ޔޫކްރެއިނަށް ރަޝިއާގެ ވަރުގަދަ ހަމަލާތަކެއް، މަދުވެގެން ހަ މީހުން ޒަޚަމްވި

ރަޝިއާއިން ގިނަ އަދަދެއްގެ ޑްރޯންތަކާއި ކްރޫޒް މިސައިލް އަދި ބެލިސްޓިކް މިސައިލް ބޭނުންކޮށްގެން، ޔޫކްރެއިންގެ އެކި ސިޓީތަކަށާއި މުހިންމު އުމްރާނީ ވަސީލަތްތަކަށް އަމާޒުކޮށް ރޭގަނޑު ދިން ވަރުގަދަ ހަމަލާތަކެއްގައި، ވެރިރަށް ކީވްއިން މަދުވެގެން ހަ މީހަކު ޒަޚަމްވެފައިވާ ކަމަށް އޮފިޝަލުން ހާމަކުރައްވައިފި އެވެ.

ގިނަ އަދަދެއްގެ ޑްރޯންތަކާއި ބާރުގަދަ ބެލިސްޓިކް މިސައިލްތައް ކީވްއަށް އަމާޒުވަމުންދާތީ، ޔޫކްރެއިންގެ ވައިގެ ސިފައިން ވަނީ އެކި ފަހަރު މަތިން ކުއްލި ނުރައްކަލުގެ އިންޒާރު ނެރެފަ އެވެ. އަދި، ރައްކާތެރިކަން ހޯދުމަށް ޓަކައި ވަގުތުން ބަންކަރުތަކަށް ނުވަތަ ރައްކާތެރިކަން ލިބޭ ތަންތަނަށް ދިއުމަށް ވައިގެ ދިފާއީ ކަންކަމާ ބެހޭ އޮފިޝަލުން ވަނީ ތަކުރާރުކޮށް ރައްޔިތުންނަށް އިލްތިމާސްކުރައްވާފަ އެވެ.

ކީވްގެ ވަށައިގެންވާ ސަރަހައްދުތަކުގެ ތެރެއިން ބޮރިސްޕިލް އަދި ފާސްޓިވް ޑިސްޓްރިކްޓަށް އަމާޒުކޮށް ރަޝިއާ ސިފައިން ޑްރޯން ހަމަލާތަކެއް ދީފައިވާ ކަމަށް ސްޓޭޓް އެމަޖެންސީ ސާވިސްއިން ވަނީ ބުނެފަ އެވެ. މި ހަމަލާތަކުގެ ސަބަބުން ބޮރިސްޕިލް ސަރަހައްދުގެ ސިނާއީ މަސައްކަތްތައް ކުރާ ތަންތަނުގައި އަލިފާން ރޯވެ، ހަތް ލޮރީއެއް ވަނީ ބޭނުންނުކުރެވޭ ވަރަށް އަނދާފަ އެވެ. މީގެ އިތުރުން، ދެ ފަހަރެއްގެ މަތިން ހަމަލާ އަމާޒުވި ލޮޖިސްޓިކްސް ކޮމްޕްލެކްސްއެއްގައި ރޯވި އަލިފާންގަނޑުތައް ކުއްލި ހާލަތުގައި ހަރަކާތްތެރިވާ ޓީމުތަކުން ވަނީ ނިއްވައިލާފަ އެވެ.

ވެރިރަށް ކީވްއަށް ބެލިސްޓިކް މިސައިލް ހަމަލާތަކެއް އަމާޒުވަމުންދާކަން ކަށަވަރުކޮށްދެއްވަމުން، އެ ސިޓީގެ މޭޔަރު ވިޓާލީ ކްލިޓްޗްކޯ ވަނީ ސޮލޮމިއަންސްކީ ޑިސްޓްރިކްޓަށް ސިއްހީ އެހީތެރިން ފޮނުވުމަށް އެދިވަޑައިގެންފަ އެވެ. ކްލިޓްޗްކޯ ވިދާޅުވީ، ހޮލޮސީވްސްކީ ޑިސްޓްރިކްޓްގައި ހުންނަ ތައުލީމީ މަރުކަޒެއްގެ ގޯތިތެރޭގައި އަލިފާން ރޯވެފައިވާއިރު، ޕޮޑިލްސްކީ އާއި ދާރްނިޓްސްކީ ޑިސްޓްރިކްޓްގެ މީހުން ދިރިނޫޅޭ ސަރަހައްދުތަކެއްގައި ވެސް އަލިފާން ރޯވި ކަމަށެވެ.

