ޔޫކްރެއިނުން ދަނީ ސުލްހައިގެ މަޝްވަރާތަކަށް ހުރަސްއަޅައި އިންތިޚާބަށް ނުފޫޒު ފޯރުވަމުން: ޕުޓިން
19 ސެޕްޓެމްބަރު 2026 | ހޮނިހިރު 04:35ރަޝިޔާގެ ނިއުކްލިއާ ގާބިލުކަމާއި ދިފާއީ ނިޒާމުތައް ވަރުގަދަކުރާނެ ކަމަށް ރައީސް ޕުޓިން ވިދާޅުވިއިރު، ޔޫކްރެއިނުން ދަނީ ރަޝިޔާގެ އިންތިޚާބަށް ނުފޫޒު ފޯރުވައި މަޝްވަރާތަކަށް ހުރަސްއަޅަމުން ކަމަށް އޭނާ ތުހުމަތު ކުރެއްވި. ރަޝިޔާގެ މަޖިލިސް އިންތިޚާބުގެ ވޯޓުލުން ފަށާފައިވާއިރު، ޔޫކްރެއިނުން ދަނީ ޑްރޯން ހަމަލާތައް މެދުވެރިކޮށް ރަޝިޔާގެ އެތެރޭގެ ސިނާއީ މަރުކަޒުތަކަށް އަމާޒުކުރަމުން
ރަޝިޔާގެ ގާނޫނުހަދާ މަޖިލީހުގެ އިންތިޚާބުގެ ވޯޓުލުން ކުރިއަށްދަނީ | އޭޕީ
ހަތަރު އަހަރާއި ބައި ވެފައިވާ ހަނގުރާމަ ހުއްޓާލުމަށް ކުރެވޭ މަޝްވަރާތަކަށް ޔޫކްރެއިނުން ގަސްދުގައި ހުރަސްއަޅަމުންދާ ކަމަށް ރަޝިޔާގެ ރައީސް ވްލަޑިމިއާ ޕުޓިން ހުކުރު ދުވަހު ވިދާޅުވެއްޖެ އެވެ. އަދި، ރަޝިޔާގެ ގާނޫނުހަދާ މަޖިލީހުގެ އިންތިޚާބަށް ޔޫކްރެއިނުން ނުފޫޒު ފޯރުވަން މަސައްކަތް ކުރަމުންދާ ކަމަށް ވިދާޅުވެ، ކީވްގެ ސަރުކާރަށް ޕުޓިން ވަނީ ބޮޑެތި ތުހުމަތުތަކެއް ކުރައްވާފަ އެވެ.
ރަޝިޔާގެ މިލިޓަރީ-އިންޑަސްޓްރިއަލް ކޮމިޝަނުގައި ވާހަކަފުޅު ދައްކަވަމުން، މޮސްކޯގެ ދިފާއީ މައިގަނޑު އަމާޒަކީ އެ ގައުމުގެ "ނިއުކްލިއަރ ޓްރަޔަޑް" ނުވަތަ އެއްގަމާއި ކަނޑާއި ވައިގެ މަގުން ފޮނުވާލެވޭ ނިއުކްލިއާ ހަތިޔާރުގެ މައްޗަށް ބަރޯސާވުން ކަމަށް ޕުޓިން އަލުން ތަކުރާރު ކުރެއްވި އެވެ. މީގެ އިތުރުން، އެ ގައުމުގެ އެންޓި-މިސައިލް ޑިފެންސް ނިޒާމުތައް އިތުރަށް ހަރުދަނާކުރުމަށް މަސައްކަތް ކުރަންޖެހޭ ކަމަށް ވެސް އޭނާ ވިދާޅުވި އެވެ.
ޔޫކްރެއިނުގެ ރައީސް ވޮލޮޑޮމީރް ޒެލެންސްކީގެ ރިޔާސީ ދައުރު ހަމަވެފައިވީ ނަމަވެސް، އެ ގައުމުގައި އާ އިންތިޚާބެއް ބާއްވާފައި ނުވާތީ އެ ކަމަށް އިޝާރާތް ކުރައްވައި، ޔޫކްރެއިނަކީ މިހާރު "ޚުދުމުޚުތާރު ވެރިކަމެއް އޮތް ގައުމަކަށް" ބަދަލުވެފައިވާ ތަނެއް ކަމަށް ޕުޓިން ސިފަކުރެއްވި އެވެ. "ޔޫކްރެއިނުގެ ވެރިން ތިއްބެވީ އިންތިޚާބެއް ބާއްވާކަށް އަވަސްވެގަނެގެންނެއް ނޫން، އެކަމަކު އެ މީހުން ދަނީ އަޅުގަނޑުމެންގެ އިންތިޚާބަށް ހުރަސްއަޅަން މަސައްކަތް ކުރަމުން،" އެއްވެސް ހެއްކެއް ދެއްކެވުމެއް ނެތި ޕުޓިން ވިދާޅުވި އެވެ.
2022 ވަނަ އަހަރުގެ ފެބުރުވަރީ މަހު ރަޝިޔާއިން ޔޫކްރެއިނާ ދެކޮޅަށް ފެށި ހަނގުރާމައާ ގުޅިގެން އިއުލާންކޮށްފައިވާ ކުއްލި ނުރައްކަލުގެ ހާލަތު ދެމިއޮތްހާ ހިނދަކު، އެ ގައުމުގައި އިންތިޚާބެއް ނުބޭއްވޭނެ ކަމަށް ޒެލެންސްކީއާއި ޔޫކްރެއިނުގެ އެހެން އިސްވެރިން ވިދާޅުވެ އެވެ. އަދި، އިންތިޚާބުގެ ނަތީޖާއާމެދު އެއްވެސް ޝައްކެއް ނެތް ކަމަށް ވާތީ، ރަޝިޔާގެ އިންތިޚާބު ކީވްގެ ސަރުކާރުން ސިފަކުރަނީ "ދަޅަ ދެއްކުމުގެ އިންތިޚާބެއް" ނުވަތަ "ސޫޑޯ އިލެކްޝަން" އެއްގެ ގޮތުގަ އެވެ.
