ޕޮލެންޑް ބޯޑަރު ކައިރީގައި އޮތް ރޭލަކަށް ރަޝިޔާއިން ހަމަލާދީފި: މަސްރަހު އިތުރަށް ގޯސްކުރާ ކަމުގެ ތުހުމަތު ދެ ގައުމުން ރަޝިޔާއަށް
14 ސެޕްޓެމްބަރު 2026 | ހޯމަ 05:37ޕޮލެންޑް ބޯޑަރު ކައިރިން ރަޝިޔާއިން ދިން ހަމަލާތަކާ ގުޅިގެން މަސްރަހު ގޯސްވަމުންދާތީ، ޔޫކްރެއިނަށް ދޭ އެހީތެރިކަން ދެގުނަ ކުރުމަށް ޕޮލެންޑުން ވަނީ ގޮވާލާފައި. އަދި، ޔޫކްރެއިނުން ރަޝިޔާގެ ތެލުގެ ސިނާއަތަށް ދޭ ހަމަލާތަކުގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލެމުންދާތީ، އެ ހަމަލާތައް ހުއްޓާލުމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ބާރުއަޅުއްވާފައި
ޔޫކްރެއިނާއި ޕޮލެންޑް ގުޅޭ ބޯޑަރު ހުރަސްކުރާ ސަރަހައްދަކަށް އަމާޒުކޮށް ރަޝިޔާއިން ޑްރޯނެއް ބޭނުންކޮށްގެން ހަމަލާދީފައިވާ ރޭލަށް ލިބިފައިވާ ގެއްލުންތައް | އެކްސް
ޕޮލެންޑާއި ޔޫކްރެއިންގެ ބޯޑަރު ކައިރީގައި ދަތުރުކުރަމުންދިޔަ ރޭލަކަށް ރަޝިޔާއިން ދިން ހަމަލާތަކާ ގުޅިގެން، ރަޝިޔާއިން މަސްރަހު އިތުރަށް ގޯސްކުރަމުންދާ ކަމަށް ބުނެ އެ ދެ ގައުމުން ރަޝިޔާއަށް ތުހުމަތުކޮށްފި އެވެ. ޕޮލެންޑާއި ޔޫކްރެއިނުން ބުނީ، ކީވްއާއި ވޯސޯއާ ދެމެދު ދަތުރުކުރާ ފަސިންޖަރުންގެ ރޭލަށް ހަމަލާދީފައި ވަނީ ޕޮލެންޑްގެ ބޯޑަރާ އެންމެ ދެ ކިލޯމީޓަރު ދުރުން ކަމަށެވެ. ނަމަވެސް، މި ހަމަލާގައި އެއްވެސް މީހަކަށް އަނިޔާވި ކަމުގެ ރިޕޯޓެއް ލިބިފައެއް ނުވެ އެވެ.
ޔޫކްރެއިންގެ ރޭލްވޭ އޮޕަރޭޓަރު އާދީއްތަ ދުވަހު ބުނީ، މި ހަމަލާ ދިން ވަގުތާ ދާދި ގާތް ވަގުތެއްގައި އިނގިރޭސިވިލާތުގެ ކުރީގެ ބޮޑުވަޒީރު ބޮރިސް ޖޮންސަންއާއި އެމެރިކާގެ ސީއައިއޭގެ ކުރީގެ ޑައިރެކްޓަރު ޑޭވިޑް ޕެޓްރިއާސް އެ ސަރަހައްދުގެ ބޯޑަރު ކައިރީގައި އޮތް ރޭލު ސްޓޭޝަނެއްގައި ތިއްބެވި ކަމަށެވެ. މި ހަމަލާ ދީފައިވަނީ ބޮރިސް ޖޮންސަން އާއި ވިލާތުގެ އިއްތިހާދުގެ ބައެއް ގައުމުތަކުގެ ސަލާމަތީ މުޝީރުންނާއި ވިލާތުގެ ކުރީގެ ލީޑަރުން ތިއްބެވި ޑިޕްލޮމެޓިކް ރޭލުގެ އިތުރުން، ޕެޓްރިއާސް އިންނެވި އެހެން ރޭލެއް ޔަގޯޑިން ސްޓޭޝަނުގައި އޮތް ވަގުތެއްގަ އެވެ. އެ ވަގުތު އެ އޮފިޝަލުން ތިއްބެވީ ހަމަލާދިން ރޭލާ ކިހާ ދުރުމިނެއްގައި ކަމެއް ރޭލްވޭ އޮޕަރޭޓަރު ހާމަކޮށްފައެއް ނުވެ އެވެ.
