނަ އާއި ދެ ވަނަ އަށް ސެމީ ފައިނަލްގެ ޖާގަ ލިބޭ އުސޫލުންނެވެ. މުބާރާތުގެ ސެމީ ފައިނަލްގެ ދެ މެޗު ކުޅުމަށް ތާވަލުކޮށްފައި ވަނީ ނޮވެމްބަރު މަހުގެ 14 ވަނަ ދުވަހު އެވެ. އޭގެ ފަހުން މުބާރާތުގެ ފައިނަލް މެޗު އޮތީ ނޮވެމްބަރު މަހުގެ 17 ވަނަ ދުވަހުގެރޭ އެވެ. 

މިހާރު އާންމު ކޮށްފައިވާ ތާވަލަކީ މުބާރާތުގެ ފައިނަލް ތާވަލެއް ނޫން ކަމަށް ބުނެފައިވެ އެވެ. ފީފާގެ ސަސްޕެންޝަނެއްގައި އޮތުމުގެ ސަބަބުން، އޮގަސްޓް މަހު ބޭއްވި ގުރުއަތުލުމުގައި ނޭޕާލް ހިމަނާފައި ނުވެ އެވެ. ނަމަވެސް، ސެޕްޓެމްބަރު 30 ގެ ކުރިން ނޭޕާލްގެ ސަސްޕެންޝަން އުވާލައިފި ނަމަ، އެ ޤައުމަށް ވެސް މުބާރާތުގައި ބައިވެރިވުމުގެ ފުރުސަތު ލިބޭނެ އެވެ.