ރަތް ކަނޑުން ދަތުރުކުރާ އީޔޫގެ އުޅަނދަތަކަށް ހަމަލާދިނުމުގެ ނިޔަތެއް ނެތް: ހޫޘީން

ޔަމަނުގެ ހޫޘީ ޖަމާއަތުން ރަތް ކަނޑުގެ މައްޗަށް އޮތް ބާރު ގަދަކުރަން މަސައްކަތް ކުރަމުންދާ ދަނޑިވަޅެއްގައި، ވިލާތުގެ އިއްތިހާދުގެ (އީޔޫ) މެންބަރު ގައުމުތަކުގެ އުޅަނދުފަހަރަށް ހަމަލާދިނުމުގެ ނިޔަތެއް ނުގެންގުޅޭ ކަމުގެ ޔަގީންކަން އެ ޖަމާއަތުން އީޔޫއަށް އަރުވައިފި އެވެ.

ރަތް ކަނޑުގެ އައްސޭރިފަށުގައި އޮތް ޔަމަނުގެ ސަރަހައްދުތަކަށް ހޫޘީން ވަނީ މި މަހުގެ ކުރީކޮޅު އަތްގަދަކޮށްފަ އެވެ. މީގެ ތެރޭގައި ރަތް ކަނޑުގެ އިސްތިރާޖީ ގޮތުން މުހިންމު މުޚާއާއި ބާބް އަލް-މަންދަބް ކަނޑުއޮޅީގެ އައްސޭރިފަށުގެ ސަރަހައްދުތައް ހިމެނެ އެވެ. މި ކަމާމެދު އީޔޫގެ ޚާރިޖީ ސިޔާސަތާއި ސަލާމަތާ ބެހޭ ގޮފީގެ ކަންބޮޑުވުންތައް ސާފުކޮށްދޭން ހޫޘީން އީޔޫއަށް ސިޓީއެއް ފޮނުވާފައިވާ ކަމަށް ފައިނޭންޝަލް ޓައިމްސްއިން ރިޕޯޓުކުރި އެވެ.

Advertisement

މިއީ، މި ހަމަނުޖެހުމުގެ ތެރެއަށް އެހެން ގައުމުތައް ވަނަނުދީ ހިފަހައްޓައި، ސައޫދީ އަރަބިއްޔާ އެކަހެރިކުރުމަށް ހޫޘީން ކުރަމުންދާ މަސައްކަތްތަކުގެ ތެރެއިން އެޅި ފިޔަވަޅެއް ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ. އަދި، ރަތް ކަނޑުގައި އެ ޖަމާއަތުން އަޅާފައިވާ ދަތުރުފަތުރުގެ ހުރަސްތަކަކީ ހަމައެކަނި ސައޫދީ އަރަބިއްޔާ އަދި އެ ގައުމުން ވާގިދޭ ޔަމަނުގެ ސަރުކާރާ ދެކޮޅަށް އަޅާފައިވާ ފިޔަވަޅުތަކެއް ކަމަށް ވެސް ހޫޘީން ބުނެ އެވެ.

ރަތް ކަނޑުގެ ސަރަހައްދުގައި ހޫޘީން ބާރު ގަދަކުރަމުން ކުރިއަރަން ފެށުމުން އެމެރިކާގެ އަސްކަރީ އެހީތެރިކަމަށް ސައޫދީ އަރަބިއްޔާއިން އެދުނު ނަމަވެސް، އެމެރިކާގެ ފަރާތުން އެއްވެސް އެހީތެރިކަމެއް ލިބިފައެއް ނުވެ އެވެ. "ހޫޘީން އަޅުގަނޑުމެންނަށް ގުޅި، އަދި އެ ޖަމާއަތުން އަޅުގަނޑުމެންނާ ދެކޮޅަށް ހަނގުރާމަ ކުރަން ބޭނުމެއް ނުވޭ،" މި މަހުގެ ކުރީކޮޅު ނޫސްވެރިންނާ ވާހަކަފުޅު ދައްކަވަމުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި އެވެ. މިއާއެކު، އޮމާނުން މެދުވެރިއަކަށް ވެގެން ހޫޘީންގެ އޮފިޝަލުންނާއެކު އެމެރިކާއިން ބައްދަލުވުމެއް ބޭއްވި ކަމަށް ވެސް ރިޕޯޓުތައް ބުނެ އެވެ.

އީޔޫއަށް ހޫޘީން ފޮނުވި މެސެޖުން، މި ކަނޑުގެ މަގަކީ ވިލާތުގެ ގައުމުތަކަށް ކިހާ މުހިންމު ސަރަހައްދެއްކަން ހާމަވެގެން ދިޔަ އެވެ. ހޫޘީންނާ ދެކޮޅަށް 2025 ވަނަ އަހަރު އެމެރިކާއިން ހަމަލާދޭން ފެށުމުގެ ކުރިން، ހޫޘީންނަށް ހަމަލާދިނުމަކީ ވިލާތުގެ ގައުމުތައް "ސަލާމަތްކޮށްދިނުން" ކަމަށް ސިފަކޮށް އެމެރިކާގެ ނައިބު ރައީސް ޖޭޑީ ވޭންސް ކަންބޮޑުވުން ފާޅުކުރައްވާފައިވެ އެވެ.