މޮސްކޯއިން އެ ރޭލަށް ހަމަލާދިނީ "ގަސްދުގައި" ކަމަށް ޔޫކްރެއިންގެ ރައީސް ވޮލޮޑިމީރް ޒެލެންސްކީ ވަނީ ވިދާޅުވެފަ އެވެ. ޔޫކްރެއިނާއި ޕޮލެންޑް ގުޅޭ ބޯޑަރު ސަރަހައްދަކީ ހުޅަނގުގެ ބާރުތަކުން ޔޫކްރެއިނަށް ފޮނުވާ އަސްކަރީ އަދި އިންސާނީ އެހީގެ ބޮޑު ބައެއް އުފުލާ މައިގަނޑު މަގު އެވެ.
މަސްރަހު ގޯސްވަމުންދާކަމުގެ އިންޒާރު ޕޮލެންޑުން ދިނުން
ސަލާމަތީ ކަންކަމާ ގުޅޭގޮތުން އާދީއްތަ ދުވަހު ބޭއްވި ބައްދަލުވުމަކަށްފަހު، ޕޮލެންޑްގެ ރައީސް ޑޮނަލްޑް ޓަސްކް ވިދާޅުވީ، ރަޝިޔާގެ އަމަލުތައް އިތުރަށް ގޯސްވަމުންދާ ކަމީ ހަގީގަތެއް ކަމަށާއި، އެ ކަމުގެ މިސާލުތައް ޕޮލެންޑްގެ ބޯޑަރާ ދާދި ގާތުން ފެންނަމުންދާ ކަމަށެވެ. މީގެއިތުރުން، ރަޝިޔާއިން މިހާރު ބޭނުންކުރާ ޖެޓް އިންޖީނު އެޅި ދުރު-ރާސްތާގެ ޑްރޯންތަކުގެ ނުރައްކާ ބޮޑުވަމުންދާ ކަމުގެ އިންޒާރު ޓަސްކް ދެއްވި އެވެ. މި ޑްރޯންތަކަކީ ކުރިން ބޭނުންކުރި އާދައިގެ ޑްރޯންތަކަށްވުރެ މާ ބާރުގަދަ އަދި ހުއްޓުވަން އުނދަގޫ ހަތިޔާރުތެކެކެވެ.
އާދީއްތަ ދުވަހު ކީވްގައި ވާހަކަފުޅު ދައްކަވަމުން ޕޮލެންޑްގެ ޚާރިޖީ ވަޒީރު ރަޑޮސްލާ ސިކޯރްސްކީ ވިދާޅުވީ، ރަޝިޔާއިން މަސްރަހު ގޯސްކުރަމުންދާތީ، ޔޫކްރެއިނަށް އެހީތެރިވާ ގައުމުތަކުން އެ ގައުމަށް ދޭ އެހީތެރިކަން "ދެގުނަ" ކުރަންޖެހޭ ކަމަށެވެ. "މިއީ ޕޮލެންޑްގެ ބޯޑަރާ އެންމެ މަދު މީޓަރުކޮޅެއްގެ ދުރުމިނުގައި ހިނގި ކަމެއް. މީގެ ސަބަބުން އަޅުގަނޑުގެ ގައުމުގެ ރައްޔިތުންގެ ސަލާމަތަށް ނުރައްކާވޭ،" ސިކޯރްސްކީ ވިދާޅުވި އެވެ. މީގެ ކުރިންވެސް ރަޝިޔާގެ މިސައިލްތަކާއި ޑްރޯންތައް ޕޮލެންޑްގެ ސަރަހައްދަށް ވެއްޓިފައިވެ އެވެ. މި ގޮތުން، 2022 ވަނަ އަހަރު ރަޝިޔާގެ މިސައިލެއް ޕޮލެންޑްގެ އަވަށެއް ކަމަށްވާ ޕްރްޒެވޮޑޯވްއަށް އަރައި ދެ މީހަކު މަރުވެފައިވެ އެވެ.