މީގެ އިތުރުން، ވެރިރަށް ކީވްއިން ބޭރުގައި މީހަކަށް ގެއްލުމެއް ލިބުނުކަމުގެ ރަސްމީ މައުލޫމާތެއް  ލިބިފައި ނުވި ނަމަވެސް، ކީވްއަށް ދިން ހަމަލާތަކުގައި މަދުވެގެން ހަ މީހަކު ޒަޚަމްވެފައިވާ ކަމަށް އޭނާ ވިދާޅުވި އެވެ. ޒަޚަމްވި މީހުންގެ ތެރެއިން ތިން މީހަކަށް ހަސްފަތާލުގައި ފަރުވާދެމުންދާއިރު، ބާކީ ތިބި ތިން މީހުންނަށް ފަރުވާ ދީފައި ވަނީ އެޑްމިޓްނުކޮށް ބޭރުން ކަމަށް ވެސް އޭނާ ކަށަވަރުކޮށްދެއްވި އެވެ.

މި ހަމަލާތައް ހަމައެކަނި ވެރިރަށަށް އަމާޒުވުމުގެ ބަދަލުގައި، ޔޫކްރެއިންގެ މުހިންމު އެހެން ސަރަހައްދުތައް ކަމަށްވާ ދިނީޕްރޯޕެޓްރޮވްސްކް، ޕޮލްޓާވާ، ޗެރްނިހިވް، މިކޮލައިވް، ޗެރްކާސީ، ސޫމީ، ޒަޕޮރީޜިއާ، އޮޑެއްސާ، ޚާރްކީވް އަދި ޑޮނެޓްސްކްއަށް ވެސް ވަނީ އަމާޒުވެފަ އެވެ. މީގެ އިތުރުން، ރަޝިއާގެ އަސްކަރީ މަތިންދާބޯޓުތަކުން ވަނީ ޔޫކްރެއިންގެ އިރުމަތީ ސަރަހައްދުތަކުގެ ކުރީސަފުގެ މަގާމުތަކަށާއި އާންމުންގެ އިމާރާތްތަކަށް އަމާޒުކޮށް، ބޮޑެތި ގެއްލުންތައް ދޭ "ކޭއޭބީ" މަރުކާގެ ގައިޑެޑް ބޮންތައް ވެސް ބޭނުންކޮށްފަ އެވެ.

މި ހަމަލާތައް ދީފައި މި ވަނީ، އެމެރިކާގެ މަންދޫބުން ކަމަށްވާ ސްޓީވް ވިޓްކޮފް އަދި ޖެރަޑް ކުޝްނާ އެ ސަރަހައްދަށް ކުރެއްވި ޒިޔާރަތާ ގުޅިގެން ތިން ދުވަހުގެ މުއްދަތަށް ހަމަލާދިނުން މެދުކަނޑާލާފައި އޮތުމަށްފަހު އެވެ. ދަތުރުފުޅުގެ ތެރެއިން ވިޓްކޮފްއާއި ކުޝްނާ ވަނީ ރަޝިއާގެ ރައީސް ވްލަޑިމިއާ ޕުޓިންއާއި ޔޫކްރެއިންގެ ރައީސް ވޮލޮޑޮމީރް ޒެލެންސްކީއާ ވަކިވަކިން ބައްދަލުކުރައްވައި، މުހިންމު މަޝްވަރާތަކެއް ކުރައްވާފަ އެވެ.