ރަތް ކަނޑަކީ ގަލްފުގެ ގައުމުތަކުގައި އުފައްދާ ތެލާއި ގޭސް ވިލާތުގެ ގައުމުތަކަށް ފޯރުކޮށްދިނުމަށާއި، އިރުމަތީ އޭޝިއާއިން މުދާ އުފުލުމަށް ބޭނުންކުރާ ވަރަށް މުހިންމު މަގެކެވެ. މެދުއިރުމަތީގެ ހަނގުރާމަ ފެށުމުގެ ކުރިން، ދުނިޔޭގެ ކޮންޓެއިނަރު އުފުލާ އުޅަނދުފަހަރުގެ ދަތުރުތަކުގެ ގާތްގަނޑަކަށް ތިންބައިކުޅަ އެއްބައި ކުރަމުން ދިޔައީ ރަތް ކަނޑު ހުރަސްކޮށެވެ.

ސައޫދީ އަރަބިއްޔާގެ އިރުމައްޗާއި ހުޅަނގު ގުޅުވައިދޭ 'އީސްޓް-ވެސްޓް' ތެޔޮ ހޮޅިލައިނަށް ހޫޘީން ދިން ހަމަލާތަކުގެ ނޭދެވޭ އަސަރު ވިލާތުގެ ގައުމުތަކަށް ކުރާނެ ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ. އެ ހަމަލާތަކާ ގުޅިގެން ހޮޅިލައިން ބަންދުކުރަން ޖެހުމާއެކު، ސައުދީ އަރަބިއްޔާގެ ދައުލަތުގެ ތެޔޮ ކުންފުނި، އަރަމްކޯއިން ވަނީ އޮކްޓޫބަރު މަހު ވިލާތުގެ ގައުމުތަކަށް ސާފުނުކުރާ ތެޔޮ ފޯރުކޮށްދިނުން ހުއްޓައިލަން ނިންމާފައިވާ ކަން އިއުލާނު ކޮށްފަ އެވެ. ނަމަވެސް، ހަމަލާތަކަށްފަހު އެ ހޮޅިލައިން އަލުން ހުޅުވާފައިވާ ކަމަށް ރިޕޯޓުތައް ބުނެ އެވެ.

އެމެރިކާގެ އަސްކަރީ އެހީތެރިކަމަށް އެދުމުގެ އިތުރުން، 'މައްކާ ދިފާއީ އެއްބަސްވުމުގެ' ބައިވެރިން ކަމަށްވާ ޕާކިސްތާނާއި ތުރުކީވިލާތުގެ އެހީތެރިކަމަށް ވެސް ސައޫދީ އަރަބިއްޔާއިން އެދިފައިވެ އެވެ. ޕާކިސްތާނުގެ ބައެއް ސިފައިންނާއި ހަތިޔާރުގެ ނިޒާމުތައް ސައޫދީ އަރަބިއްޔާގައި ގާއިމުކޮށްފައި ހުރި ނަމަވެސް، ޕާކިސްތާނުން ވެސް އަދި ތުރުކީވިލާތުން ވެސް ޔަމަނުގެ މި ހަމަނުޖެހުމުގެ ތެރެއަށް ވަދެފައެއް ނުވެ އެވެ.

ނަމަވެސް، ވިލާތުގެ ގައުމުތަކުން މިހާރު ވަނީ ސައުދީ އަރަބިއްޔާއަށް އިތުރު އެހީތެރިކަން ފޯރުކޮށްދޭން ނިންމާފަ އެވެ. މި ގޮތުން، ރަތް ކަނޑުގެ ޔަންބުއު ބަނދަރުގައި ގްރީސްއިން މިހާރު ވެސް އަންނަނީ 'ޕޭޓްރިއަޓް' މަރުކާގެ ވައިގެ ދިފާއީ ނިޒާމެއް އޮޕަރޭޓު ކުރަމުންނެވެ. އަދި، ހޫޘީންގެ ހަމަލާތަކުން ޔަންބުއުގެ ތެޔޮ ޓާމިނަލް ހިމާޔަތްކުރުމަށް އެހީތެރިވުމުގެ ގޮތުން "އަސްކަރީ ވަސީލަތްތައް" ފޮނުއްވާނެ ކަމަށް ބުރާސްފަތި ދުވަހު ފަރަންސޭސިވިލާތުގެ ރައީސް އެމަނުއެލް މެކްރޮން ވެސް ވަނީ ވިދާޅުވެފަ އެވެ.

ފަރަންސޭސިވިލާތުގެ މީޑިއާތަކަށް މައުލޫމާތު ދެއްވަމުން މެކްރޮން ވިދާޅުވީ، އެ ގައުމުން ފޮނުވަނީ މި ސަރަހައްދު ހިމާޔަތްކުރުމަށް ޓަކައި ބޭނުންވާ "އަސްކަރީ ވަސީލަތްތައް، އެއީ ސިފައިންނާއި، ރާޑަރު ނިޒާމުތަކާއި، ދިފާއީ ނިޒާމުތައް" ކަމަށެވެ. ނަމަވެސް އެއީ "އެއްވެސް ހަމަނުޖެހުމެއްގެ ތެރެއަށް އަޅުގަނޑުމެން ވަނުމަށް ޓަކައި" ފޮނުވާ ސިފައިންނާއި ހަތިޔާރު ނޫން ކަމަށް ވެސް މެކްރޮން ވިދާޅުވި އެވެ. މީގެ އިތުރުން، އިނގިރޭސިވިލާތުން ވެސް ވަނީ، "ދިފާއީ" އޮޕަރޭޝަނެއްގެ ދަށުން ސައުދީ އަރަބިއްޔާގެ އަސްކަރީ މަތިންދާބޯޓުތަކަށް ވައިގެ މަގުން ތެޔޮ އަޅައިދިނުމުގެ ޚިދުމަތް ފޯރުކޮށްދޭނެ ކަމަށް ބުނެފަ އެވެ.