އާދީއްތަ ދުވަހުބޮރިސް ޖޮންސަން ވިދާޅުވީ، އެއްވެސް މާނައެއް ނެތް ގޮތަށް ރޭލަށް ދިން މި ހަމަލާގެ ފަހަތުގައިވަނީ ކޮން ކަހަލަ "ނުރަނގަޅު ވިސްނުމެއް" ކަމެއް އެނގިވަޑައިނުގަންނަވާ ކަމަށެވެ. އަދި. ޔޫކްރެއިންގެ ރޭލްވޭ މުވައްޒަފުން ދައްކަމުންދާ ހިތްވަރަށް އޭނާ ވަނީ ތައުރީފު ކުރައްވާފަ އެވެ.
ޔޫކްރެއިންގެ ހަމަލާތަކުގެ ސަބަބުން ރަޝިޔާގެ ހަކަތައިގެ ސިނާއަތަށް ބޮޑެތި ގެއްލުންތަކެއް
ރަޝިޔާގެ ތެޔޮ އުފައްދާ މަރުކަޒުތަކަށް ދެމުންދާ ދުރު-ރާސްތާގެ ހަމަލާތައް މަދުކުރުމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ އާދީއްތަ ދުވަހު ޔޫކްރެއިނަށް ގޮވާލައްވާފަ އެވެ. ޓްރަމްޕް ވިދާޅުވީ، އެމެރިކާގައި ޑީސަލް ލީޓަރެއްގެ އަގު 1.59 ޑޮލަރަށް ވުރެ މައްޗަށް ދިޔައީ މި ހަމަލާތަކުގެ ސަބަބުން ކަމަށެވެ. "މިސްޓަރ ޒެލެންސްކީ ކުރައްވަންޖެހޭ އެއް ކަމަކީ ރަޝިޔާގެ ޑީސަލް އުފައްދާ ތަންތަނަށް ހަމަލާދިނުން ހުއްޓާލުން،" އަޔަރލެންޑް އޯޕަން ގަލްފް މުބާރާތުގެ ތެރެއިން ނޫސްވެރިންނާ ވާހަކަފުޅު ދައްކަވަމުން ޓްރަމްޕް ވިދާޅުވި އެވެ.
ޔޫކްރެއިނުން ދަނީ އެތައް މަހެއް ވަންދެން ރަޝިޔާގެ ތެޔޮ އަދި ގޭސް ސިނާއަތަށް އަމާޒުކޮށް ދުރު-ރާސްތާގެ ހަމަލާތައް ދެމުންނެވެ. މީގެ ސަބަބުން ރަޝިޔާގައި ތެޔޮ ލިބުން ދަތިވެ، ޕެޓްރޯލް ޝެޑްތަކުގައި ދިގު ކިއޫތައް ވަނީ ހެދިފަ އެވެ. މީގެ ރައްދުގައި، ދުނިޔޭގެ ބާޒާރުގައި ތެޔޮ ލިބުން ދަތިވެފައިވާ ވަގުތެއްގައި، ރަޝިޔާއިން ވަނީ މިދިޔަ ޖުލައި މަހުން ފެށިގެން ޑީސަލް ބޭރުކުރުން މަނާކޮށްފަ އެވެ. ކީވްއިން ބުނީ، ރަޝިޔާގެ ތެލުގެ ސިނާއަތަކީ ހަތަރު އަހަރަށްވުރެ ގިނަ ދުވަސްވެފައިވާ ޔޫކްރެއިން ހަނގުރާމައަށް ބޭނުންވާ ފައިސާއާއި ތެޔޮ ސީދާ ގޮތެއްގައި ފޯރުކޮށްދޭ މައިގަނޑު ވަސީލަތް ކަމަށެވެ.
މަސްދަރު: އަލް ޖަޒީރާ