ރަޝިޔާގެ އެކި ކަންކޮޅުތަކުގައި ވޯޓުލުން ކުރިއަށް
ތިން ދުވަހަށް ދެމިގެންދާ ރަޝިޔާގެ ގާނޫނުހަދާ މަޖިލީހުގެ އިންތިޚާބުގެ ވޯޓުލުން ހުކުރު ދުވަހު ފަށާފައިވާއިރު، މި އިންތިޚާބުން ޔޫކްރެއިނުގައި ހަނގުރާމަކުރާ ރަޝިޔާގެ ސިފައިންނަށް އެތައް މިލިއަން ރައްޔިތުންގެ ތާއީދު އޮތްކަން ހާމަވާނެ ކަމަށް ރަޝިޔާގެ ރައީސް ފާހަގަކުރެއްވި އެވެ. ނަމަވެސް، ހަނގުރާމައާ ދެކޮޅު ގިނަ ކެންޑިޑޭޓުންނަށް މި އިންތިޚާބުގައި ވާދަކުރުމުގެ ފުރުސަތު ދީފައިނުވާކަން މަސްރަހު ދިރާސާކުރާ ފަރާތްތަކުން ފާހަގަކުރެ އެވެ.
މި އިންތިޚާބުގެ ނަތީޖާއަކީ ޕުޓިންގެ ސިޔާސަތުތަކަށާއި، ހާއްސަކޮށް ފަސްވަނަ އަހަރަކަށް ދެމިގެން ގޮސްފައިވާ، ދެވަނަ ބޮޑު ހަނގުރާމައަށް ފަހު ވިލާތުގެ ބައްރުގައި ހިނގާ އެންމެ ނުރައްކާތެރި ހަނގުރާމައަށް އާންމުންގެ ބޮޑު ތާއީދެއް އޮތްކަމުގެ ހެއްކެއްގެ ގޮތުގައި ކްރެމްލިނުން ދައްކާނެ ކަމަށް ބެލެވެ އެވެ. ރަޝިޔާގެ އެކި އަމާޒުތަކަށް ޔޫކްރެއިނުން ހަމަލާދެމުންދާ ދިއުމަކީ، ހަނގުރާމަ ހުއްޓާލުމަށް މަޝްވަރާކުރަން ކީވްއިން ހުށަހަޅާ ހުށަހެޅުންތަކަކީ އިޚުލާސްތެރިކަމެއް ނެތް ކަންކަން ކަމުގައި ހާމަވާ ކަމެއް ކަމަށް ޕުޓިން ތުހުމަތު ކުރެއްވި އެވެ.
ދާދި ފަހުން ޔޫކްރެއިނުން ދިން ހަމަލާއެއް ރަޝިޔާގެ ބާރުގެ ދަށުގައި އޮތް ޒަޕޮރީޜިއާގެ އަވަށެއްގެ ގެއަކަށް އަރައި، އެ ސަރަހައްދުގެ އިންތިޚާބީ ކޮމިޝަނުގެ އިސްވެރިޔާ މަރުވެފައިވާ ކަމަށް ޕުޓިން ހާމަކުރެއްވި އެވެ. އަދި، އޭނާ މަރުވި ފަހުން ރަޝިޔާގެ ދައުލަތުގެ މަތީ ޝަރަފެއް އޭނާއަށް އަރުވާފައިވެ އެވެ. "މި ފަދަ ޖަރީމާތައް ހިންގައިގެން، ޔޫކްރެއިނުން އެ މަސައްކަތް ކުރަނީ ސުލްހަވުމުގެ އެއްވެސް ފުރުސަތެއް ނުބޭއްވުމަށާއި މަޝްވަރާތައް ހުއްޓުވުމަށް،" ޕުޓިން ވިދާޅުވި އެވެ.
ރަޝިޔާއިން އެއްގަމާއި ކަނޑާއި ވައިގެ މަގުން ފޮނުވާލެވޭ ނިއުކްލިއާ ހަތިޔާރުގެ މައްޗަށް ބަރޯސާވުން ކުރިއަށް ގެންދާނެ ކަމަށް ވެސް ޕުޓިން ބަޔާންކުރެއްވި އެވެ. ނަމަވެސް، އެ ގައުމުގެ ވައިގެ ދިފާއީ ނިޒާމުތައް އިތުރަށް ތަރައްގީކުރަން ޖެހޭ ކަމަށް އޭނާ ފާހަގަކުރެއްވި އެވެ.
މި ދަނޑިވަޅުގައި، ޔޫކްރެއިނުން ވަނީ އެ ގައުމުގެ ޑްރޯން އުފެއްދުމުގެ ގާބިލުކަން ވަރަށް ބޮޑަށް އިތުރުކޮށް، ބޯޑަރާ 3,000 ކިލޯމީޓަރު ދުރުގައި ހުރި ރަޝިޔާގެ ސިނާއީ މަރުކަޒުތަކަށް ހަމަލާދީފަ އެވެ. މީގެ ސަބަބުން ތެޔޮ ފޯރުކޮށްދިނުމަށާއި ރަޝިޔާގެ އާންމު ދިރިއުޅުމުގެ އެކި ކަންކަމަށް ވަނީ ބުރޫއަރާފަ އެވެ.
މަސްދަރު: ރޮއިޓަރސް
