ރަޝިޔާއިން ކީވްއަށް ދިން ޑްރޯން ހަމަލާތަކެއްގައި ތިން މީހުން މަރުވެ، 10 މީހުން ޒަޚަމްވެއްޖެ
28 ސެޕްޓެމްބަރު 2026 | ހޯމަ 02:44ރަޝިޔާއިން ޔޫކްރެއިނަށް ދެމުންދާ ވަރުގަދަ ޑްރޯން ހަމަލާތަކުގައި އާންމުންގެ ތަންތަނަށާއި ޚިދުމަތްތަކަށް ބޮޑެތި ގެއްލުންތަކެއް ލިބުމާ ގުޅިގެން، ރަޝިޔާއަށް ކުރާ ފިއްތުންތައް އިތުރުކުރުމަށް ރައީސް ޒެލެންސްކީ ބައިނަލްއަގުވާމީ މުޖުތަމައަށް ގޮވާލައްވައިފި. މި ހަމަލާތަކަށް ރައްދުދިނުމުގެ ގޮތުން ރަޝިޔާގެ މާލީ ވިއުގަތަކާއި ހަތިޔާރު އުފައްދާ ކުންފުނިތަކަށް އަމާޒުކޮށް އާ ދަތިކުރުމުގެ ފިޔަވަޅުތަކެއް އެޅުމަށް ޔޫކްރެއިން ސަރުކާރުން މިހާރު ދަނީ ތައްޔާރުވަމުން
ރަޝިޔާއިން ޔޫކްރެއިންގެ ވެރިކަށް ކީވްއަށް ދިން ޑްރޯން ހަމަލާތަކަކާ ގުލިގެން ރޯވި އަލިފާންގަނޑެއް ނިއްވައިލަން އަލިފާން ނިއްވާ ޓީމުތަކުން މަސައްކަތް ކުރަނީ | އަނަދޮލު އޭޖެންސީ
ޔޫކްރެއިންގެ ވެރިރަށް ކީވްއަށް ރަޝިޔާއިން ދިން ޑްރޯން ހަމަލާތަކެއްގައި ތިން މީހުން މަރުވެ، 10 އަށްވުރެ ގިނަ މީހުން ޒަޚަމްވެފައިވާ ކަމަށް އެ ސަރަހައްދުގެ ކަމާބެހޭ އިދާރާތަކުން އާދީއްތަ ދުވަހު ހާމަކޮށްފި އެވެ. މީގެ ތެރެއިން ގިނަ ބަޔަކު މަރުވީ، ކީވްގެ އަވަށެއްގެ މާރުކޭޓަކަށް ދިން ޑްރޯން ހަމަލާއެއްގައި ކަމަށް ކީވް ރީޖަނަލް ޕްރޮސެކިއުޓާސް އޮފީހުން ބުނެ އެވެ. މީގެއިތުރުން، މި ހަމަލާތަކުގެ ސަބަބުން އެ ސަރަހައްދުގެ އެކި ހިސާބުތަކުގައި ހުރި ގުދަނަކާއި އޮފީސް އިމާރާތެއްގައި އަލިފާން ރޯވެ، އެއްގަމު އުޅަނދުތަކަކަށް ވަނީ ބޮޑެތި ގެއްލުންތައް ލިބިފަ އެވެ.
ހޮނިހިރު ދުވަހުން ފެށިގެން ރަޝިޔާއިން އެކި ވައްތަރުގެ 277 ޑްރޯން ބޭނުންކޮށްގެން ހަމަލާދީފައިވާ ކަމަށް، ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވި އެވެ. އަދި، މި ހަމަލާތަކުގައި ޔޫކްރެއިންގެ އެކި ކަންކޮޅުތަކުގައިވާ އާންމު ރައްޔިތުންގެ ތަންތަނަށާއި އާންމު ޚިދުމަތްދޭ ތަންތަނަށް ގެއްލުން ލިބިފައިވާ ކަމަށާއި، އޭގެ ތެރޭގައި ސައުދީ އަރަބިއްޔާގެ ސަފީރުގެ ރަސްމީ ގެކޮޅުގެ ގޮތުގައި ބޭނުންކުރާ އިމާރާތެއް ވެސް ހިމެނޭ ކަމަށް އޭނާ ވިދާޅުވި އެވެ.
ކީވްއަށް ރަޝިޔާއިން ދިން ޑްރޯން ހަމަލާތަކުގައި ކިންޑަގާޓަންތަކާއި، ސްކޫލްތަކާއި، މީހުން ދިރިއުޅޭ އިމާރާތަކާއި، އުޅަނދު މަރާމާތުކުރާ ގަރާޖަކާއި، ގުދަންތަކުގެ އިތުރުން މުވާސަލާތީ ވަސީލަތްތައް "ހަލާކުކޮށްލާފައިވާ" ކަމަށް، ޒެލެންސްކީ ވިދާޅުވި އެވެ. މީގެއިތުރުން، "މި ކަން ކުރުމުގައި ރަޝިޔާގެ އެއްވެސް އަސްކަރީ މަގުސަދެއް ނެތް. މިއީ ހަމައެކަނި ރައްޔިތުންގެ ހިތްވަރު އެލުވާލައި، އަޅުގަނޑުމެންގެ މުޖުތަމައަށް ވީހާވެސް ބޮޑު ގެއްލުމެއް ދިނުމަށް ދިން ހަމަލާތަކެއް،" އޭނާ ވިދާޅުވި އެވެ. އަދި، ދްނީޕްރޯގެ ކުޅިވަރު ސްކޫލަކަށާއި ސޫމީ ސަރަހައްދުގައި ހުންނަ ކުޑަކުދިންގެ ހިޔާއަކަށް ވެސް މި ހަމަލާތަކުގައި ގެއްލުން ލިބިފައިވާ ކަމަށް އޭނާ ވިދާޅުވި އެވެ.
ޔޫކްރެއިންގެ ރަށްތަކަށް ރަޝިޔާއިން ދިން ކަމަށް ބުނާ ޑްރޯން ހަމަލާތަކުގައި ލިބިފައިވާ ގެއްލުންތައް ޔޫކްރެއިންގެ ރައީސް ވޮލޮޑޮމީރް ޒެލެންސްކީ އާންމުކުރައްވާފައިވާ ވީޑިއޯއިން | އެކްސް/ޒެލެންސްކީ
ހަނގުރާމައާ ގުޅިގެން ބައިނަލްއަގުވާމީ މުޖުތަމައުން އަޅާނެ ހަރުކަށި ފިޔަވަޅުތައް ލަސްކުރުމުގެ ބޭނުމުގައި، ދުނިޔެ އަޑުއަހަން ބޭނުންވާ ކަހަލަ ޑިޕްލޮމެޓިކް މެސެޖުތައް ފޮނުވަން ރަޝިޔާއަށް އެނގޭ ކަމަށް ވެސް ޒެލެންސްކީ ވިދާޅުވި އެވެ. "ޚާއްސަކޮށް އެމެރިކާގެ އޮފިޝަލުން ގާތު ރަޝިޔާއިން ދައުވާކުރާ ފަދައިން، މަސްރަހު ފިނިކުރުމަށް ހަގީގީ ފިޔަވަޅުތަކެއް އަޅަން އެ ގައުމުން ތައްޔާރުވަމުންދާ ނަމަ، 'ޝާހިދު' ޑްރޯންގެ މި ބިރުވެރި ރާޅެއް ނާންނާނެ،" މޮސްކޯއަށް ކުރާ ފިއްތުންތައް އިތުރުކުރުމަށް ޔޫކްރެއިންގެ ބައިވެރިންނަށް ގޮވާލައްވަމުން އޭނާ ވިދާޅުވި އެވެ.
މި ގޮތުން، ދަތިކުރުމުގެ އާ ފިޔަވަޅުތަކުގެ ޕެކޭޖުތަކެއް ތައްޔާރުކުރަމުންދާ ކަން އޭނާ ހާމަކުރެއްވި އެވެ. މި ފިޔަވަޅުތައް މައިގަނޑު ގޮތެއްގައި އަމާޒުކުރެވެނީ މާލީ ވިއުގަތަކަށާއި، ރަޝިޔާގެ ހަތިޔާރު އުފެއްދުމަށް ބޭނުންކުރާ ސާމާނާއި އާލާތްތައް ފޯރުކޮށްދޭ ސަޕްލައި ޗޭންތަކުގެ އިތުރުން، ރަޝިޔާގެ ބެލިސްޓިކް މިސައިލް އުފެއްދުމުގައި ހަރަކާތްތެރިވާ ކުންފުނިތަކަށާއި ވަކިވަކި ފަރުދުންނަށް ކަމަށް އޭނާ ފާހަގަކުރެއްވި އެވެ. "ހާލަތު ބަދަލުކޮށް، ހަގީގީ ޑިޕްލޮމަސީއަކާ ދިމާއަށް ރަޝިޔާ ގެންދިއުމަށް ޓަކައި ވަރުގަދަ ބިންގަލެއް އެޅުމަށް، މި އާ ދަތިކުރުމުގެ ފިޔަވަޅުތަކަށް އެންމެ ލަސްވެގެން ވެސް އޮކްޓޫބަރު މަހު އަމަލުކުރަން ފަށަންޖެހޭނެ،" އޭނާ ވިދާޅުވި އެވެ.
ޔޫކްރެއިންގެ އާންމުން ދިރިއުޅޭ އިމާރާތްތަކަށް ރަޝިޔާގެ އަސްކަރިއްޔާއިން ގަސްދުގައި ހަމަލާދޭ ކަމަށް ކުރެވޭ ތުހުމަތުތައް އެ ގައުމުން ތަކުރާރުކޮށް ދޮގުކުރެ އެވެ. އަދި، ރަޝިޔާގެ ހަމަލާތައް އަބަދުވެސް އަމާޒުކުރަނީ ހަމައެކަނި އަސްކަރީ އުމްރާނީ ވަސީލަތްތަކަށް ނުވަތަ އަސްކަރީ އެހެނިހެން އަމާޒުތަކަށް ކަމަށް އެ ގައުމުން ބުނެ އެވެ.
މީގެކުރިން، ކީވް އަދި އޮދެއްސާގައި ހުރި މުވާސަލާތީ އަދި ލޮޖިސްޓިކްސް ވަސީލަތްތަކަށް ހަމަލާދީފައިވާ ކަމަށް ރަޝިޔާގެ ދިފާއީ ވުޒާރާއިން ވަނީ ބުނެފަ އެވެ. އަދި، ޔޫކްރެއިންގެ ސިފައިންނަށް އަސްކަރީ ދާއިރާއަށް ވެސް ބޭނުންކުރެވޭ ސާމާނު ސަޕްލައިކޮށްދޭ މުދާ އުފުލާ ބޯޓަކަށް ހަމަލާދީފައިވާ ކަމަށް ވެސް އެ ވުޒާރާއިން ބުނެފައިވެ އެވެ.
މަސްދަރު: އަނަދޮލު އޭޖެންސީ
